Бавария: Нойшванштайн замоклы П. Чайковский но синмаськиз

Удмурт Дунне
By Удмурт Дунне Июль 27, 2017 15:00

Бавария — Германилэн огез улосэз. Отын асьсэлэн диалектсы, шулдыръяськонъёссы,  данъяськымон интыоссы но адямиоссы.

Нойшванштайн замокез адӟыны быдэс дуннеысь туристъёс вуо.

 Корольёслэн кельтэм узырлыксы

Баварие сюрсъёсын-сюрсъёсын туристъёс вуыло. Соос понна отын дасямын тунсыко маршрутъёс. Бавария быдэс дуннелы тодмо луэ фестивальёсыныз но карнавалъёсыныз, бадӟым шулдыръяськонъёсыныз, татын арлы быдэ сурлэн праздникез — «Октоберфест» — радъяське. Тужгес трос калык ветлэ адӟыны баварецъёслэсь праздникъёссэс, Альп гурезьёсыз но Мюнхен, Аугсбург но Регенсбург каръёсыз. Спортэн вырисьёс дырто гурезьёсы, сурез яратӥсьёс — «Октоберфестэ», историен тунсыкъяськисьёс — музейёсы, вашкала тунсыко юртъёсы. Котькин аслыз сюлмызъя ярасьсэ шедьтэ.

Асме историез гажасьёс пӧлы пыртӥсько, соин Германилэн тужгес бадӟым  музъемысьтыз (улосысьтыз) тодмо интыоссэ котыртэме потӥз. Бавария Германилэн лымшораз пуксемын, татын вамышлы быдэ сямен замокъёс, дворецъёс, паркъёс, музейёс интыяськемын.

Нойшванштайн замок — дуннеысь вань замокъёс пӧлысь тужгес тодмоез, туристъёсын яратоноез, дыр. Солэсь туспуктэмзэ пӧртэм открыткаос, блокнотъёс, календарьёс вылэ ӵемысь пукто. Америкаысь «Уолт Дисней» компанилэн мультфильмъёсыз гинэ но кутско та замокен заставка бордысен. Нош интыяськемын со Бавариысь пичи гинэ Швангау гурт вӧзын, Австриен кунгожлы матын. Мюнхенысен электричка отчы ог 2 час ӵоже вуттэ. Сойлинг гурезе пуктэм Нойшванштайнэз адӟон — со выжыкылэ вуылэм кадь! Отысен огвакытэ туж пӧртэм суредъёс кырымпыдэсын кадь усьтӥсько: тӧдьы юсьёсын но лудӵӧжъёсын лызпыръем-вож тыос, ӵем нюлэсъёс, горд но курень липето коркаосын Швангау. Нош замоклэн пушказ пырыса, син мальдэ — вань комнатаос кӧльыосын, зарниен-азвесен чеберъямын, шундыя соос чильк-вальк кисьтасько. Вӧлдэтэ бадӟым люстраос, нош борддоръёсы уно картинаос ошылэмын, кузяз скульптураос пуктылэмын. Котькуд зал пӧртэм стилья радъямын. Соку ик адӟиське — татын улэм король. Зэм но, та замокез Людвиг II пуктэм вылэм, но ачиз отын ар но улыны вуттымтэ. Али замок корольлэн кыдёкысь ӵыжы-выжыосызлы выжемын, соос арлы быдэ туристъёслэсь туж трос уксё потто, пе.

Верасько, Нойшванштайнлы асьме крезьгурчимы П. Чайковский туж синмаськем, замок сое бурдъям «Лебединое озеро» балетэз кылдытыны (немец кылысь Neuschwanstein «выль юсь кӧльы» шуыса берыктӥське).

Та замоклэсь нимзэ туж секыт шуак йыре кельтыны — я одӥг сямен, я мукет сямен верам потэ. Сое «Нойшвайнштайн» но шуыло. Паймонэз ӧвӧл, кылъёс огвыллемесь, но «шван» — со юсь, нош «швайн» — парсь.

Швангау гурт.

Нойшванштайн вӧзын ик мукет замок интыяськемын — Хоэншвангау (таизлэн нимыз «вылӥ юсь шаер» шуыса берыктӥське). Со туж ик тодмо ӧвӧл ке но, озьы ик туж чебер, аспӧртэмлыко. Сое пуктэм Людвиг II корольлэн атаез Максимилиан II Баварский, Людвиг отын трос дырзэ ортчытъям.

Бавариысь замокъёсы тур басьтӥды ке вуылоды на Линдерхоф замоке. Тазэ гинэ замоксэ Людвиг II улытозяз пумозяз пуктэм, мукетъёссэ вуттӥллям ни кулэмез бере.

Вазиськись калык

Школаын дышетскыкум ай, немец кылъя урокъёсын дышетӥсе вералляз, немецъёс, пе, туж вылтӥяськисесь но котьку ваньзэ шыръясесь. Кунгож сьӧры ӧй потасал ке, тодытэк кыльысал, дыр, немецъёс туж вазиськисесь, капчи мылкыдоесь шуыса.

Германиын таӵе учыр вал. Эшъёсыным уй клубысь 2 час бере потӥм, дугдылонние мынӥм. Нош уйин автобусъёс шер ветло. Ӟус вылэ пуксим. Асьме дорын, остановкаысь муртъёсты адӟыса, нокин номыр уг вера. Германиын солы дышемын ӧвӧл, вылды: кӧня мурт вӧзтӥмы ортчиз, одно ик юаськизы, ваньмыз умой-а, юрттэт кулэ ӧвӧл-а шуыса.

Мукетыз учыр Ульм городын луиз (со Баварие уг пыры ке но, солы матын пуксемын). Та карын дуннеысь самой ӝужытэз черк сылэ. Отчы вуыса, кызьы уд туспуксьы? Ас понназ калтыртӥсь мӧйы кышномуртэз монэ фотое пуктыны кури. Со куронме мыняса быдэстӥз, собере час пала соборлэсь историзэ, улонысьтыз соин герӟаськем учыръёссэ тунсыко мадиз. Вераз на, городысь кыӵе тунсыко интыосы вуылоно. Шумпотӥз, туала егитъёс ортчемзэ тодыны тыршо шуыса.

Тӧдьы юсьёсын но лудӵӧжъёсын лызпыръем-вож тыос, ӵем нюлэсъёс.

Эшшо одӥг чакланме гожтэме потэ. Асьме дорын но, Европаысь тросаз кунъёсын но калык городъёсы кыстӥське, угось отын тросгес луонлыкъёс умойгес уж шедьтыны, нылпиостэ пӧртэм кружокъёсы но секциосы нуллыны, ваньмон дырдэ ортчытыны… Нош Германиын пичи гуртъёсы но фермаос, пичи фабрикаос, яслиос но нылпи садъёс усьямын, нылпиослы площадкаос, секциос ужало.

Асьме дорын сямен ик, тросэз городъёссы но гуртъёссы шур вылэ пуксьылэмын, шуръёс вамен уно выжъёс ӝутэмын. Озьы ик трос тыоссы, нош ӵошкыт интыоссы туж ӧжыт, котыр гурезьёс-нюкъёс. Ӵемысь бус вӧлдӥське, солы луыса городъёс киноосысь суредъёслы укшаны кутско.

Баварие ветлыны малпады ке, одно ик веръялэ брецельёссэс — булкаоссэс — но мукет пыжиськемзэс (отын пӧраськыны но пӧраськемез сиыны туж ярато), колбасаоссэс но сосискаоссэс — Wurst (соос туж трос пумо луо), сӥльын шыд —  Eintopf. Аспӧртэм сиёнъёсты луоз веръяны Нюрнбергысь но Аугсбургысь, соос швабъёслэн (шваб диалектэн вераськись немецъёслэн) городъёсынызы лыдъясько. Отын, пе, культуразы но мукетгес, но 1-2 нунал ӵоже мон сое валаса ӧй вутты. Шӧдӥ гинэ: Нюрнбергын туж трос ӟучъёс уло, котыр ласянь ӟуч кыл чузъяське. Ас дуннеяз ветлӥсь пияшлы немец кылын вазиськи, туспуктыны курыса, нош со мыным ӟуч сямен «я вас не понимаю» шуиз но кошкиз. Ма ярам, немец туспуктӥз берло.

Германие вуиды ке, тодады возе: арнянуналъёсы отысь лавкаос уг ужало. Кин со сярысь ӧз тоды, сютэм кыльыны быгатоз. Соослэн шутэтскон нуналэ ваньзы шутэтско.

Елена Рябина

Удмурт Дунне
By Удмурт Дунне Июль 27, 2017 15:00