Удмурт корка: Инты сюриз, пуштрос кулэ

Удмурт Дунне
By Удмурт Дунне Июнь 16, 2017 15:55

Удмурт корка пумысен тунсыко малпанъёссэ вераз П. Поздеев.

Кызьы ивортылӥм ни, Удмуртилэн Тӧроезлэсь ужзэ быдэсъясь Александр Бречалов дурбасьтӥз «Удмурт Кенешлэн» Ижын Удмурт лулчеберетъя юрт кылдытон сярысь дэмланэзлы. 7-тӥ инвожое со пумысен Удмурт кун филармониын ортчизы калык кылзонъёс, удмурт азьветлӥсьёс вуоно центр пумысен мылкыдъёссэс-малпанъёссэс веразы.

 

Кылзонъёсы пыриськизы Тӧролэн но Правительстволэн администрациенызы кивалтӥсьлэсь ужзэ быдэсъясь Сергей Смирнов, лулчеберетъя но туризмъя министрлэсь ужзэ быдэсъясь Владимир Соловьёв, йӧскалык политикая министрлэн воштӥсез Павел Орлов, Печатья но ивор вӧлмытонъя агентстволэн кивалтӥсез Алексей Воронцов, Ижкар Думалэн кивалтӥсез Олег Гарин, Удмурт Элькунлэн дано кунмуртъёсыз, «Удмурт Кенеш» огазеяськонлэн исполкомчиосыз, наука но творчество удысысь тодмо адямиос.

Ужрадэз нуиз «Удмурт Кенеш» огазеяськонлэн тӧроез Татьяна Ишматова:

— Шумпотымон, милесьтым кичӧлтонмес выль кивалтӥсь кылӥз шуыса, табере асьмеос сюлмаськыны кулэ солэн пуштросэз сярысь. Соин ик юромо радъямы шара кылзонъёс — котькудӥз мед вералоз аслэсьтыз мылкыдзэ-малпанзэ, тунсыко ӵектонъёсты проект лэсьтӥсьёс, архитекторъёс ужазы кутозы.

Вуж юртын 1990-тӥ арысен интыяське «Айкай» театр.

Сергей Смирнов вераз:

— В. Короленко нимо ӟуч театрлэн азьвыл юртэз зол тупатъямез кулэ каре, корка пыронэз бадӟым юбилейёс дорозь ортчытон понна уж борды туннэ ик басьтӥськоно. Решение бумага вылын ӧвӧл на ке но, А. Бречалов вераны косӥз: центр одно ик луоз! Но тӥ таин буйгатскыны кулэ ӧвӧл — центр огшоры дыр ортчытон инты гинэ медаз луы, со мед юрттоз асьмелэсь лулчеберетмес паськытгес вӧлмытыны, асьме доры тросгес туристъёсты кыскыны. Угось, жаляса верано, элькунлэн палэназ тросэз уг но тодо, Ижкар — со Удмуртилэн шоркарез шуыса. Со дыре ик удмуртъёслэн туж узыр культуразы, тани туннэ «Айкай» одӥг номер гинэ возьматӥз, но соя но валаны луэ ни, макем чебер но узыр со… Валамон, та проектэз элькун ас кожаз гинэ уз вормы, угось инты висъям бере сое маке чот возёно, азинтоно, соин ик татчы бизнесэз но кысконо.

Вуж юртын 1990-тӥ арысен интыяське «Айкай» театр. Ӵапак та коллектив выльдэм юртын но валтӥсь инты басьтыны кулэ, лыдъяло «кенешчиос». Соин ик нырысь кыл сётӥзы «Айкай» театрлэн чеберлыкъя кивалтӥсезлы Олег Бимаковлы:

— Умой луысал «Айкайлы» ватсаса инты висъяны, малы ке шуоно ӧвӧл нимысьтыз костюмернойёс, гримёрнойёс. Со сяна, отын одно луыны кулэ «Айкайлэн» нылпи студиез, бадӟым но пичи сценаос (али сэрттэмын), крезьгур гожъянъя студия, медиатека, куно пумитан интыос, кафе…

Аслэсьтыз адӟонзэ тужгес но тунсыко мадиз режиссёр Павел Поздеев.

— Асьмеос та югдур шоры паськытгес учкыны кулэ, — шуиз со. — Татын валтӥсез луэ шоркарысь удмурт лулчеберетлэн огъя пуштросэз — философиез. Котькуд студилы, ансамбльлы нимаз сэрег висъян — со умой. Но ойдолэ потом борддоръёс сьӧры но! Кылдытыны луэ ук быдэс пространство: кылсярысь, театр котырын вань на, дыр, кӧня ке музъем, уже кутоно сое но — кылдытоно парк, отчы интыяно удмурт батыръёсын яке выжыкыл геройёсын скульптураос, собере эшшо кыдёкегес учконо — чаклано туристъёслы вакчияк маршрут: Удмурт лулчеберетъя юрт — Калык киужъёсъя юрт — Г. Красильников нимо литературной музей…

Нош пушказ интыяны умой луысал на ужрадъёсъя бюро (мед со выроз удмурт ужрадъёс кылдытъянэн, вӧлмытонэн, калыклэсь та удысын кулэяськонъёссэ эскеронэн), со сяна — удмурт кылэз дышетонъя ялан ужась курсъёс, удмурт кружокъёс…

Шумпотымон, Ижкар Думалэн кивалтӥсез Олег Гарин дурбасьтӥз Павел Поздеевлэн малпанэзлы.

— Таӵе проект Ижкар понна туж тунсыко луысал, — шуиз со. — Ми дась юрттыны благоустройство ласянь. Уг ик сюлмаськиськы, центр тэк сылоз яке осконъёсты уз зэматы шуыса, отчы котьку трос калык кыстӥськоз. Али Ижын зэмзэ но ӧвӧл тунсыко удмурт инты.

Удмурт интыосты паськытатон мылкыдын ик вераськиз «кенешчи» Илья Викторов — со, кылсярысь, ӵектэ та центр борды юнматыны Кызьпу арамаез.

Асьсэлэсь малпанъёссэс озьы ик веразы Алексей Пономарёв, Альберт Разин, Елена Петрова (Дарали Лели), Михаил Атаманов, Валентин Кельмаков, Владимир Владыкин, Алексей Шкляев, Сергей Касаткин но мукетъёс.

Малпанъёс ваче шуккиськизы вуоно центрлэн нимыз пумысен — тросэз лыдъяло, со одно «Айкай» нимаськыны кулэ шуыса, угось та юртын ик интыяськоз фольклор кырӟанъя театр, со шаермы понна кемалась тодмо луэм нимтул (бренд) ни, нош куд-огезлы со уг кельшы — «айкай», пе, бигер кылысь асэстэм кыл… Оло, В. Владыкин ӵектэмъя, Удмурт куа нимано? Яке эшшо кызьы ке? Огкылын вераса, та пумысен пыр-почгес малпаськоно на, угось нимызъя данэз но луэ, соин ик эшшо тросгес калыклэсь юалляськоно, ӵектӥзы кылзонъёсы пыриськемъёс.

Соин ик кинлэн ке вань ке центрез тырмытонъя, сое умоятонъя но ниманъя малпанъёсыз, вералэ сое, газетамы (сайтамы, вотэс бамъёсамы) гожтыса, яке ивортэ «Удмурт Кенеш» огазеяськонэ.

Туннэ нуналлы вуэмын таӵе ӵектонъёс (лыдэ басьтэмын гожтыса вазиськонъёс но, кылзонъёс дыръя шараям мылкыдъёс но):

— В. Короленколы синпелет (памятник).

— Концерт учкон зал.

— Сцена.

— Репетициос ортчытъян зал.

— Подиум.

— Галерея.

— Пичи ужрадъёс ортчытъян инты.

— Покчи артистъёслы студия.

— Крезьгур гожъянъя (звукозаписья) студия.

— Калык киужъёсъя мастерскойёс.

— Удмурт ужрадъёсъя  (проектъёсъя) штаб.

— Туризмъя бюро.

— Удмурт кылэз дышетонъя ялан ужась курсъёс.

— Удмуртлыкен герӟась-кем кружокъёс.

— Калык амалъёсын эмъяськонъя центр.

— Асьме шаерын будӥсь писпуосын, сяськаосын арама.

— Куно пумитан интыос.

— Удмурт сиёнэн кафе.

— Туала искусстволы сӥзем сэрег.

— Информационной технологиосъя центр.

— Берыктон ужен выронъя центр.

— Синпель кузьымъёсын, удмурт литератураен, прессаен киоскъёс.

 

Зинаида Рябинина

Туспуктӥз Леонид Гонин

Удмурт Дунне
By Удмурт Дунне Июнь 16, 2017 15:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*