«Быг-Быг»: Ӵошен ческытгес!

Удмурт Дунне
By Удмурт Дунне Июль 10, 2017 16:28

Шаркан ёросысь Быгыын, фин-угор сиён-юонлы сӥзем «Быг-Быг» фестивальын, шулдыръяськем, пӧраськем сяна, ортчизы ансамбльёс куспын вожвылъяськонъёс но фин-угор сиён-юонлы сӥзем конференция.

Татын огазеясько фин-угор культураос.

— 2014-тӥ арын Быгы гуртмы фин-угор дуннелэн лулчеберетъя шоркарез луэмез бере малпаськыны кутским: кыӵе ужрад лэсьтоно ай та, со пыраклы ёросамы, элькунамы мед кылёз шуыса. Туэ «Быг-Быг» фестивальмы 4-тӥзэ ортче ни, —  вера Быгы культурая юртлэн кивалтӥсез Жанна Ермолаева. — Котькуд ар фестивале выль шӧм пыртыны турттӥськом. Кылем арын со 5 ческыт нуналъёс ке вал, туэ фестиваль вера: ӵошен ческытгес!

Фестивале кылем арын вуылӥз 3 сюрс адями. Озьы со туэ Россиысь тужгес тодмо 10 этнофестивальёс пӧлы пыриз. Сыӵе эскерон лэсьтӥз Россиысь «Турстат» агентство. Талы асьсэос радъясьёс ик паймизы.

Фестивале лыкто семьяен.

Фестивальлэн нырысетӥ нуналаз Быгые люкаськизы 18 фольклор коллективъёс, йӧно агайёс-апайёс Быгы сценаез зуркатӥзы. Озьы соос зорез уллязы кадь — куазь калыклы шутэтскыны но пӧраськыны маза сётӥз.  Машинае пуксьыса,  кузь сюреслэсь кышкатэк, татчы вуэмын Ижысь, Пермь улосвылысь куноос. Фестиваль сярысь, Интернет пыр, пе, тодӥм.

— Кельше! — шуо.

Ма кызьы уз, тани гур азе султӥллям  ни — табань пыжыны дышетско. Ченгешо, кызьы гурысь табаез поттыны.  Мукет куноос дышетско варсь пӧзьтыны, вӧй шуккыны. Азбаръёсын резь-куаж вазе. Одӥгаз — асьсэ пӧрам сиён-юонзэс вузало пӧраськисьёс, мукетаз — фин-угор калыкъёслэн пыжиськемъёсынызы тодматскон мынэ.

Тодосчиос докладъёссэс лыдӟизы

Фестиваль дыръя ик Мувыр Вишур гуртэ люкаськизы тодосчиос, музейёсын ужасьёс, школаын дышетскисьёс. Тодосчиос докладъёссэс лыдӟизы: турын-куаръёслэсь кыӵе сиён-юонъёс пӧрало вал удмуртъёс, малы ӝожон кема улон кузьма, нош кумышка туала курыт юонъёслэсь дуногес сылэ.

Мувыр Вишурын улӥсьёс куноосты быдэс гуртэн пумитазы: 30 литр шумесэ табань котӥллям, пӧртэм пушкес дасяллям: кубистаен, кисьтэм йӧлын… Кытчы сомында?

— Ми ӵуказе, ваньзэ сьӧрамы кутыса, Быгые васьком ай, — шуо мувыр вишуръёс.

Кинъёс вормизы фин-угор пӧраськисьёс пӧлын, тододы «Берекет» газетысь.

Мария Векшина

 

 

 

 

 

Удмурт Дунне
By Удмурт Дунне Июль 10, 2017 16:28