Кыӵе ми луомы, 100 ар ортчыса?

Удмурт Дунне
By Удмурт Дунне Июль 3, 2017 17:50

22-тӥ-24-тӥ инвожое Татарстанысь удмурт активистъёс понна Менделеевск ёросысь Тэремшур гуртын «БиГерд» форум ортчиз.

Форуме пыриськисьёс.

Та ужрадэз ортчытыны кичӧлтонэн потӥз Татарстанысь удмуртъёслэн автономиенызы кивалтӥсьлэн воштӥсез Марина Иванова. Ачиз со трос пол пыриськылӥз ни асьме кунысь но кунгож сьӧрысь пӧртэм форумъёсы, соин кылдӥз малпанэз, бигерысь удмурт егитъёсыз но кӧня ке нуналлы огазеяны.

Фольклор группаен кивалтӥз Павел Александров.

Форумлы дасяськон тулыс кутскиз ни, Казаньын улӥсь удмурт активистъёсын ми трос пол ӵош люкаськылӥм. Нош дыр туж ӝог ортче вылэм: ми валаса но ӧм вуэ, кызьы вуиз инвожо толэзь. Тэремшурын ортчытэм 3 нуналмы но туж кысык ортчизы, ми вань мылкыдмес но кужыммес сётӥм. Малпасько, милям форуммы туж ӟеч пӧрмиз, Татарстанлэн пӧртэм ёросъёсысьтыз вуэм егитъёсын ми табере азьланяз но кусып возём.

Форуме лыктэмъёслы дасямын вал  3 ӧр: фольклор, этноблогинг но этноквест. Фольклор группаен кивалтӥз Павел Александров, солы юрттӥзы Геннадий Ахметов но Анна Самсонова. Занятиязы соос удмуртъёслэн дӥськутсы, улэм-вылэмзы но Тэремшур сярысь тодӥзы, Гыронбыдтонлы кырӟан но эктон дасязы. Этноблогинге пыриськись егитъёс ужазы Алина Крестьяниноваен, нырысь соос тодматскизы удмурт блогеръёслэн бамъёсынызы но блогез нуон амалъёсын, бигер удмуртъёслэн «ВКонтакте» вотэсбамысь огиназы (группаязы) иворъёс гожъязы. Этноквест лэсьтыны дышетӥз Марина Иванова, форумлэн 3-тӥ нуналаз соос ортчытӥзы Тэремшур гурт сярысь легендая дасям шудонзэс. Форумчиос сяна, шудонэ пыриськыны быгатӥзы Гыронбыдтонэ вуэм куноос но.

Этноквест лэсьтыны дышетӥз Марина Иванова, форумлэн 3-тӥ нуналаз соос ортчытӥзы Тэремшур гурт сярысь легендая дасям шудонзэс.

Огаз ӝытэ Тэремшурысь культурая юртэ куноос вуизы, соос пӧлын вал Менделеевск ёросысь социальной ужпумъёсъя ёзэн кивалтӥсь Константин Макаров, Татарстанысь удмуртъёслэн автономиенызы кивалтӥсь Андрей Герасимов, кылбурчи Алексей Иноземцев но кинорежиссёр Денис Осокин. Вераськон туж пайдаё ортчиз, куноос веразы асьсэ улонзы но ужзы сярысь, кинъёс соос понна луо удмуртъёс но малы. Соос тыршо фин-угор лулчеберетэз азинтыны. Денис Осокинлы трос юанъёс сётъязы. солэн «Небесные жёны луговых мари» киноез егитъёслы кельшем, лэся. Павел Александров бигерысь удмуртъёслэн улэмзылы сӥзем кино снимать карон сярысь вераськон ӝутӥз на. Оскиськом, удмуртъёслэн автономизы та кино понна дурбасьтоз но Казаньысь режиссёрен валче кино поттоз. Вераськонлэн пумаз Андрей Герасимов сётӥз на егитъёслы юан, кыӵеен соос адӟо ас калыксэс, 100 яке 200 ар ортчыса, но мар кулэ лэсьтыны калыклэсь сям-йылолъёссэ кема аръёс ӵоже возён понна. Шӧдскиз, та юан активистъёслэсь пушсэс ик бугыртӥз. Соос веразы, культуразы музее гинэ медаз кыльы шуыса, удмуртлыкез одно ик туала кароно, улонлэн куронъёсыныз валче вамышъяно, кылсярысь, лэсьтылоно тросгес удмурт кылын телефонэ приложениос, дӥськут дизайнэз азинтоно но валтӥсез — нылпиосын одно ик анай кылын вераськоно.

Форумлэн берпуметӥ нуналэз Гыронбыдтонэн тупаз бере Анна Самсонова малпаз бадӟым флешмоб ортчытыны. Со бырйиз крезьгур, малпаз эктон но форуме пыриськисьёсыз эктыны дышетӥз. Флешмоб борды итӥськизы Менделеевскысь нылпиос, оглом Тэремшур луд вылэ 200 пала эктӥсьёс потӥзы.

Берпуметӥ нуналаз егитъёс доры вуизы на Тарту карын дышетскись тодмо удмурт кырӟась Николай Анисимов, режиссёр Денис Корнилов но Франциысь профессор Ева Тулуз. Малпасько, таӵе тунсыко куноосын вераськон егитъёсыз бурдъяз.

Йылпумъяськиз форум бадӟым позыръяськонэн, эктӥсьёсыз шулдыртӥзы Павел Александров, Николай Анисимов, Алёна Тимерханова но Иван Котельников.

Алина Крестьянинова

Туспуктӥз Р. Якупов

 

Удмурт Дунне
By Удмурт Дунне Июль 3, 2017 17:50