Меӵак эфирын — Москваысь Гербер

Удмурт Дунне
By Удмурт Дунне Июль 1, 2017 22:23

Меӵак эфирын — Москваысь Гербер

11.16

Ӝоген, 3 час ортчыса, Москваысь Эрмитаж садын усьтӥськоз удмуртъёслэн Гербер шулдыръяськонзы. Али мыно Герберлы берпуметӥ дасяськонъёс. Эрмитаж доры кыстӥсько ни Москваын улӥсьёс, Россилэн шоркараз дышетскись но улӥсь улосчиосмы. Туннэ татын ужалоз 10 пала площадка. Котькудӥз аслыз кулэзэ шедьтоз, Удмуртиен, удмурт калыкен, культураен матэгес тодматскоз. Кылсярысь, «Тодматске Удмуртиен» площадкаын калыкез шулдыртозы Тол Бабай но Лопшо Педунь, «Кылзы Удмуртиез» площадкаын — П.Чайковскийлэн музейтӥз 3D экскурсия луоз, «Лэсьтэмын Удмуртиын» площадкаын Калашниковлэсь автоматсэ бичаны дышетскозы. Со сяна, луозы удмурт киужъёсъя пӧртэм мастер классъёс, кырӟан- веранъёс, шахматэн шудонъёс, «Тод Удмуртиез» квест но трос мукетыз.

13.21

Москваысь Геберын кутскиз шахматэн шудонъя усьтэм турнир. Удмуртиысь тужгес усто пинал шахматистъес шудо дуннеысь шахматъя олимпиадаосын кунь полэс чемпионэныз А.Морозевичен. Собере шудозы дуннеысь ӝог шахматъя чемпионэн С.Карякинэн.

14.34 

Москваысь Эрмитажын Герберез усьтӥз Удмуртилэн Тӧроезлэсь ужзэ быдэсъясь А. Бречалов. Со сяна — Москваысь калык кусыпъёсъя департаментлэн кивалтӥсез В.Сучков но Москваысь удмуртъёслэн «Герд» огазеяськонзылэн кивалтӥсез Н. Подседерцев. — Ӟечбуресь! — вазиськиз люкаськем калыклы А.Бречалов. -Умоесь! — шуккиськиз парк тыр. — Удмуртъёс ярато асьсэ культуразэс. Та праздникез ми радъяськом Удмуртия сярысь Москваын улӥсьёс но тросгес мед тодозы шуыса. Куд-огез малпа, Удмуртия — со Калашниковлэн автоматэз гинэ. Но Удмуртия — со туж тунсыко но яркыт дунне, — шуиз А. Бречалов. — Таӵе праздникъёсын ми ог-огмылы матэгес луиськом, — ватсаз департаментлэн кивалтӥсез В. Сучков но Москвалэн мэрезлэсь ӟечкыланзэ лыдӟиз. — Тӥ шоры учкыса, ми шумпотӥськом. Сюлэм вылын луэ лякыт, шуныт, — шуиз Москваысь удмуртъёслэн кивалтӥсьсы Н.Подседерцев, Удмуртиысь лыктэм калыклы вазиськыса. Татын ик Герберлэсь пуссэ — Можга ёросысь Герберысь ваем Кылдысинэз сётӥзы Москвалэн кивалтэтэзлы.

 

17.01

Москваысь Герберын «Тодад возь» флэшмоб ортчиз. Эрмитажын ортчись Гербер шулдыръяськонэ пыриськисьёс Удмуртилэсь пуссэ лэсьтӥзы. Аспӧртэм утись пус (солярный знак) — Удмуртилэн куншетаз но, кунпусаз но вань. Флэшмобе пыриськисьёс пӧлын вал Удмурт Элькунлэн Москваысь представительствоезлэн кивалтӥсезлэсь ужзэ быдэсъясь Михаил Хомич, «Айкай» фольклор театр, Башкортостанысь удмурт коллективъёс. Вылӥысен беспилотникъёс съёмка лэсьтӥзы. Тунсыко: флэшмобе султэмъёс, шумпотэмзэс вераса, киосынызы шоназы, тыпыртӥзы гинэ, шундыё инбамысь витёнтэм вылысь зор кисьтӥськиз. Но 5 минут но ӧз зоры, нош ик пальыштӥз шунды. Москваын туннэ куазь туж пӧсь. Утись пус зэмзэ но уте! Праздник азинске!

17.54 

Та минутъёсы Эрмитажын, Герберын, ортче удмурт кылэз дышетонъя мастер-класс. Нуэ сое усточимы Ольга Урасинова. Удмурт кылэз дышетыны 30 пала адями лыктӥз. 30 минут ӵоже соос тодматскозы тужгес кулэ луись удмурт кылъёсын, веранъёсын, вакчияк асьсэ сярысь вераны быгатозы. Мастер-класс туж шулдыр ортче. Удмурт кылъёсын сяна, люкаськемъёс удмурт калыклэн сямъёсыныз, лулпуш дуннееныз тодматско.

20.50

Эрмитаж садын Гербер азинске. Москваос шумпотыса басьто удмуртъёслы сӥзем книгаосты, синпельёсты. «Удмуртия» издательстволэсь тужгес мыло-кыдо басьтӥллям ‘Удмурт калык выжыкылъёс, «Умурт калык дӥськут», Удмурт кухня», «Мифы и легенды удмуртского народа», «Удмурт-ӟуч», ӟуч-удмурт кыллюкам» но мукет книгаоссэс. Лыктӥзы, пе, егит удмурт пиос но кык сумка тыр книга басьтыса кошкизы. Озьы ик ялан черодъёс сыло пӧсь перепеч понна. Нош тодмо удмурт фермер Галина Белозёровалэсь 200 килограмм пала пельняньзэ басьтыса быдтӥллям.

 

 

 

22.00

Гербер пумен йылпумъяське. Площадкаос ворсасько. Но удмурт дискотекаысь кошкыны калык уг дырты на. Ма, Калашников концерн дорын но адямиос сыло на. Татын котькуд мылкыд карись автоматэз ӝог бичаны дышетскиз.

Елена Миннигараева

Удмурт Дунне
By Удмурт Дунне Июль 1, 2017 22:23