Лэсьтом Удмуртиын!

Удмурт Дунне
By Удмурт Дунне Июнь 2, 2017 09:54

«Лэсьтэмын Удмуртиын» форуме 1 сюрс 200 ужбергатӥсьёс вуизы

Кылем арня вискын элькунамы «Лэсьтэмын Удмуртиын» форум ортчиз.

Нырысь чакламъя ужрадэ ог 600 ужбергатӥсьёс пыриськыны кулэ вал, бӧрысьгес тодмо луиз: сюрс палаез курисько. Нош форумез усьтыку, ялӥзы: 1 сюрс 200 пала люкаськизы! Бадӟым люкетэз — элькунысьтымы пичи но шор ужбергатонэн вырисьёс. Пӧлазы туж трос туала улонлэсь шокамзэ шӧдӥсь, воштӥськонъёслы дась луись егитъёс. 25-тӥ-26-тӥ мае соос мыло-кыдо пыриськизы пӧртэм ужрадъёсы — сессиосы, котрес ӝӧк сьӧрын пумиськонъёсы, презентациосы, мастер-классъёсы. Залын инты тырмымтэ дыръя ӧс азьын но, укно дурын но сылӥзы — кошкыны ӧз дыртэ. Угось ваньмыз сокем тунсыко, пайдаё вал. Соосын ӵош ужбергатонэз азинтон ужпумъёсты пӧртэм площадкаосын сэрттӥзы-пертчизы Россиысь тодмо спикеръёс, модераторъёс, кылсярысь, Россиысь Президентлэн советникез Герман Клименко, Россиысь Экспортъя центрлэн кивалтӥсез Пётр Фрадков, Россиысь тодмо бизнесмен, Splat компаниез кылдытӥсь Евгений Дёмин, Россиысь Стратегической инициативаосъя агентстволэн ПФО-я ёзэныз кивалтћсь Сергей Бочаров, Москваысь управлениея «Сколково» школалэн президентэз Андрей Шаронов, куд-ог банкъёслэн кивалтӥсьёссы но мукетъёсыз.

Удмуртилэн Тӧроезлэсь ужзэ быдэсъясь Александр Бречалов мур оскемзэ вераз: форумлэн емышъёсыз матысь дыре ик шӧдӥськыны кутскозы. Табере данъяськом соин, мар лэсьтэмын ни Удмуртиын.

Александр Бречалов вакчияк мадиз, мар каремын Удмуртиын та форумез ортчытон азьын.

— 26-тӥ апреле элькунысь ужбергатӥсьёсын ми вераським: бизнесэз азинтонъя карта лэсьтом. Берло дыре мон пумиськи туж трос ужбергатӥсьёсын, котькуд кенешон бере гожтыса кельтэмын протоколъёс, соос быдэсъяськыны кутскизы ни.

Пичи но шор ужбергатонэн вырисьёс пӧлын юалляськонъёс ортчытэмын, тодмо луиз: пӧлысьтызы ог 60 процентэз кунлэсь нокыӵе юрттэт ӧз басьтылэ, 80 процентэз дась луэмзэ вера ужзэ паськытатыны, элькунмылэн палэназ но потыны. Ӵапак тае лыдэ басьтыса, быръемын вал «Лэсьтэмын Удмуртиын» форумын эскероно ужпумъёс.

Россиысь Экспортъя центрлэн кивалтӥсез Пётр Фрадков пусйиз:

— «Лэсьтэмын Удмуртиын» бренд «Лэсьтэмын Россиын» бренд кадь ик кужмо луэ, татын но пӧртэм пумо вузъёс поттӥськоды, татын кылдытэмын экспортъя улос центр, кивалтӥсьёс валало, вузъёсты палэнэ но поттоно шуыса. Россиысь Экспортъя центр дась Удмуртиен уртче ужаны.

Шаермылэсь бадӟым луонлыкъёссэ озьы ик пусйизы Герман Клименко, Евгений Дёмин но мукетъёсыз. Возьматэмын вал вакчияк фильм. Дуннеысь пӧртэм интыосысь ужбергатӥсьёс удмурт кылын вазиськизы: «Ӟечбур, Удмуртия!», Россиысь уж-бергатӥсьёслэн нуналэнызы ӟечкылазы.

Александр Бречалов валэктӥз: ваньзы соос Удмурт шаерысь потэмын, али палэнын ужбергатонэн выро. Ӵектӥз:

— Ужбергатӥсьёслы сӥзем вань ужрадъёсты та фильмен мытоно, нош удмурт кылын вазиськись ужбергатӥсьёс, оскисько, арысь аре тросгес луозы!

Элина Кумачёва

 

 

 

Удмурт Дунне
By Удмурт Дунне Июнь 2, 2017 09:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*