Карлэн нуналъёсыз ортчозы 10-тӥ-12-тӥ инвожое

Удмурт Дунне
By Удмурт Дунне Июнь 7, 2017 15:20

Карлэн нуналъёсыз ортчозы 10-тӥ-12-тӥ инвожое

Туэ шоркармылэсь нуналзэ, 10-тӥ инвожоысен кутскыса, 12-тӥ инвожоозь пусъёзы. Со сярысь журналистъёслы веразы Ижкар админстрациын.

Иж городлэн йырыз Юрий Тюрин ивортӥз:

— Городлэсь нуналзэ паськытгес пусйыны малпамы. Ижын улӥсь калык тросгес ужрадъёсы пыриськыны мед быгатоз шуыса, 10-тӥ инвожое азбарлэсь нуналзэ пусъём, 11-тӥ инвожое — ёрослэсь нуналзэ, нош 12-тӥ числое — дышем сямъя, Ижкарлэн нуналэзлы сӥзем шулдыръяськон луоз.

10-тӥ инвожое одӥгез тунсыко ужрад — арт-субботник. Городын улӥсьёс суредасьёсын ӵошен коркаослэсь нырысетӥ этажысь борддоръёссэс чеберъяны быгатозы. Удмурт пужыосыз но пуктыны луоз. Нош 12-тӥ инвожое огъя шулдыръяськон Иж тымет дурын радъяськоз. Кутскоз 11 часысен. Тымет вылын яркыт ву экстрим-шоу но трос мукет ужрадъёс ортчозы. Юри ӧтем куноос — Москваысь «Корни» но «Фабрика» группаос.

Та нуналэ ик огвакытэ трос площадкаос ужалозы: Эшъяськон монумент дорын,  Шор площадьын, «Динамо» стадионын — концертъёс,  нылпиослы шудонъёс, спортъя ӵошатсконъёс но трос мукет.

Индустриальной ёрослэн йырыз Любовь Зайцевалэн верамезъя, 12-тӥ инвожое Кызьпу арамын, котькуд аре сямен ик, радъяськоз «Гербер» удмурт шулдыръяськон. Кутскоз 13 часысен. Сям-йылолъя люкаськем калыкез вӧсям ӝукен куноятозы, со 7 сюрс адямилы тырмымон пӧзьтэмын луоз. Туэ аслэсьтыз площадказэ усьтоз филармония. Калыкез шулдыртозы «Италмас» но «Шулдыр ӝыт» ансамбльёс. Озьы ик трос мукет тунсыко площадкаос ужалозы.

Наталия Самсонова

Туспуктӥз А. Горбунов

 

Удмурт Дунне
By Удмурт Дунне Июнь 7, 2017 15:20