Кисьмалоз-а ю-нянь? Урод гужем нош ик шукке гуртоосты

Удмурт Дунне
By Удмурт Дунне Июнь 19, 2017 15:10

Приволжск федерал округын кизем кидыслэн ӟечлыкезъя Удмуртия берпуметӥ интыосын. Асьмелэн 87 процентэз гинэ кидысмы ӟеч вал. Мае возьмано гужемлэсь?

Лымшор ёросъёсын пудо сиён дасяны кутскизы.

Кзс ас понназ уг ужа

Тол улэ кизем чабей туэ ваньмыз сямен быриз, њег гинэ чидаз. Али 325 сюрс гектар бусыосын ӝужа ю-нянь. Кизёнзэс нырысь ик йылпумъязы Алнаш, Вавож, Каракулино, Кизнер но Можга ёросъёс. Бусыоссэс оглом 1 сюрс 200 гектарлы паськытатыны пӧрмытӥзы Каракулино, Кияса, Можга но Шаркан палъёсын. Со дыре ик Камбаркаын 100 гектарлы кулэстӥзы. Гурт удысъя но сиён-юонъя министерствоысь музъем кусыпъёсъя но будосъёсъя ёзэн кивалтӥсь Алевтина Бурдина верамъя, чылкыт ӟеч кидыс кизизы Вавож но Алнаш ёросъёс гинэ. Дэри, Можга, Грак но Ува ёросъёсын 90 процентэз кидыссы умой вал. Нош Сьӧлта но Красногорск палан — 55-66 процентэз. Котьма ке но оглом таӵе умой дасяськыны 2011-тӥ арын гинэ кылдылӥз.

— Сьӧлталан но Красногорскын кидыс бордын ужаны луонлыксы ӧй вал, — вера Алевтина Михайловна. — Тысь куасьтон но шертон комплексъёссы лябесь. Со сяна, КЗС-лэн операторез бордысь но кидыслэн ӟечлыкез потэ на. Ас вакытаз кидыс дасянъя азьпалан вал Красногорск. Специалистъёссы пенсие кошкизы, нош выльёсыз ӧз выжыяське — уждунъёс сопалан пичиесь уго. Кин ке шуоз: секыт шат КЗС-ын ужаны? Секыт. Кылем арын, кылсярысь, куазь кӧс вал ке но, уноез кидысэз мултэс куасьтыны шедьтӥзы, кытын но отын сутӥзы.

Гурт удысъя но сиён-юонъя министерство июль толэзе операторъёсты дышетонъя курсъёс радъяны малпа. Озьы уйпал ёросъёсысь операторъёс тодон-валанзэс муромытозы Глазов ёросысь «Коммунар» хозяйствоын, нош лымшоръёс — Гракысь «Родинаын». Ваньмыз со радъяськоз дунтэк. Азьвыл сыӵе дышетонъёс ортчытъялляло вал. Но берло дыре  сыӵе луонлык ӧз кылдылы.

— Кидыслэн ӟечлыкез бусыысен ик адске ни, — шуэ Алевтина Бурдина. — Урод ӝужам, жаг пӧлы выем ю-няньысь умой кидыс уд басьты. Со сяна, бусыын но, КЗС-ын но пӧртэм культураосты сурало. Чабей бусыысь сезьы я йыды бусые выжон азьын механизаторъёслэн сеялкаоссэс, комбайнъёссэс, грузовой машинаоссэс умой тазатыны мылкыдзы уг тырмы.

Шаерамы тысь куасьтон но шертон комплексъёс пӧлысь уноез 1970-тӥ-1980-тӥ аръёсы ӝутэмын ай. Кылсярысь, 2015-тӥ арын 430 КЗС пӧлысь 342-ез гинэ ужась вал. Выльдӥськон начар мынэ. Алевтина Бурдина верамъя, берло дыре Грак ёросысь «Родина», Можгалась «Родина», Глазовысь «Коммунар», Вавожысь «Колос» выль комплексъёс пуктӥзы ик, мукетъёсызлэн луонлыксы ӧвӧл. Кун ласянь юрттэт висъяськысал ке, каньылэн шокчысалзы. Шаерысьтымы кидыс дасянъя 42 элитной хозяйствоослы ик КЗС басьтонлы висъям коньдонлэсь 20 процентсэ берыктон понна ог 200 сюрс манет кулэ. Нош асьмелэн техникалы висъяськись субсидилэн огъя быдӟалаез ог 154 миллион манет, со пӧлысь уноез чакламын трактор, комбайн, сеялка басьтыны.

Кӧня понод, сомында басьтод

Вуоно арысен Россиысь Гурт удысъя министерство гуртоос азе курон пуктыны чакла: котькуд гектаре 7 килограммлэсь ичи удобрение понћд ке, субсидия уд басьты.

— Азьвыл министерствоын шуо вал: удобрение гектарлы быдэ 30 килограмм уг люкаськы бере, мар тӥледлы юрттонэз? — вера Алевтина Бурдина. — Собере лыдпусэз 20 килограммозь васькытӥзы, табере 7 килограмм кылиз. Ньӧмыз понна гинэ со, адямиос воксё удобренитэк медаз ужалэ шуыса. Та курон но ляб хозяйствоос понна шуккет луыны быгатоз — субсидитэк кылёзы. Шаерысьтымы хозяйствоослы висъяськись субсидилэн огъя быдӟалаез 305 миллион манет, со пӧлысь 105-ез — республикалэн бюджетысьтыз.

Жаляса пусъёно, шаерамы 7 килограммлэсь ичи удобрение басьтэмъёс туэ но вань. Кизнер, Яр ёросъёсын быдэн 5,4 килограмм гинэ музъеме понћзы, Красногорскын — 1,2 килограмм. Нош Камбаркаын 6-тӥ арзэ ни одӥг грамм но уг басьто. Камбарка палан 1 гинэ йӧнала хозяйство кылемын на, милемлы удобрение кулэ ӧвӧл, шуо. Со дыре ик Вавожын 54,4 килограмм понӥзы, Можгалан — 32, Алнашын — 29.

Жаг ӝужа,турын ӝега

Туэ ыштонъёстэк ужаны ум быгатэ, дыр. Алевтина Бурдина верамъя, куазь зоро улэмен, кизён, 10 нунал интые, 1 толэзь кыстӥськиз. Собере кезьыт улӥз.  Кышкыт вал, кидыс музъемын ик сисьмыны кутскоз, бордаз висёнъёс кырмиськозы шуыса. Куд-ог сыӵе интыос вань уго. Йыды интыен-интыен кынмыны шедиз. Али бусыос вожектэмын ке но, узьым йӧнала уг буды. Ю-нянь кисьмаса ӧз вуы ке, ваньзэ сямен пудо сиёнлы дасяно луоз: турын но силос басьтон уго хозяйство понна дуногес усе фураж басьтон сярысь.

Кылем арын 1-тӥ июне пудо сиён дасяны потӥмы ни вал. Туннэ турын вакчи на — жатка улэ уг сюры. Куазь сётӥз ке, лымшоръёс арня пумын турын дасяны кутскозы ни. Витьыса пукыны но дыр ӧвӧл: пудо кылемын сиёнтэк. Кылем арын дасямез быремын ни. Пудоез сютэм уд возьы шуыса, хозяйствоос скалъёссэс возь вылэ потто, но отын кӧтсы уг тыры. Таин сэрен йӧл кулэсмыны кутскемын, пудо ӟызыя. 9-тӥ июне, кылсярысь, кылем арен ӵошатыса, 248 центнерлы ичигес йӧл кыскемын.

югдур начар турынэн но. Миым шунды шорын трос аръем турынъёслэн выжыоссы сутскизы. Соосты выльысь кизизы, бусыосты 7 сюрс 710 гектарлы паськытатӥзы. Но отысь нырысетӥ араз номыр уд басьты на, шуэ Алевтина Бурдина.

Ялан зоремен, жаг ӝог ӝужа, химиен пазяны луонлык уг шедьы.

Таӵе югдурын бусыосты страховать кар вал. Но 2010-тӥ ар возьматӥз: страховкалы уксёдэ кисьтод, нош возмещение басьтыны уд быгаты.

— Страховой компаниослэн гурт хозяйствоосын выремзы уг поты. Ыштонъёс адӟем хозяйствоослы 2-тӥ арзэ ни кун ласянь но юрттэт уг вуы. Озьыен, хозяйствоос асьсэлы гинэ оскиськыны кулэ, — шуэ Алевтина Бурдина.

Елена Сараматова

Туспуктӥз А. Горбунов

 

Удмурт Дунне
By Удмурт Дунне Июнь 19, 2017 15:10