Воткинск ёросын «Таза нация — кужмо Россия» форум ортче

Удмурт Дунне
By Удмурт Дунне Июнь 28, 2017 17:03

Туннэ нунал ӵоже Воткинск ёросысь Первомайский черкогуртын «Таза нация — кужмо Россия» форум ортче. Шаерамы со радъяське 17-тӥзэ.

Врачъёс доры сюрон вылысь адямиос вазь ӵукнаысен черодэ султылӥзы.

Элькунамы ваньмызлэн улӥсьёслэн ӧвӧл луонлыксы тазалыксэс эскерон вылысь Ижысь больницаосы ветлыны. Соин «Огъя Россия» партия ӵектӥз эмъясьёслы асьсэлы калыке потаны. Одӥг нуналэ 50 пала специалистъёс мыно кыӵе ке муниципал кылдытэтэ но приём ортчыто.

— Та проект туж пайдаё, — вера Кун Кенешлэн Тӧроезлэн нырысетӥ воштӥсез, Тазалыкез утёнъя, демография но семья политикая ялан ужась комиссилэн кивалтӥсез Светлана Кривилёва. — Со юрттэ пыктос висёнъёсты, диабетэз дыраз  шараяны. Вал сыӵе но учыр, куке врач приёмысен адӟиз, висисьсэ инфаркт кутэм шуыса. Ӝегатскытэк ӧтиз «скороез» но келяз больницае. Жаляса верано, висисьёслэн лыдзы будэ. Соин туж кулэ соосты дыраз.

Светлана Петровна верамъя, кыӵе ке муниципал кылдытэтэ эмъясьёс лыкто ке, калык соос доры капчиенгес ӝутске, больницае сямен, толэзьёсын уг дасяськы. Ма, больницае сюрыны но туж капчи ӧвӧл. Нош таӵе форумъёсын эмъясьёс, берпуметӥ висись кошкытозь, ужало.

— Ми малпаськом, туннэ врачъёс доры приёме вуылоз матысь 7-8 гуртъёсысь 700 пала мурт, — шуиз Первомайской муниципал кылдытэтлэн йырыз Ольга Воронова. — Жаляса верано, берло дыре егитъёс пӧлын трос инсультъёс луыны кутскизы, пыктос, диабет алязы. Соин ми туж шумпотӥськом, та форум дорамы ортче шуыса.

Елена Рябина

 

Удмурт Дунне
By Удмурт Дунне Июнь 28, 2017 17:03