Туала Туймат батыр

Удмурт Дунне
By Удмурт Дунне Июнь 19, 2017 14:35

Вавож ёросысь «Колос» хозяйствоын ортчем ӵошатсконын вормиз С. Сурчаков.

Вавож ёросысь «Колос» хозяйствоын данъязы Туймат нимо удмурт батырез: гуртоос спортъя вожвылъяськонын кужымзэс эскеризы, Удмурт шаер но культура сярысь юанъёслы валэктон сётъязы. 

Та ужрадэз ортчытӥсьёс но радъясьёс пӧлысь одӥгез — «Колос» эштосысь социальной ужпумъёс понна кыл кутӥсь, «Удмурт Кенеш» огазеяськонлэн ёросысь ёзэныз кивалтӥсь Геннадий Шубин. Со ик тупен-тупен валэктӥз, кин со Туймат батыр. Та батыр сярысь мадёсъёс вылэ пыкиськыса, гожтэмын Михаил Коноваловлэн «Гаян» романэз но. Гаянлэн прототипез Туймат — со, пе, водӟи пи (Водӟи черкогурт «Колос» возёсэ пыре), Пугачёвлэн войскояз удмуртъёслэн отрядэнызы кивалтэм. Емельян Пугачёв войскоеныз малпа вылэм Осаысь Казане Малмыж пыр мыныны, нош собере малпанзэ воштэм, Водӟи, Чудӟалуд пыртӥ ортчем. Пугачёвлэн кельтэм пытьыосыз Вавож палан туннэ но возисько на. Тросэз тодо «пугачёвские валы» интыез — утиськон сооружениослэсь бервылъёссэс. Чудӟалудын верало: кин 13 лудкечез улэпкын кутоз, со Пугачёвлэсь зарнизэ шедьтоз.

Историез тодон, удмурт батырез данъян вылысь «Колос» эштосын ужасьёс понна малпазы удмурт ӵошатскон ортчытыны. Вожвылъяськонэ пыриськизы гурт хозяйствоосын тыршись удмуртъёс гинэ. Воргоронъёсын артэ ас быгатонлыкъёссэс эскеризы нылкышноос. Соос вожвылъяськизы Чачабей (озьы нимаськиз Гаянлэн туганэз) ним басьтон понна.

Дӥсьтӥсь воргоронъёс пӧлын вал Бияысь батыръёс: токарь Сергей Батуев, лэсьтӥськись Василий Зайцев, механизатор Сергей Сурчаков, Валодор-Юсьысь батыр — механизатор Денис Гущин, Мӧнья батыр — механизатор Максим Кузнецов, Сиктан  батыр — механизатор Анатолий Шмаков, Водӟи батыр — механизатор Сергей Протопопов. Ваньзы соос ыбылӥськизы, вал кыткизы но юскизы, трактор питранэз погыллязы, пуклё лэзьязы, юрттӥсьёсынызы ӵош визьсынанэ пыриськизы.

Нылкышноос карнанэн ву нуллӥзы, бирды вуризы, керттӥськизы, мунё бинязы, галстук керттыны быгатэмзэс возьматӥзы, удмурт дӥськутэн сцена вылтӥ ветлӥзы. Татын ӵошатскизы кунян сюдӥсьёс Елена Батуева но Людмила Годяева, скал кыскисьёс Ольга Кадесникова, Ирина Григорьева, Елена Чиркова, Любовь Радыгина но бригадир Татьяна Трефилова.

Вань эскеронъёс пыртӥ потыса, Туймат батыр кадь кужмо луиз Сергей Сурчаков. Нылкышноослэн ӵошатсконазы котькинлэсь сэзь луэмзэ возьматӥз Татьяна Трефилова. «Колос» эштос вормисьёслы кузьмаз бензопила но микроволновка. Со сяна, ужрадэ вань пыриськемъёс коньдон кузьым басьтӥзы, нош удмурт батырлы С. Сурчаковлы нимысьтыз кубок сётӥзы на. Солэн вылаз «Удмурт батырлы Туйматлы (Гаянлы) сӥзем нырысетӥ ӵошатсконъёсын вормисьлы» гожтэмын. Таӵе ужрадэз эштосын азьланяз но ортчытъяны малпало.

Валентина Богатырева

 

 

 

Удмурт Дунне
By Удмурт Дунне Июнь 19, 2017 14:35