Кубыз дунне тыр мед чузъяськоз

«Дукес» фолк-группалэн крезьгур бичетэз потӥз. Бичетэ пыремын вашкала удмурт кырӟанъёс, кубызэн инструментал но 1 видео-арт.

— Кыӵе крезьгурчилэн аслэсьтыз альбомзэ поттэмез уг поты? Со ук ужамлэн-тыршемлэн кисьмам емышез, озьы ик, кызьы суредасьлэн ужезлэн емышез — адӟытон, — вера Чудья Жени. — Вылаз ик, солы студиын куара гожтон, крезьгурен ужан мон понна — выль тунсыко уж, солы мынам дышетскыны мылкыды вань. Мон малпасько, дуннеын тужгес умой крезьгур — со вашкала удмурт гуръёс. Мынам со борды йӧтскеме потӥз. Мыным кельше кубыз, сое калыке вӧлмытыны ӧдъяй. Кубызэн шудӥсьёс ӧжыт, нош мынам потэ, солэсь куаразэ тросгес калык мед кылоз шуыса. Кубыз куара ик альбоммес мукет калык крезьгур альбомъёслэсь висъя. Азьланяз малпасько пӧртэм жанръёсын ужаны, озьыен, та альбом мукет проектъёсылы инъет луоз. Кылсярысь, post-dukes электронной крезьгурелы.

* * *

«Дукес» группае пыро Чудья Жени, Таня Тихонова но Лиля Леонтьева. Та альбом — группалэн нырысетӥ бичетэз.

Виктория Крамова