Малы 9-тӥ классэз йылпумъясь 30 пиналъёс ӟуч кылъя ОГЭ-ез выльысен гожтозы?

Удмурт Дунне
By Удмурт Дунне Июнь 19, 2017 15:40

Йырыд бордад ӧвӧл ке, компьютерлы гинэ оскиськыны уг яра вылэм.

Элькунысьтымы 9-тӥ классэз йылпумъясь 30 пиналъёс ӟуч кылъя ОГЭ 2 пол гожтоно луозы. Та понна янгыш… экзамен радъясьёс.

Ижысь 31-тӥ школаын экзамен сётон нуналэ нырысь ваньмыз кызьы кулэ озьы вал. Нылпиос 4 час ӵоже быдэстӥзы заданиосты, яратон сярысь изложение гожтӥзы. Но экзаменысь потэмзы бере юанъёссы кылдылыны кутскизы. Тодӥзы угось: мукет школаосын изложение чылкак мукет темая гожтӥллям…

Малы озьы луиз? Дышетонъя но наукая министерство валэктон сётӥз ни. Экзаменэз радъясьёс изложенилы 2015-тӥ арысь текстэз басьтӥллям — со малы ке но компьютере кельтэмын вылэм. Нош туала текст кылем флешкае ик.

— Ми котькуд кенешонын алӥськом: эскере компьютеръёстэс, флеш-носительёстэс, отын номыр мултэсэз луыны кулэ ӧвӧл, — шуиз министерствоысь огъя тодон-валан сётонъя ёзэн кивалтӥсь Лариса Пластинина. — Мыдлань ужамъёслэсь кылзэс юалом. Но жаляса верано, нылпиос экзамен выльысь гожтоно луозы — резервлы чаклам нуналэ, 20-тӥ июне. Угось янгышен быдэстэм заданиосты федерал центр лыдэ уз басьты.

Таӵе югдурен соглаш кариськемзы уг поты анай-атайёслэн. Нылпиоссэс жаляло: малы, пе, соос 2 пол одӥг экзаменэз гожтыны кулэ? Озьы огкылысь кариськыса, гожтэт ыстӥзы элькунысьтымы Нылпилэсь правооссэ утёнъя уполномоченнойлы но Прокуратурае.

Шӧкыч уром

Суредаз Владимир Ижболдин

 

 

Удмурт Дунне
By Удмурт Дунне Июнь 19, 2017 15:40