Чакара: Кырӟан жингыртӥз 2 нунал

Удмурт Дунне
By Удмурт Дунне Июль 17, 2017 13:30

Чакара: Кырӟан жингыртӥз  2 нунал

«Чакара» фольклор фестиваль вордӥськиз но нырысь ортчылӥз Ижкарын.

8-тӥ пӧсьтолэзе Татарстанысь Кукмор городын ортчиз вашкала удмурт гуръёслы сӥзем 8-тӥез «Чакара» фестиваль. Ужрадэ пыриськизы 13 улосвылъёсысь 45 фольклор коллективъёс.

«Чакара» фольклор фестиваль вордӥськиз но нырысь ортчылӥз Ижкарын, нош 2015-тӥ арысен Россиысь пӧртэм улосъёстӥ вамышъя. Кылсярысь, 2015-тӥ арын  Башкириын вал, 2016-тӥ арын, — Пермь улосын. Таяз аре Татарстанысь Кукмор город куноосты пумитаз. Куазь зоремен фестиваль школа юртын кутскиз. Люкаськем калык залэ ӧз тэры, соин ик зор бере шулдыръяськон Вормон парке выжиз.

Камсьӧр удмуртъёслэн огазеяськонэнызы кивал-тӥсь, та проектэз кылдытӥсь Флюра Чибышева ивортэмъя, Кукморе фольклор шулдыръяськонэ артистъёсын валче ог 4 сюрс пала адями люкаськиз. Башкортостанысь, Татарстанысь, Марий Элысь, Киров, Свердловск, Пермь улосъёсысь сяна, Ханты-Мансийск, Москва но Санкт-Петербург городъёсысь удмурт коллективъёс вуизы. Ужрадэ шаерысьтымы но ансамбльёс пыриськизы. Кылсярысь, Дэри ёросысь «Дэлет» но «Марӟан», Пичи Пурга ёросысь «Пурга мылкыд» но Ижысь башкир удмуртъёслэн — «Ӟаныкай».

— Таяз арын фестиваль 2 нунал кыстӥськиз, — вера Флюра Чибышева. — 7-тӥ пӧсьтолэзе палэнысь куноосмес пумитамы, соосты котырысь 6 удмурт гуртъёсы интыямы. Котькудаз гуртын быдэн 2 фольклор коллективъёссы вань. Озьы куноос но кузёос ог-огенызы пумиськон — тодматскон ӝытъёс радъязы, аспӧртэм мастер-класс радъяса, ог-огзылы концерт возьматӥзы. Нош 2-тӥ нуналаз 750 адями сцена вылысен шулдыртӥз калыкез. Татарстанысь гинэ 22 коллектив пыриськиз. Концерт огъя 8 час ӵоже кытӥськиз. Калык котькудзэ шумпотыса пумитаз, жадизы ке но, ӧз кошке. Артистъёсын ӵош эктӥзы, кырӟазы. Татысь ик валаны луэ: та ужрадмы туж кулэ калыклы.

Наталия Самсонова

 

 

Удмурт Дунне
By Удмурт Дунне Июль 17, 2017 13:30