Можга ёросысь Бадӟым Уча гуртысь чемпионъёс

Удмурт Дунне
By Удмурт Дунне Июнь 5, 2017 10:25

Шаерысьтымы нылпиос пӧлын алигес радъяськиз Удмуртилэн Тӧроезлэн кубокез понна волейболэн ӵошатскон. Можга ёросысь Бадӟым Уча гуртысь 11-тӥ классын дышетскисьёслэн командазы 3-тӥ инты басьтӥз. Но гуртооссы понна соос кемалась ни чемпионъёс.

Можга ёросысь Бадӟым Учаысь выпускникъёс котыр ласянь адӟем карымонэсь.

— Тӥ Бадӟым Учаын ортчем вань ужрадъёсты радъянэз асьтэ вылэ басьтӥськоды. Тӥ кутскон сётӥды, калыкез поттӥды «Вунонтэм полк» акцие. Тӥ котькудды адӟем карымонэсь эктонын, кырӟанын, спортын. Тӥ ваньды мон понна чемпионъёс, — выпускникъёс понна берпуметӥ гырлы шуккиськыку, шуиз классэн кивалтӥсьсы Надежда Санникова.

Зэмен ик, туала выпускникъёслы синмаськоно. Ваньзы ӝужытэсь, чебересь, тазаесь. 22 выпускник пӧлысь ӝыныез сямен волейболэн шудэ. Командаен соос быдэс Приволжск федерал округез котыртӥзы, Москвае, Архангельске вуттӥськизы.

— Тазэ командаез мон 2-тӥ классын дыръязы бичай, — вера пиналъёслэн тренерзы Олег Санников. — Пичи дыръязы соос нырысь учкисьёс радын пукизы, отӥяз асьсэос но спортэ кыстӥськизы. 9-тӥ классысен ик уноез 6 метрлэсь кыдёке тэтчаллязы, 70 метрлэсь кыдёке граната лэзьяллязы. Футбол, хоккей, шахмат — котькытын универсалъёс. Тужгес зол асьсэды возьматӥзы волейболын. Анай-атайёссы дурбасьтэмен но, сомында вормонъёсмы. Котьку сюрес вылэ потыны юрттэ «Россия» хозяйствомы. Выпускникъёсын люкиськиськомы шуыса, кӧня ке ӝож. Но улон интыяз уг сылы —  соослы воштӥсьёс дасяськомы. Али 6-тӥ классын дышетскисьёс асьсэды умой возьмато.

Туэ Удмуртиын  нырысьсэ ортчиз юнифайд-волейбол. Та вожвылъяськонын одӥг командаын шудо таза но инвалид пиналъёс. Озьы Бадӟым Учаысь коррекционной школаысь пиналъёсын туала выпускникъёс команда кылдытӥзы, 6 командаен вожмаськизы но шаерамы устоосыз луизы. Соос Архангельскын Россиысь кужмоосыз командаос пӧлын ӵошатскизы. Шудӥзы дуннеысь чемпионъёсын — Лос-Анджелесысь вормонэн бертэм командаен. Но удалтон но, опыт но ӧзгес тырмы — 1:3 лыдын келязы, туй медален кылизы. Табере бадӟым учаосты 28-тӥ сентябре Йошкар-Олае Россилэн первенствояз отборе ӧтизы. Олег Санников верамъя, соку быръёзы Дубайын ортчоно дуннеысь чемпионатэ мыныны команда.

— Тренермылы милемыз люкамез но волейболлы яратон пыӵатэмез понна тау, — шуэ выпускник Александр Курбатов. — Ми шоры учкыса, пичиос но спортэн эшъяськыны выро. Уноез ми пӧлысь Казане но Ижысь техникая университетэ пырыны дасяське. Кин ке спортфакез быръе, тренер, спортсмен луэмез потэ. Мон веб-разработчик луыны малпасько. Зэм, волейболэз уг кушты. Но  гуртэ адӟиськыны сяна уг берта ни — классысь ваньмы сямен улонмес палэнын радъяны малпаськомы. Выльзэ тодэм, адӟем потэ.

Нылпиосын, гуртэн, школаен матэгес тодматскыны, пиналъёсты ӟечкыланы 25-тӥ мае вуылӥз Удмуртилэн Тӧроезлэсь ужзэ быдэсъясь Александр Бречалов.

Котьма ке но школалэн директорез Наталия Борисова оске, тросэз гуртэ берытскозы шуыса. Дуннеез адӟозы, ваньмаз гуртъёсын таӵе умой уг уло шуыса, валалозы. Татын уго крезьгуръя но, спортъя но школаос вань, ужан инты сюре. Школа, нылпи сад умой. Колхозысь специалистъёс но дышетӥсьёс пӧлысь ог 70-80 процентэз — со милям пиналъёсмы, шуэ.

Нылпиосын, гуртэн, школаен матэгес тодматскыны, пиналъёсты ӟечкыланы 25-тӥ мае вуылӥз Удмуртилэн Тӧроезлэсь ужзэ быдэсъясь Александр Бречалов. Ваньзэ лэсьтыны тыршомы, гуртады берытскемды мед потоз шуыса, оскытӥз со. Кылсярысь, туэ 1-тӥ сентябрьлы чакламын школаысь актовой залэз выльдыны.

Нош али Бадӟым Учаысь волейболэн шудонъя команда Казане дасяське. Татын 2-тӥ-4-тӥ июне ортчоз дуннеысь волейболистъёслэн кубок понна нюръяськонзы. Россиысь сборной шудоз Болгариысь но Франициысь командаосын. Соослэсь шудэмзэс адӟыны сертификат сётӥз Тӧролэсь ужзэ быдэсъясь. Тренеръёсын, спортсменъёсын вераськеммы потэ, шуо пиос.

Елена Сараматова

Туспуктӥз Эдуард Карипов

Удмурт Дунне
By Удмурт Дунне Июнь 5, 2017 10:25