Ижкарлэн йырыз Юрий Тюрин: Ӝоген Ижевск Европаысь городлы кельшыны кутскоз

Удмурт Дунне
By Удмурт Дунне Июнь 8, 2017 13:40

Юрий Тюрин.

12-тӥ инвожо Ижын улӥсьёс понна кык полэс праздник луэ — Россилэн нуналаз соос пусъё Городлэсь нуналзэ но. Кыӵе со — туала Ижкар, мар понна луэ сое яратыны, кенешиськом Ижевск городлэн йырыныз Юрий Тюринэн.

— Юрий Александрович, мар вуттӥз тӥледыз Иже? Кӧня дыр кулэ луиз татын асьтэды дорады кадь шӧдон понна?

— Совето вакытъёсы туж ӟеч амал вал — распределение, соин нокытын но  специалистъёслы ӧз ёрмылэ. Институтысь ньылезлы устоосызлы студентъёслы бырйыны луонлык сётӥзы, кыӵе городэ мыныны:  Санкт-Петербург, Орёл, Казань, Ижевск. Отӥосыз  пичигес городъёсы, посёлокъёсы ыстэмын вал. Мон бырйи Ижез, малы ке шуоно со сярысь кылылэме вал ни — кузпалылэн ӵыжы-выжыез татысь. Вылаз ик, соку ик улон инты ӵектӥзы — огъяулонни гинэ ӧвӧл — зэмос квартира! Вал мукетыз но муг — соку Ижевсклэн нимыз тодмо луиз «Ижсталь»  хоккей командая — 1979-тӥ арын со нырысьсэ вылӥ лигае сюриз. Ми эшеным соку ик кимес посыны ӧдъям: табере котькуд матчез учкыны ветлом! (Воргоронъёс монэ валалозы). Нош доре кадь потыны ӧдъяз, дыр, 3 ар ортчыса, угось сомында кулэ вал отработать карыны. Эше берен кошкиз, мон кыли, малы ке шуоно татын мыным ваньмыз яралляз, тужгес но — уже. Нош табере Иж мынам воксё доре кадь ни — кызьы сотэк, татын кыдам, адямие потӥм, татын пиналъёсмы вордскизы…

— Ижкар котьку лыдъяськылӥз заводэн. Нялтас вераса, удмурт пересьёс «город» кыл интые али ке но «завод» кылэз куто: заводын улӥ, заводэ мынӥсько… Мар тӥ понна — завод?

— Мон понна — со мынам улонэ, шуыны луоз. Ноку ӧй жалялля инженерлэсь профессизэ быръемме, заводэ мынэмме. Мыным отын котьку туж кельшылӥз. Али но визь-кенеш юаса ӧтё ке, лобыса сямен мынӥсько. Завод ваньбур поттэ, маке кылдытэ, кызьы сое уд гажа.

— Нялтас вераса, тӥ ведь Удмуртилэн наука но техника удысъя Кун премиезлэн лауреатэз луиськоды. Кыӵе уждэс дунъязы?

— Нимыз туж кузь, соин огшоры кылъёсын валэкто: заводысь  гуръёсын туж бадӟым температура, соос медаз пуштэ шуыса, трубаосты вуэн тырмыто, но соосты ялан сӥятыса возёно. Ми малпам сыӵе  амал, куке ву париськыса потэ но, гумы уг ӟырда…

Заводчиосын сюлмысь вераськон.

— Нош кызьы кыстӥськиды политикае?

— Мон, дыр, котьку отын вал школа, институт дырысен. Котьку вырылӥ общественной ужен. Заводэ пыреме бере нырысетӥ нуналысеныз комсомоллэн комитетэзлэн ёзчиез вал, бӧрысьгес татысь парткомен кивалтӥ. Малы ке мыным огшоры дышетскыны, ужаны гинэ ӧжыт потылӥз, ялан маке ватсаса карем потылӥз. Собере бордаз кыскиз «Ижстальлэн» генеральной директорез Валерий Моисеев — со кема дыр ӵоже депутатын ветлӥз, быръён кампания дыръя юрттӥськыны курылӥз, собере тӥни солэн ужез ас вылам но вуиз.

— Но депутат луон — со одӥг, та уж общественной, шуыны луэ, озьыен, кыл кутонэз ичигес, нош городэн кивалтон —  шӧдскымон секытгес…

— Соиз озьы, но мон  талы дась вал, малы ке шуоно нош ик дышетӥз завод. «Ижстальын» мон техникая директор луыса ужай, мыным оскемын вал та огазеяськонлэн хозяйствоез: «Ижсталь», «Металлург» дворецъёс, нылпи садъёс, поликлиника, Металлургъёслэн городоксы но трос мукет. Выльдӥськон кутскиз но, вань предприятиос аналтӥзы асьсэлэсь ваньбурзэс, азьвыл котькуд заводлэн поликлиникаез, нылпи садъёсыз, шутэтскон юртъёсыз вал ук. Нош «Ижсталь» аслэсьтыз учреждениоссэ  городлы выжтӥз. Со ужен мон выри. Заводын ужакум ай, Москвае Экономикая министерствое но ветлӥ, поликлиникамес тупатъяны коньдон курыса.  Удмуртиысь министерствоын воксё паймизы, кызьы быгатӥ шуыса. Соин ик туала уже, огласянь, кемалась тодмо ни.

Секыт бюджет ласянь гинэ, сое нуйтыны ке луысал…

Арлы быдэ писпу мерттэ.

— Кыӵе удысъёс Ижкар понна валтӥсь луо?

— Ваньмыз, мартэк улыны уг быгаты туала адями: тыл, ву, шуныт, сюресъёс, улон интыез возён, школаос, нылпи садъёс… Дышетон учреждениос ласянь асьмелэн бадӟым азинсконъёсмы вань. Туннэ нуналлы ваньмыз 3 аресъем покчиос нылпи садэ ветло. Туэ «Столичный» микрорайонын пуктӥм 820 интылы школа, куинетӥ этажез ӝутӥське ни Прасовский пролкаысь школа юртлэн. Туэ бюджетысь 100 миллион манет висъямын школаосты тупатъянлы. Та вие 3 школаос борды — 32-тӥ, 70-тӥ, 100-тӥ — ӟеч стадионъёс лэсьтӥсько. Калашниковлэн проспектаз усьтэмын калыккуспо стандартъёсъя лэсьтэм туала спортзал — «Торпедо», табере отын гимнастикая бадӟым ӵошатсконъёс но ортчытъяны луоно. Чакламын нимысьтыз зал усьтыны нюръяськисьёслы (единоборствоосын вырисьёслы).

Благоустройство сярысь ке, али улонэ пыӵа «Формирование современной городской среды» выль проект. Отчы пырисько асьсэос городын улӥсьёс, ӵектонъёсын гинэ ӧвӧл, юртто коньдонэн но, зэмос уженызы но — утялто-тупатъяло азбар котырзэс. Проектэ коньдон быдэн 5 процент мында люкаське собственникъёс но муниципалитет чотын, отӥзэ — бадӟым люкетсэ — висъяло элькун но кун бюджетъёс. Озьы туэ гинэ 65 азбарез но трос этажо 70 улон юртэз тупатъяны чакламын 205 миллион манет тыр. Та проект чотын ик чеберскоз Гогольлэн бульварез.

Иж заводэз кылдытӥсьлы П. Шуваловлы синпелетэз усьтонын.

— Вань-а  тӥляд яратоно интыды?

— Центр. Сьӧрлось куноосы лыкто ке, котьку пыдын ортчиськом набережной кузя, Эшъяськон монумент дортӥ тубиськом Шор площаде, отысь — Арсенал доры, Вормон парке (Ялан ӝуась тыл доры). Туж шулдыр потэ, ӝоген та котыр эшшо чебергес луоз. 1979-тӥ арен ӵошатоно ке, Ижевск туж  зол воштӥськиз. Мон нырысьсэ татчы вуэме бере ӧжыт пайми вал: Ульяновскен ӵошатыса, со мыным город кадь но ќз поты — туж мӧзмыт но пурысь. Но туж кельшиз калыкез: лякытэсь, вазиськисесь, капчиесь. Али Ижевсклы пыӵа ни шоркарлэн тусыз, берло аръёсы кылдӥзы бадӟым чебер объектъёс, шутэтскон интыос, ӝутӥсько  ӝужыт туала юртъёс… Ӝоген  Ижевск Европаысь городлы кельшыны кутскоз.

— Но дорамы куное вуылӥсьёс пусъё: Удмуртилэн шоркараз чик уг шӧдӥськы удмурт шӧм… Со дыре ик трос вераськиськом кун пушкын туризмез азинтон сярысь.

— Со но ваньмыз герӟаськемын ӵап завод улонэн: огшоры ужасьёслы  укыр кулэ ӧй вал калык лулчеберет. Адямиос ужазы но ужазы, но выль дауре пумен  ваньмыз берытско выжыоссы пала, тыршо  кылзэс, культуразэс утьыны, со туж умой. Мон ӧй шуысал, Ижкарлэн удмурт шӧмыз чик ӧвӧл. Берло дыре удмурт кылэз пумитаны луэ ни — со вань вывескаос вылын, куд-ог рекламаосын, ӟечкыланъёсын. Городын ортчыло трос удмурт праздникъёс: Гербер, Виль. Нош Пельменьфест? Со удмуртлыкез азинтон ӧвӧл шат? Бен, со тырмыт ӧвӧл, но пумен та югдур шоры учкон воштӥське. Со понна тау карыны кулэ  мерлыко ужен вырисьёслы.

— Нош Кызьпу арамая кыӵе ке йылпумъянэ вуэмын ни-а? Вераськонъёс ветлӥзы, Калашниковлэсь проспектсэ лэсьтыку, сое музъемен ӵошкатыны быгатозы шуыса…

— Ӧвӧл… Вераськонъёс туж кемалась мыно ни, но «Удмурт Кенешен» огкылэ нокызьы ум вуиське. Тодмо-дано арлыдо удмуртъёс арамаез исатэк кельтыны куро, мукетъёсыз  маке лэсьтыны дэмлало. Но созэ но — город бюджет чотын, пе. Озьы уг луы со, бюджет кошке дышетонлы, тазалыкез утёнлы, благоустройстволы. Парк — со шутэтскон инты, озьыен, ачиз уксё поттыны кулэ, озьы, кызьы тыршо Киров но Горький нимо паркъёс. Город, кылсярысь, лыдъя, та интылэсь 10 процентсэ сётоно спортъя объектъёслы. Огкылын вераса, проект дась ӧвӧл на, сое лэсьтон бордын али тырше Санкт-Петербургысь фирма. Нош проспект арамалы уз люкеты, сюрес паськытатэмын луоз, ульчалэсь мукет палзэ џошкатыса.

— Ӵем-а тӥледды дугдытъяло урамын огшоры адямиос, мар верало?

— Бен, куд-огез тодэ ни, кытӥ мон ӵукнаоссэ пуныеным калгисько, юромо пумитэ пото, но ӧй шуысал, трос курласько-тышкасько — ӵемгес кыӵе ке ӵектонъёс верало. Мон шумпотӥсько, огшоры калык аслэсьтыз дэмланъёссэ вера, кыӵе ке  сюлмаськытӥсь ужпумъёсъя мылкыдъёссэ шарая ке, озьыен, городлэн улонэз солы маке шат ӧвӧл.

— Тодӥськом, тӥляд бадӟым семьяды, дыр шедьтӥськоды-а внукъёсыныды шудыны, тодо-а соос, кин соослэн песятайзы?

— Бен, мынам 4 нылпие: 2 пи, 2 ныл, 4 внукмы ни. Жаляса верано, дыры уг окмы, соос монэ ӵемгес телевизорысь адӟо, дыр.  Туж шумпотӥсько но данъяськисько, пиосы мынам пытьыетӥм мынӥзы шуыса, кыкназы бадӟым заводъёсын валтӥсь директоръёслэн воштӥсьёссы луыса ужало. Одӥгез нылы али нуныеныз пуке, нош кыкетӥез ӵап туннэ ЕГЭ сётэ, журналист луыны малпа! Кузпалы сярысь ке, ми соин студент дыръямы огазеяським ай, Иже ӵошеннамы специалистъёс сямен вуим. Али аслаз предприятиез вань. Нялтас вераса, кыкетӥез кенмы удмурт выжыысь, Дэри ёросысь Шудьялась.

— Юрий Александрович, матысь нуналъёсы асьмеос пусъём  Ижевск городмылэсь нуналзэ.  Мар тӥ понна — праздник: шутэтскон, шумпотон яке 2 полэс секыт ужан нунал? Тани туэ  Удмуртилэн Тӧроезлэсь ужзэ быдэсъясь Александр Бречалов Россилэсь но Иж городлэсь нуналзэс ӵектӥз 3 нунал пусйыны!

— Ижын улӥсьёслы удал-тӥз, малпасько, угось 12-тӥ июне огдыре праздниксэс пусъё Россия но Ижевск — бадӟым кун но пичи дор люконтэм герӟаськемын ог-огенызы. Ӵапак вордскем интыысен кутске Россия.

Городлэсь нуналзэ адямиос туж ярато, отчы пырисько пичиос но, бадӟымъёс но. Бен, туэ, Городлэсь нуналзэ сяна, пусйиськом Ёрослэсь но Азбарлэсь нуналъёссэс, таӵеез ӧй вал на. Но, малпасько, со туж ӟеч ӵектон, угось берло аръёсы асьмеос бускельёсмес но ӟеч ум ни тодӥське, мар веранэз ни азбарын азьло дыръя сямен дэмен пукылон, шудон сярысь. Праздникъёс шулдыр гинэ ӧвӧл, пайдаё ортчыны кулэ, адямиос мед быгатозы быдэс семьяенызы, эшъёсынызы ӵош шутэтскыны,  дорамы сьӧрлось куноосты ӧтьыны — ваньмыз мед адӟозы, макем  тунсыко ми дорын.

Герберын пӧраське.

Городлэсь нуналзэ пусъёнъя программаез дасяку, лыдэ басьтэмын вал огшоры калыклэн ӵектонъёсыз — общественной кылзонъёс дыръя 6 сюрс мурт вазиськиз, со пӧлысь тужгес тунсыко 150 дэмлан улонэ пыӵалоз. Туэ нырысьсэ ортчозы шахматэн шудонъя турниръёс, вормисьёс мынозы Москвае, ас кужымзэс мерталозы отысь гроссмейстеръёсын.

— Оло, асьтэос но шудоды?

— Ӧй малпаськы вал, но эскероно шат? Пинал дыръям яратылӥ шахматэз, но профессионалъёсты уггес вормы, дыр.

— Соку Гербере ӧтиськом!

— Одно ик тыршо вуыны, мыным туж кельше та праздник. Адӟиське, Ижкарысь удмуртъёс ярато та йылолэз, котьку но трос калык люкаське, озьыен, со котьку луоз, угось элькун Гербере мыныны ваньмыз быгато, со пӧртэм ёросъёсын ортче.

Учконо ке, та рад вань ужрадъёсы, концертъёсы вуылыны 3 нунал но уз тырмы — сомында тунсыкоез малпамын!

Мон вань сюлмысьтым ӟечкыласько Ижкарын улӥсьёсты Россилэн но Городлэн нуналъёсынызы! Тау тӥледлы кармес чебергес, азинлыкогес карыны тыршемды понна. Шумпотӥсько, адямиос данъясько ке Ижын вордскеменызы но улэменызы — Доренызы. Улонмы арысь аре умойгес мед луоз!

Зинаида Рябинина

 

Удмурт Дунне
By Удмурт Дунне Июнь 8, 2017 13:40