Секыт висись нылпиосты Ижысь «Нейрон» хосписын утялто

Удмурт Дунне
By Удмурт Дунне Июнь 19, 2017 09:41

«Нейронын», хоспис сяна, интыяськемын нылпи юрт.

Соослы 10 койка чакламын. Нош кулэяське ог 300 пинал.

Кулонэн нюръяськись 18 аресозь пиналъёсты Ижын нимысьтыз утялто 1997-тӥ арысен. Соку усьтӥськиз хоспис — Россиын нырысетӥез. Соин 10 ар ӵоже быгатыса кивалтэ Сергей Тетерин.

Врачъёс хосписэ направление сётыку, уноез анай-атайёс шуэрско, пиналзэс кулыны келязы кожаса. Бератаз валало: хоспис юрттэ выль сяменф улыны. Сергей Тетерин верамъя, больницаысь врач одӥг малпанэн улэ: йӧнатоно. Нош хосписын мукет ужпум пуктэмын: улонэз капчиятоно. Нылпилэсь гинэ ӧвӧл — семьялэсь но. Секыт висись пинал ачиз гинэ уг курадӟы, вань ӵыжы-выжыоссэ курадӟытэ, шуэ Сергей Тетерин. Озьы арлы быдэ ог 40 пинал хоспис пыр ортче. Ӝыныез сямен — секыт висёнэн вордскемъёс. Тросэзлэн лулсэръёссы сӧриськемын. Ог 7-10 процентэз лек пыктослэсь курадӟо. Хоспис воксё лябӟемъёссэ ас дораз басьтэ. Ӵемысь 3 аресъемъёсты — таосты утялтон анай-атайёслы секытэнгес сётӥське. Анай-атайёслы пиналзэс чакланы, утялтыны лэземын — ӧсъёс котьку усьтэмын. Но интыос хосписын трос ӧвӧл. Тазалыкез утёнъя министрлэн воштӥсез Людмила Гузнищева верамъя, нимысьтыз утялтонлы туннэ шаерысьтымы ог 300 пиналъёс кулэясько. Соос туннэ доразы эмъясько, чидантэм вӧсь луыкузы, хосписэ вуо. Татын нылпиос ог 3 толэзь ӵоже уло.

Хоспислэн ужаменыз тодматскыны вуылӥз Россилэн Президентэз бордын ужась Нылпилэсь правооссэ утёнъя уполномоченной Анна Кузнецова. Югытэсь, яркытэсь палатаостӥ котырскыса, со шуиз: 10 койка тырмыт ӧвӧл, луонлык вань ке, хосписэз паськытатон сярысь сюлмаськоно.

Людмила Гузнищева валэктэмъя, хоспислы нимысьтыз юрт висъян сярысь малпан вань. Али уго хосписэн одӥг липет улын нылпи юрт интыяськемын. Людмила Гузнищева верамъя, матысь дыре хоспис мукет больницалэн юртаз выжоз, отын интыез бадӟымгес. Соку тыэз шокатонъя нимысьтыз аппаратъёсын палата лэсьтозы. Пумиськонэ лыктэм мумы-бубыос Анна Кузнецовалы анайлы сямен но вазиськизы: нылпиоссэс утялтӥсь мумы-бубыослы улон-вылонын юрттэт мед сётӥськысалыз. Анна Кузнецова верамъя, азьланяз та ужпумез вырӟытон сярысь малпаськозы.

Елена Сараматова

Туспуктӥз А. Горбунов

 

Удмурт Дунне
By Удмурт Дунне Июнь 19, 2017 09:41