Кин лёге кивалтонэ сюрес? «Удмурт Кенешлэн» кадръёсъя резерваз 75 адями пыриз

Удмурт Дунне
By Удмурт Дунне Июль 12, 2017 15:12

Трос аръёс ӵоже нырысьсэ «Удмурт Кенеш»  огазеяськон рос-прос басьтӥськиз кадръёсты дасян борды.  Ортчем арня пумын кылдытэмын огазеяськонлэн кадръёсъя резервез. Та сярысь маде Россилэн Президентэз бордын кылдытэм кун службая академилэн Ижысь ёзысьтыз кафедраен кивалтӥсь, «Удмурт Кенешлэн» исполкомезлэн ёзчиез, экономика наукаосъя кандидат Александр Скобкарёв.

«Удмурт Кенешлэн» кадръёсъя резерваз пыртонъя комиссия.

— Александр Николаевич, асьтэос оскиськоды вал-а, уж интыысьтыз вырӟоз шуыса?

— Мон та пумысен трос малпаськи. Удмурт кадръёсты будэтон сярысь вераськонъёс кемалась мынӥзы ни. Угось котькуд быръёнъёс бере пыкылӥсьёс вал, депутатъёс пӧлын, кивалтэтын  удмуртъёс ӧжыт шуыса.

Кун службаысь кошкеме бере монэ «Удмурт Кенешлэн» кивалтӥсез Татьяна Ишматова огазеяськонэ ӧтиз, кадръёсъя ужпумъёсын вырыны дэмлаз. Рос-прос малпаськыны кутски: нош малы сомында аръёс ӵоже ми удмурт кадръёс ласянь одӥг вамышлы но ӧм азинске? Нош малы кулэ соосты ӝутыны? Кинлы кулэ со? Властьлы? Ӧвӧл. Властьлы, нырысь ик,  кулэ зэмос профессионалъёс,  асьсэ ужзэс рос-прос лэсьтыны быгатӥсь специалистъёс, адямилэсь кыӵе выжыысь луэмзэ лыдэ басьтытэк.  Соку кинлы? Аслыз удмурт калыклы. Озьыен, кин со азьветлӥсьёсты, кадръёсты шедьтыны-дэмланы кулэ? Вань удмуртъёслэн «Удмурт Кенеш» огазеяськонзы. Та малпанъёсме мон шараяй кылем арын «Удмурт Кенешлэн» исполкомаз. Огкылэ вуим: кулэ кадръёсты дасянъя рос-прос политика. Лэсьтӥм резерв кылдытонъя положениез. Сое «Удмурт Кенешлэн» исполкомаз но, Пичи кенешын но эскерим. Юанъёс трос вал. Оглюкетэз адямиос, маке пӧрмоз шуыса, ӧз оскелэ. Куд-ог удмурт азьветлӥсьёс но шуылӥзы: малы со милемлы кулэ? Вал дэмланъёс ёрос администрациосысь йыръёсын ӵош ужаны, кадръёсъя огъя базаос кылдытыны. Но туннэ нуналлы мон туж умой валай ни: «Удмурт Кенешлэн» аслаз кадръёсъя резервез луыны кулэ. Шумпотӥсько, со кылдӥз шуыса.

— Резерве шедён понна вожвылъяськиз 100 пала адями. Ваньмыз соос «Удмурт Кенешлэн» нимысьтыз комиссиосыз пыр потӥзы. Кӧняез быръемын вал но кыӵе кылиз огъя мылкыдды?

— Мылкыд умой. Пӧлаз вань туж кужмоосыз, бадӟым опытэн адямиос. Комиссия 3 нунал ӵоже ужаз. Нырысетӥ нуналаз ик лыктэм 25 адями пӧлысь 17-зэ коть али ик пукты кыӵе ке кивалтон удысэ: министерствое, агентствое, кыӵе ке муниципал кылдытэтэ яке хозяйствое. Мукетъёсызлэн но азинскемзы, тодон-валанзэс будэтэмзы потэ.

Зэм, огъя учконо ке, вазиськемъёс пӧлын вань улонын асьсэды утчась адямиос но. Кылсярысь, лыктӥз программист. Кинэн ассэ азьланяз адӟе — вераны шугъяське. Яке вуиз лэсьтӥськись. Азьланезлы планъёсыз озьы ик валантэмесь.

Но соослэн азинскыны мылкыдзы вань. Соин таӵеоссэ адямиосты но ми ӧм палэнтэ. Кылсярысь, со программист, оло, информатизацияя министерствоын ужаны быгатысал.

Кадръёсъя резервмы 2 люкетлы висъямын. Одӥгаз пыризы али ик бадӟым кивалтонлы дась адямиос. Мукетаз — соос, кинлы та понна тодон-валанзэс будэтоно, опыт люкано на. Резерве оглом 75 муртэ пыртћм.

— Кыӵе ёросъёсысь азьветлӥсьёс тросгес вазиськизы?

— Малпасько, тросэз потӥз интыосын «Удмурт Кенешлэн» ужамез бордысь. Тужгес трос вазиськисьёс вал Ижысь (40 адями), Кияса ёросысь (18 адями), Дэбес ёросысь (6 адями), Воткинскысь (4), Якшур-Бӧдьяысь (4), Можгалась (2), Вотка ёросысь (2). Мукетъёсыз палэнысен учкыса уло на, лэся.

— Удмурт калыклэн сямъёсыз сярысь вераку, пусъё: ужаны вал кадь ужало, нош азьветлӥсь луыны, мукетъёсыз понна кыл кутыны уггес дӥсьто. Та сям шӧдӥськиз-а?

— Ӧз. Шӧдӥськиз мукетыз: асьмелэн зэмзэ но вань азьветлӥсьёсмы. Соос тодо, кытчы мынэмзы потэ. Но соослы юрттоно гинэ. Кылсярысь, шаерысьтымы гурт удысысь одӥг туж бадӟым предприятилэн директорезлэн воштӥсез лыктӥз. Со хозяйствоысьтызы вань ю тысь будэтонэз, пудо вордонэз чакласа возе, та ужен кивалтэ. Эшшо азинскемез потэ. Юаськом: ёрос администрацилэн йырызлэн гурт удысъя воштӥсез луыны дэмласалмы ке, мынысалды-а? Мыно, шуэ. Малпаськоды, солэн уз пӧрмы? Пӧрмоз. Солэн гурт хозяйствоя али ик со быдӟа опытэз. Азьланяз, оскизы ке, быгатоз ёрос йыр но луыны.

Дэбес ёросысь одӥг гуртысь лыктӥзы колхоз тӧро но солэн валтӥсь экономистэз. Кыкназы но туж егитэсь ай, но огъя командаен ужаны тыршо. Та гуртын ик улӥсь, ёрос администрацилэн йырызлэн воштӥсез луыса ужась эшшо одӥг адями вуиз. Вузын дышетсконзэ йылпумъяса, соку ик администрациын ужаны кутскем, пумен-пумен ӝутскем. Юаськом: тӥ ноку производствоын, огшоры калык пӧлын ӧд ужалэ, шӧдӥськоды-а, со опыт уг тырмы шуыса? Туж, пе, шӧдӥсько. Кин тодэ, оло, та адями куке-соку зэмзэ но ёрос йыр луоз, но со котьку шӧдоз: калык пӧлын ужан тодон-валанэз уггес тырмы. Уж дышетэ, калык дышетэ. Тае мон ачим но туж умой шӧдӥсько вал. Правительствое шедемелэсь азьвыл мон кирпич поттон заводлэн директорезлэн воштӥсез луыса но ужай, радиозаводын но тырши.

Шумпотымон, куд-ог адямиос колхоз тӧро луыса ужаны дасесь. Тани одӥгез коть туннэ ик, пе, кыӵе ке ёросэ мынысал. Валамон, СПК-лы тӧроосты ачиз калык быръе. Но Гурт хозяйствоя но сиён-юонъя министерство пыр кандидатураез дэмланы луысал ук. Собере калык ачиз малпаськысал ни, кулэ-а солы та адями, осконо-а солы.

— Мар азьланяз? Резерве шедем адямиослы, иське, кивалтонэ меџак сюрес усьтћське?

— Озьы малпано ӧвӧл. Ми та адямиосты дэмлалом гинэ. Списокъёсмес келяломы Удмуртилэн Тӧроезлы, Правительствое, министерствоосы, муниципалитетъёсы. Зэм, соослэн асьсэлэн но резервъёссы вань. Но милям дэмлам адямиосмы пӧлысь но кинэ ке, оло, синйылтозы. Резервын трос адями луыны кулэ, пӧлысьтызы кинэ ке бырйыны мед луоз.

— «Удмурт Кенешлэн» кадръёсъя резерваз пырыны мылкыд карисьёс трос на, дыр. Соослы ма кароно?

— Резерв арлы быдэ выльдӥськоз. Озьыен, анкетаосты «Удмурт Кенеше» вуоно аре но вайыны луоз.

Елена Миннигараева

Туспуктӥз А. Горбунов

Удмурт Дунне
By Удмурт Дунне Июль 12, 2017 15:12