Ижын адӟем карымон семьяосты медален пусйизы

Удмурт Дунне
By Удмурт Дунне Июль 9, 2017 13:36

8-тӥ пӧсьтолэзе Россиын пусъё Семьялэсь но яратонлэсь нуналзэ. Со Пётр но Феврония святойёслы сӥземын. Удмуртиын та ужрад туэ 8-тӥзэ ортчиз.

«За любовь и верность» медаль басьтӥз Николай Спиридонович но Алевтина Никифоровна Кузнецовъёс

Ижысь дун-чылкыт Михаиллэн собораз 25 арлэсь кемагес валче улӥсь семьяосты данъязы. Куазь  зорыса улэмен, ужрад собор пушкын ортчиз. Сӥё-дано ужрадэ Елена кузпалэныз ӵош вуиз Удмуртилэн Тӧроезлэсь ужзэ быдэсъясь Александр Бречалов. Со люкаськем калыкез праздникен ӟечкылаз:

— Кузпалэным ми 5-тӥ классысен ог-огмес тодӥськомы ини, 22 ар шудо семьяен улӥськом, 2 синмаськымонэсь  нылпиосмес будэтӥськом.

Та ужрадын шаерысьтымы 30 усто семьяез данъямын, «За любовь и верность» медален пусйемын вал.

Адӟем карымон семьяос пӧлын пӧртэм удысын тыршисьёс вал: суредасьёс, тодосчиос, дышетӥсьёс, заводын ужасьёс. Соос радын пусйизы Андрей Иванович но Надежда Ивановна Ураськинъёслэсь семьязэс. Андрей Ураськин Удмурт театрлэн директорез, нош Надежда Ураськина Дышетон удысысь йӧскалык ужпумъёсты тодон-эскронъя институтлэн директорез луо. Соос визьмо нылзэс будэтӥзы. Озьы ик медаль басьтӥз Николай Спиридонович но Алевтина Никифоровна Кузнецовъёс. Тодмо удмурт историк, дано журналист Николай Кузнецов кузпалыныз 30 арлэсь трос ог-огзэс валаса, тупаса уло ни, 2 йӧно пиоссэс пыд вылазы султытӥзы. Пиоссы Москва палан уло, компьютер дизайнеръёс луыса ужало.

Озьы ик та ужрадын сӥлы каризы «Семейные трудовые династии» элькун вожвылъяськонын вормисьёсты. Удмуртиын со 2016-тӥ арысен радъяське. Туэ 3 номинация ялэмын вал, озьы «За эффективную работу» номинациын вормизы Можга ёросысь Вершининъёлэн семьязы. Гурт удысын выжыысьтызы 4 поколение тырше ни, котьку азьветлӥсьёс радын луо. «За преемственность поколений» номинациын вормизы Шаркан ёросысь «Луч» гурт хозяйствоысь Перевощиковъёслэн династизы. 3 поколениысь 34 адями тыршо соос гурт удысын. «Старейшая династия» номинациын вормисьёс луизы Алнаш ёросысь «Молодая гвардия» гурт хозяйствоысь Загибаловъёслэн династизы. Таосызлэн огъя ужам аръёссы 1062 ар луэм ини. Выжыысьтызы али 48 адями тырше хозяйствоын.

Наталия Самсонова

Туспуктэм: udmeparhia.ru

Удмурт Дунне
By Удмурт Дунне Июль 9, 2017 13:36