Удмуртиын ог 15 сюрс адями донор луэ

Удмурт Дунне
By Удмурт Дунне Июнь 21, 2017 11:09

14-тӥ июне быдэс дуннеын Донорлэсь нуналзэ пусъё. Вирзэс сётӥсьёс шуге-леке сюрем адямиослэсь улонзэс утьыны юртто.

Доноръёс ар куспын 17 тонна вир сёто.

— Доноръёс ар куспын 17 тонна вир сёто, — вера Вир басьтонъя элькун станциен кивалтӥсь Алексей Зараев. — Ог 80 процентэз — 14 тонна котыр — басьто Вир басьтонъя элькун станциын, 1 тонна пала вир люкало Можгаысь но Глазовысь станциос, кылемзэ дася Нырысетӥ элькун больница. Вир та нуналлы тырмыт, ми дась котькыӵе учыръёслы. Но ваньмыз умой шуыса, гань-гань ум пукиське, ялан сюлмаськиськом тросгес доноръёсты та ӟеч уж борды кыскыны. Угось шаерамы, быдэс дуннеын сямен ик, огкадесьгес сюлмаськонъёс: одӥгъёсыз доноръёс пересьмо, мукетъёсыз борды висёнъёс кырмисько, кин ке одӥг пол вуэмез бере мукетъят уг лыкты ни. Соин юн кусып возиськом дышетскон учреждениосын, потаськомы ёросъёсы. Нуналаз шорлыдын шаерысьтымы больницаос дорысьтымы 25-30 килограмм вир басьто. Станцимы уй-нунал ужа. Шуккиськон учыръёс котькуд нунал луо — уд тодӥськы, кыӵе вакытэ но кӧня вир кулэ луоз, озьыен, малпаськоно 2 вамышлы азьлапал. Собере, вирлэн куд-ог компонентъёсыз, 5 нунал ортчыса, уродмо ни, нош ӵапак соос мыно вож нуныослы, варикозэн, лек пыктосэн висисьёслы. Соин сюлмаськиськомы, станциямы котькуд нунал выль вир мед лыктоз шуыса.

Донор луыны быгатэ 18 арессэ тырмытэм висисьтэм адями. Донор, кылсярысь, луыны уг быгато ВИЧ-ен, гепатитэн, туберкулёзэн курадӟисьёс, вир сётон нуналэ пыэдэн висисьёс, 55 килограммлэсь ӟызыгес адямиос…

Соку гинэ басьтэм вир со нуналэ ик шаерысьтымы больницаосы уг вуы — сое 6 толэзь ӵоже холодильникын возиськом, эскериськом.

Адямилэн, вирзэ сётыса, тазалыкез нокызьы уг сӧриськы, солы пумит — вирыз выльдӥське. Доноръёслэсь лыдзэс возён понна кун ласянь бадӟым уж нуиське. Вир сётон нуналэ яке мукет дыре донорлэн шутэтскон нунал басьтыны луонлыкез вань. Озьы ик солы вир сётэмез бере сиськыны шуыса сёто 453,75 манет — улыны тупатэм минимумлэсь 5 процентсэ. Бадӟымгес льготаос сётӥсько дано доноръёслы. Та нимез басьтон вылысь вирез ичизэ 40 пол сётоно. Таӵе муртъёслы араз одӥг пол 13 сюрс 41 манет коньдон тыриське, озьы ик соослэн пичиятэм дунын проездной, санаторийёсы путёвка басьтыны луонлыксы вань. Удмуртиын ог 4 сюрс адями «Дано донор» ним нуллэ.

Но, оскисько, доноръёс вирзэс сётыса, асьсэлы пайда басьтон сярысь уг малпасько, висисьёслы юрттӥськон пумысен сюлмасько. Донор луон сярысь пыр-почгес тодыны луоз donor.ru сайтысь.

Ангелина Снигирёва

 

 

Удмурт Дунне
By Удмурт Дунне Июнь 21, 2017 11:09