«Меми дор сяськаос» конкурс гужем пумозь кыстӥськоз

Удмурт Дунне
By Удмурт Дунне Июнь 30, 2017 13:45

Трофимова Маргарита Евстафьевна, Сьӧлта ёрос, Югдон гурт.

«Удмурт нылкышно кенеш» май толэзе сяськаослы сӥзем фото но видео Интернет-конкурс ялӥз вал. Ӵошатсконзы куарусёнозь кыстӥськоз.

— Конкурслы кичӧлтӥсь луиз Ува ёросысь ёзчимы, адӟем карымон нылкышно Валентина Яковлева, — шуэ «Удмурт нылкышно кенешлэн» кивалтӥсез Надежда Степанова. —  Со вераз, та конкурсэз ёросазы ортчытыны чаклало шуыса, ми малпамы со борды кыскыны шаерысьтымы удмурт нылкышноосты. Та вожвылъяськон «Меми дор сяськаос» фестивальлэн одӥгез люкетэз луэ. Сое ортчытон улсын ми кӧня ке ужпумъёсты быдэстыны чакласьком. Туэ ар  экологилы сӥземын шуыса калыклы тодэ вайытӥськом. Тани Ува ёросын ик Петропавлово гуртын  семинар ортчытӥм. Отчы пыриськизы Сьӧлта, Сюмси, Можга, Вавож ёросъёс. Вераськимы удмурт кылэз но инкуазез утён сярысь, удмурт кылын сяська нимъёсты тодэ вайытӥм. Али тросэз соос вунэмын ини. Соин та ужрад удмур кылэз азинтон выллем но луэ. Азьланяз та выллем семинаръёс доразы ортчытыны чаклало сьӧлтаос но сюмсиос.

Интернет-конкурсамы куриськом нылкышноосты асьсэлэн будэтэм гераньёссы вӧзын туспуксьыны удмурт дӥськутэн. Но малы одно герань? Чакламы, гуртысь удмурт кышномуртъёс та сяськаез яратыса будэто. Озьы ик конкурсэ ӧтиськом пыриськыны нылпиосын валче, озьы пиналъёслы чеберлыкез пыӵатыны выриськом кадь. Вань та ужрадъёсынымы вераны тыршиськом, сяська будэтонэ но удмурт шӧм пыӵатыны луэ шуыса.

Ужъёс дунъямын луозы 4 ӧръёсъя:

— меми дор сяська — кышномуртлы гераньёсыз вӧзын туспуксёно, вордӥськем яке бызем гуртысьтыз дэрем дӥсяса;

— анайлэн сяськаосыз — туспуктоно дорын будэтэм сяськаос вӧзын удмурт дӥсен огназэ нылпиез яке анаеныз валче;

— удмурт сяська тырон — туспуктоно ас киыныды лэсьтэм удмурт шӧмо кашпоез;

— паймымон сяська — видео пыр верано дорады аспӧртэмлыко будӥсь сяськады сярысь, соя учкисьёс мед валалозы, кызьы сое будэтоно, утялтоно.

Ужъёсты 15-тӥ сентябрёзь келяно «Удмурт нылкышно кенешлэн» «ВКонтакте» вотэс бамаз. Собере усьтэмын луоз куара сётон, кельшымон туспуктэмъёсын ужъёсты быръёзы огшры адямиос. Конкурсын вормисьёсты «Удмурт нылкышно кенеш» чакла ӧтьыны «Табань» клубаз. Ваньмыз вожвылъяськонэ пыриськемъёс пусъемын луозы таукаронъёсын.

Ангелина Снигирёва

 

Удмурт Дунне
By Удмурт Дунне Июнь 30, 2017 13:45