Ижкар Гербер: Йӧзор  кезьыт, мылкыд ӟырдыт

Удмурт Дунне
By Удмурт Дунне Июнь 14, 2017 15:00

Ижкарын улӥсьёс но, куноос но дышем сямья 12-тӥ инвожое Кызьпу арамае Гербере люкасько. Индустриальной ёрос администрация верамья, туэ татчы ог 6 сюрс адями люкаськылӥз.

Александр Бречалов «Удмурт Кенешлэн» азбараз калыкез паймытӥз мыло-кыдо эктэменыз, гур азьын пыжем табань оскалтӥз.

Куазь шулдыр, яркыт шунды пиштэ, Кызьпу арама удмурт крезьгурен пачыла.  Гербере калык трос гинэ люкаськиз. Валтӥсь сцена вылысен удмуртъёсты бадӟым праздникенызы ӟечкылаз тодосчи, философия наукаосъя кандидат Альберт Разин. Кызьпу арама удмуртъёс понна дуно инты луэ, шуиз. Со сӥзиз тупаса но ог-огдэ валаса улон, удмурт калыкен, удмуртлыкен данъяськон мылкыд.

Шундыё гужем куазез шуак лек йӧзор воштӥз. Но зор ортчем бере ужрад азьланьтӥськиз, люкаськем калык выльысен шулдыръяськонэ пыриськиз. Валтӥсь сцена вылысен шулдыртӥзы филармониысь «Италмас» но «Шулдыр ӝыт» ансамбльёс туэ Удмурт кун филармонилы 80 ар тырмемен валче. Жаляса верано, йӧзор бере сцена вылысь техника, микрофонъёс, ву сюрыса, ужамысь дугдӥзы. Озьы ке но артистъёсты калык кужмо кичабонъёсын пумитаз. Концертэз азьланьтӥзы филармониысь мукет кырӟасьёс. «Задор мылкыд» ансамбльысь кенакъёс, зорлэсь кышкатэк, писпу улын но кырӟаса сылӥзы, сцена вылысен но калыклы шуныт, задор мылкыдзэс кызьмазы.

. Валтӥсь сцена вылысен шулдыртӥзы филармониысь «Италмас» но «Шулдыр ӝыт» ансамбльёс туэ Удмурт кун филармонилы 80 ар тырмемен валче.

Удмурт калыкез ӟечкыланы вуылӥзы Удмуртилэн Тӧроезлэсь ужзэ быдэсъясь Александр Бречалов, Ижгородлэн йырыз Юрий Тюрин, Ижысь кар Думалэн кивалтӥсез Олег Гарин, Индустриальной ёрослэн йырыз Любовь Зайцева, «Удмурт Кенеш» огазеяськонлэн тӧроез Татьяна Ишматова. Соос пусйизы удмуртлыкез азнинтонын валче ужанлэсь пайдалыксэ. Александр Бречалов калыкез праздникен ӟечкылаз но оскытӥз Ижкарын удмурт лулчеберетъя центр одно усьтӥськоз шуыса. Со сяна, Кызьпу арама пумысен но малпанзэ шараяз: удмуртъёслэсь вӧсяськон интызэс таланы уг яра. Калык тае кичабонъёсын пумитаз. Александр Бречалов «Удмурт Кенешлэн» азбараз калыкез паймытӥз мыло-кыдо эктэменыз, гур азьын пыжем табань оскалтӥз.

Дышем сямъя Герберын аслэсьтыз азбарзэз усьтӥз «Удмурт дунне» газет но. Котькудӥз мылкыд карись быгатӥз татын газетлы гожтӥськыны. Гожтӥськемьёс куспын, соос 9 кузя луизы туэ, лоторея радъяськиз. Валтӥсь кузьымез — сад-бакчае тупась ӝӧкез — утӥз Дэри ёросысь Пероггуртысь Нина Зуева. Мукетъёсыз но кузьымтэк ӧз кыле.

Герберын, азьло аръёсы сямен ик, ӝук вӧсязы, ог 6 сюрс пала лыктэм куноосты соин утялтӥзы. Ӝук сиытэк нокин  ӧз кыльы. Бӧлякен, гуртъёсын-гуртъёсын огазеяськыса, калык шулдыръяськиз, арган шудэмъя эктӥз-кырӟаз.

Наталия Самсонова

Туспуктэмъёс: З. Рябинина,

А. Горбунов

 

Удмурт Дунне
By Удмурт Дунне Июнь 14, 2017 15:00