Николай Павлов. «Батя» улонысь учыр

Удмурт Дунне
By Удмурт Дунне Июнь 17, 2017 17:30

Николай Павлов.

Улонысь учыр

Бакча емышъёсмес утялтэммы бере одӥг арнялы Ижкарын улӥсь пимы доры кунояны мынӥмы. Нуныкайёсмы, нылэн пиен, бордысьтымы уг кошкыло — мӧзмиллям ик, лэся. Милемлы, пу коркан улыны дышемъёслы, кирпичлэсь ӝутэм борддоръёс вискын туж ӝокыт потэ. Куинь нунал из клеткаын улыны чидамы ик. Ульчае потыса, ӟусъёс вылын пукылӥмы, юрт котыртӥзы лёгаськимы, бӧрысь палэнэгес кошкылыны но ӧм кепыралэ ни.

Одӥг пол сюрес дурын кылдэм черод син шорамы йӧтӥз. «Кыӵе ке но дефицит вуз поттӥзы, луоз», — малпай. Милемлы нокыӵе дефицит кулэ ӧвӧл бере, дугдылытэк азьлань вамыштӥмы. Синъёсы лябгес адӟо ке но, ортчыкум чанын шупылляськись чорыгъёсты синйылтыса вуттӥ ик. Кӧня ке вамыш лэсьтэммы бере кузпалылы шуисько:

— Татын ӧжытак сыл ай, нокытчы эн кошкы.

Кузпалылэн ымыз юан пус выллем усьтӥськыса ик кылиз. Мон черод пала дыртӥ. Сылӥсез ог кызё адями, донгаськисез, споръяськисез ӧвӧл.

— О-о, здравствуй, батя! — чан доры лыктыса, ваньмызлы кылымон куараен вазиськи.

Черодын сылӥсьёс йырзэс мон пала берыктӥзы, паймем синъёсын йырысеным пыдозям монэ мертало. Таза мугоро вуз карись, ужзэ кӧнялы ке дугдытыса, боз-боз вазиз:

— Ты что, отец, ослеп? Откуда видишь батю, здесь одни женщины стоят.

Кыл вератэк, чанын шупылляськись чилясь карпез, шакастӥз кутыса, поттӥ но, ваньмызлы адӟымон вылысь чупаны кутски.

— Кудняла адӟиськеммы ни, батя, — удмурт кылэ потыса, чорыгеным вераськыны кутски. — Улыса-вылыса адӟиськыны но кылдоз вылэм. Ойдо бертомы, мар татын чанын шупылляськыса улод, мон тонэ асьме тыметамы лэзё. Эркын кӧттырмонад уялод!

— Кыӵе батя, со огшоры чорыг, зеркальной карп, — черодын сылӥсьёс пӧлысь одӥгез удмурт кылын вазиз.

— Кинлы — чорыг, кинлы ке — батя. Чорыг-а со, ӧвӧл-а, нош мон понна со Карп. Мынам атае Карп, озьыен, мон солэн пиез. Уд оскиське? Тани учке, — пиджак кисыысьтым паспортме поттыса возьматӥсько, — тӧдьы бумага вылэ сьӧд букваосын атай нимы гожтэмын: Кар-по-вич.

Уноезлэсь монэным соглаш луэмзэс валаса, чорыгме пакетам понӥ. Одӥг-кык вамыш лэсьтыны вуттӥ гинэ — вуз карисьлэн куараез дугдытӥз:

— Ты куда с рыбой? А рассчитаться?  А ну, вернись!

— Атае мынам уг вузаськы, мон сое утьыса возьыны кулэ!

Валаз меда удмурт кылын верамме вуз карись, ӧйтӧд. Сылӥсько чорыгеным возьмаса: мар-о луоз азьланяз.

— Да эн мерскы со борды, мед нуоз «батязэ» аслаз тыметаз, — черодысь куара кылӥськиз.

— Конечно, мед нуоз. Дунзэ чорыгезлэсь ми берыктомы. Озьы-а, эшъёс? — мукетыз куара будэтӥз.

Вуз карисьлэсь шорам киыныз шоналтэмзэ адӟыса, вамышъёсме будэтӥ. Номыр куаретытэк, кузпалме бур киыным кунултӥ но, 180 градуслы берыктӥськыса, пимылэн улонниез пала вамыштӥмы. Пыреммы бере нуныкайёсмы пумитамы бызьыса лыктӥзы. Пичиез, киысьтым пакетме адӟыса, юаз:

— Деда, май-о басьтӥд?

Со куспын бадӟымез киысьтым пакетме басьтыса учкиз. Отысь чилясь сьӧмо чорыгез адӟыса, шумпотэменыз корка тыр кеськиз:

— Деда чойыг кутэм! Уйа! Маин-о кутӥд, деда? Учке ай, уеп, быжыныз выетэ.

— Туннэ чойыг сиёмы, оветь? — пичиез будэтӥз.

Мон кыкназэс ик бордам ӟыгыртӥ но, йыръёссэс маялляса, верасько:

— Асьмеос сое ум сие, нуныосы, бадӟым но мур вуэ лэзёмы. Мед уялоз отын. Нош али, ваннамес вуэн тырмытыса, отчы лэзёмы.

Эркынэз шӧдыса, чорыгмы вуын быжыныз сэзъялтӥськиз но, чуак  ванна борды нырыныз донгиськыса, дугдӥз. Собере, марзэ-созэ валаса, лэся, горд бурдъёсыныз полысаса, дыртытэк гинэ мыдлань-азьлань уяз. Вулы шумпотэменыз, бӧрысь шупылляськыны кутскиз, ваннаысь ву борддоре, пиналъёс вылэ пазяське. Чорыген ӵош соос но шумпото.

— Деда, учкы, уя, быжыныз, буйдъёсыныз полыса! Кыӵе чебей уя. Будӥ ке, мон но со кадь ик уяны дышо. Озьы ведь, деда?

— Мон но, — будэтӥз пичиез.

— Одно ик дышоды, пичиосы. Гужем дорамы лыктӥды ке, кыктэс ик дышето. Чорыгмы кадь ик уялоды!

— Уйа-а! Уйа-а! — шумпотэменызы ӵошенназы ик тэтчаса кесясько.

— Чорыгмы ваннаямы кема улыны уз быгаты — кулоз, — мылкыдзэс сӧронтэм вылысь либытак валэктыны вырисько. — Солы чылкыт бызись вуэн тымет кулэ. Отын ассэ эркын шӧдоз: уялоз, шупылляськоз. Ӵуказе мон сое гуртысьтымы тыметэ нуо, нош тӥ, дорамы бертылыкуды, чорыгенымы адӟиськылоды, жомбылляськемзэ учкоды.

Нуныкайёсы ӝожомыса нырзэс ошизы, но ӧжытак буйгатскемзы бере монэным соглаш луизы. Ӝытсэ кӧлыны мырдэм выдтӥмы. Асьсэлэн синъёссы кынисько ни, нош ванна дорысь ишкалтыны нокызьы уг луы. Жуммем пиналъёсты атайзы оген-оген љутыса кӧлон интыязы нуиз.

Ӵукна улонниысь ваньмы ӵош потӥмы: бадӟымъёсыз — ужан доразы, пичиосыз — садике, нош ми кузпалыным чорыгенымы — автобусэ, дор паламы. Ведраысьтымы вузэ вошъяса, чорыгмес улэпкын вуттӥмы. Дорамы пыратэк, пырак тымет доры мынӥмы. Чорыгме-батяме, кӧня ке пол чупаса, отчы лэзимы. Вулэсь чылкытсэ эскерыса яке мур вуэ шедемезлы оскытэк, чорыгмы вырӟылытэк кыллиз. «Оло, кулэм?» — озьы малпаса, ярдурын лошъяськись ньӧрез басьтӥ но бордаз йӧтскыны мылкыдай. Сузьтӥськыса ӧй вутты — чорыге быжыныз шонтӥз но ыбиськыса кадь вуэ зымиз. Потэмзэ возьмаса, огшап ярдурын пукимы, но чорыгмы ӧз ни адӟиськы.

Нуныкайёсы бертылыку, одно тыметмы доры ветлылӥмы, ярдурын ке-ма пукылӥмы, шумпотыса тэтчась чорыгъёс шоры учкылӥмы. Яркыт пиштӥсь шунды шорын пичиосыз но, бадӟымъёсыз но азвесен чилектыло. Пӧлазы милямез но, оло, тэтчаз. Бадӟымез чорыг, вуысь потыса, выллань ӝутске ке, нуныкайёсы тэтчыса ик кесько: «Милямез!» Мон соосын соглаш: со — Батя.

 

Удмурт Дунне
By Удмурт Дунне Июнь 17, 2017 17:30