Пӧсез но, кезьытэз но чида. Кызьы нюръяськоно гижыысь губиен?

Удмурт Дунне
By Удмурт Дунне Июль 24, 2017 14:00

Гужем усьтэм ныро пыдкутчан нуллэм потэ. Но данак адямиос пыд гижыоссы шӧтэмен сыӵе пыдкук дӥсяны возьдасько. Кызьы нюръяськоно пыд котырысь грибокен, вера  Кожно-венерологической элькун диспансерысь дерматовенеролог  Александр Николаев.

— Гижы висёнэз микоз шуо. Дуннеысь тазалыкез утёнъя огазеяськон лыдъям: котькуд 5-тӥез адями та висёнлэсь курадӟе. Удмуртиын но та выллем ик лыдпусъёс, зэм, тросэз врачъёслы вазиськыны кулэен уг лыдъяло.

— Малы?

— Грибок ӵемысь гижылэсь вылтуссэ гинэ воштэ. Адями малпа, нокытӥы уг висьы бере, марлы, больницаетӥ ветлыса, дыр быдтонэз. Куэ, гижые шедем губи ассэ шӧдытытэк кӧня ке толэзь улыны быгатэ. Одӥгезлэн ку вылаз гордалэс виштыос кылдо, собере соос пумен бадӟымало. Котырысьтыз ку куасьме но куалмаськыны кутске. Озьы ик луэ кырымпыдэсэ но пыдпыдэсэ кырмиськем губилэсь, но ку кисыриос (кожные складки) котырын пызь выллем потос кылдэ на. Куд-ог учыръёсы чиньы висъёс пилиськыло но лыдыны ӧдъяло. Гижыос ӵужалэс-пурысь луо, пырдо, пумен зӧкомо, куд-ог учыръёсы гижы воксё усе. Грибокен басьтэм инты уг висьы. Берло гинэ, гижы ӟокомыса, ӟоскыт пыдкутчанлэсь пыдчиньыос вӧсь луыны ӧдъяло.

— Кызьы но кытын луэ черланы микозэн?

— Губи — со будос бере, яратэ ӝокыт, нюлам, шуныт интыосты. Соин со ӵемгес кырмиське пыд гижыосы — пыд зол пӧсяку. Сое шедьтыны кема ик ӧвӧл мунчоосысь, саунаосысь, душъёсысь. Гужем со кырмиськыны быгатоз пляжын но, луоэтӥ гольык пыд ветлӥд ке. Угось грибоклэн пырыосыз бырытэк кема возисько, соос чидало 100 градус пӧсез но 60 градус кезьытэз. Черлан понна губилэн пичи пырыез гинэ но тырмыт. Соос таза адямилэн куаз шедё но, шунытын, нюрын улыса, мугоре туж ӝог выжы лэзё. Грибок озьы ик дэмӟыны быгатэ, куын, гижыосын пилиськем, нярӟем интыосыз вань ке, адямилэн иммунитетэз лябӟемын, антибиотикъёс кема юэ, сакыр диабетэн курадӟе ке.

— Кызьы черламлэсь кышкатэк улоно, семьяын микозэн висись адями вань ке?

— 30 процентаз учыръёсы грибок шеде матысь адямиослэн пыдкутчанысьтызы, выж лёгетъёсысь, мучолоысь (мочалка), ӵушконысь. Микозэн висись адямилэн пыд котырысьтыз грибок пырыосыз носкиосаз, пыдкуказ кылё, висён туж капчиен кырмиськыны быгатоз, таза адями гольык пыдаз висисьлэсь пыдкуксэ кутчаз ке. Соин ик семьяын котькудӥзлэн аслаз мед луозы ӵушконъёссы, пыдкутчанъёссы, носкиоссы, мунчое пырон арбериоссы.

— Кин борды ӵемгес кырмиське грибок?

— Та висён пиосмуртъёс котыре ӵемгес кырмиське. Верай вал ини, солы шуныт, нюр инты туж кельше шуыса. Воргоронъёс, кылсярысь, гужемзэ но ӵемгес нулло ворсам пыдкук. Пушказ пӧсь, нюр — ӵапак губилы аляно кадь.

Гижы губи номырлэсь но уг кышка.

— Кылэм вань, грибок адями борды кырмиське ке, солэн пырыосыз вирсэръёстӥ быдэс мугор пушкы вӧлмо шуыса.

— Ӧвӧл, грибоклэн пырыосыз черлам гижы но кытырысьтыз ку вылын гинэ возисько, адямилэн мугораз быдэс уг вӧлмо.

— Грибок гижыез быдэс басьтэ но, кӧня ке дыр ортчыса, гижы усе. Та бере выль таза гижы потэ, дыр, ук?

— Уг, тросэз озьы малпало, вылды, соин врач доры уг вазисько. Но грибоклэн выжыез выль гижыез но басьтэ, губиез нимысьтыз мазьёсын, подоваосын гинэ быдтыны луэ. Нош таоссэ, врачен кенешытэк, эн басьтэ — пайдаез уз луы.

— Эмъяськон туж дуно усе но кема кыстӥське, шуо…

— Зэм, эмъюмъёс туж дуноесь. Но макем вазьгес грибокен нюръяськыны кутскод, сокем ӝоггес сое быдтод, эмъяськон но дунтэмгес усёз. Муре пырем грибокез кӧня ке ар ӵоже но вормыны уг луы.

— Иське, мар кароно, микозлэсь утиськон понна?

— Висёнэз алон понна нырысь астэ чылкыт возёно. Нуналлы быдэ пыдъёсты миськоно, умой-умой ӵушылоно. Мурт адямиослэсь пыдэ пононъёссэс, уката ик гольык пыд вылэ, дӥсялляно ӧвӧл. Вуз карон лавкаосын пыдкук мертаку, одно ик носки дӥсяно. Котькуд адямилэн луыны кулэ аслаз ӵушконэз, мунчое пырон мучолоез. Бассейнэ, городысь мунчое, душъёсы гольык пыд ветлоно ӧвӧл. Трос калыко интыостӥ ветлэм бере пыдъёсты бактериослы пумит суретъёсын гылъяно. Гужем пыдъёс сокем медаз пӧсялэ шуыса, соосты тыпы суллэсь суретын возёно. Пыдкук, уката ик гужем, шокасьсэ быръёно. Быдэс нунал куятэк сое нуллыны уг яра. Кылсярысь, ужады быгатӥськоды пыдкуктэс мукетызлы, капчиезлы, шокасезлы воштыны.

— Нош калык амалъёсын эмъяськонлэн кыӵе ке пайдаез вань-а?

— Трос аръёс ӵоже микозэн нюръяськыса, мае гинэ адӟыны ӧз кылды ни. Адямиос пыд гижыоссэс чеснокен, йодэн зыралляло. Но ас валамедъя эмъяськон пайдаен уг берыктӥськы, угось дорын дасям суретъёслэсь ку пилиськылэ но, адями мугоре кырсь пыре, кема ик ӧвӧл — инфекция кырмиськоз. Соин умойгес, врачлы вазиськыса ик, эмъяськыны. Солэсь дэмланъёссэ сак чаклады ке, губиез выжыеныз быдтоды.

 

Удмурт Дунне
By Удмурт Дунне Июль 24, 2017 14:00