Врач лыктэ висись дӥне

Удмурт Дунне
By Удмурт Дунне Июнь 1, 2017 16:49

Врачъёс Старки микрорайонысь калыкез эскеро

Тазалыклы сӥзем форум кылем арняе ортчиз Ижысь Старки микрорайонын. 16-тӥзэ таӵе ужрад радъяськиз Кун Кенешлэн но «Огъя Россия» партилэн кичӧлтэмзыя.

Тазалыкъя ульчаос усьтӥськизы Старкиысь шор ёзо школаын. Ужрад 10 часын кутске вал ке, школа азбаре черод трослы вазьгес люкаськиз. Котькуд нунал адямиос доры асьсэос врачъёс уг лыкто ук!
Старки Ижлэсь палэнын интыяськемын, татын нимысьтыз больницазы ӧвӧл — адямиос ветло Ижысь 7-тӥ больницае. Кылем арын татын ФАП усьтӥськиз ке но, сюбег специалистъёс доры кыдёке ветлоно луэ.
Форумын нылпиослэсь но тазалыксэс эскерыны луонлык кылдэмын вал. Со понна татчы вуиз питран вылын больница. Со доры анай-атайёсын но пиналъёсын кузь черод люкаськиз. Аслэсьтыз но, нылпиезлэсь но тазалыксэ эскерыны лыктэм Наталья Алихова кӧня ке дыр куспын УЗИ лэсьтӥз, гастроэнтеролог, хирург, кардиолог дорын эскериськиз.
Старкиын улӥсьёс дӥне врачъёсын ӵош вуылӥз Кун Кенешысь депутат, Тазалыкез утёнъя, демографияя но семья ужпумъёсъя ялан ужась комиссилэн кивалтӥсез Светлана Кривилёва. Калык солы вазиськиз, сюлмаськытӥсь ужпумзэс сэрттыны курыса. Берло дыре вераськон потӥз, татысь улӥсьёсты мукет больница борды юнматозы шуыса. Одӥгъёсыз шуо, дышем интыямы ик — 7-тӥ больницае — кыльысалмы, мукетъёсыз дурбасьто матысьгес больницае ветлонлы. Светлана Кривилёва сооссэ но, таоссэ но кылзӥз, дэмлаз калыклэн нимыныз та пумысен Кун Кенеше куриськон гожтыны.
Но Кун Кенешын Старкиын улӥсьёслэсь югдурзэс тодытэк уг уло вылэм. Та вакытлы, кызьы вераз депутат, Тазалыкез утёнъя министерствоен кенешонъёс мыно. Адямиос врачъёс доры черодъёстэк шедьыны мед быгатозы шуыса, чакламын 7-тӥ город больницаез паськытатыны, вӧзысьтыз «Столичный» микрорайонысь куд-ог юртъёс эмъюртлы выжыны быгатозы, пе. Но азьлапал адямиосын кенешемын луоз, кызьы умойгес радъяно эм юрттэт сётонэз.

Ангелина Снигирёва

Туспуктэмез авторлэн

Удмурт Дунне
By Удмурт Дунне Июнь 1, 2017 16:49