Гоп вылын гоп

Удмурт Дунне
By Удмурт Дунне Июнь 19, 2017 13:42

Удмуртиысь «Калык фронтлэн» ёзчиосыз алигес вуылӥзы Шаркан ёросысь Мувыр-Вишур муниципал кылдытэтэ. Соос эскеризы Сосновка — Кушсо, Мувыр-Вишур — Шегъян Тыло сюресъёсты. Татысь ог 10 иськем сюресъёс сокем сӧриськемын, рейсовой автобусъёслэн пыремзы уг луы.

Шаркан ёросысь Сосновка — Кушсо сюрес 1974-тӥ арысен тупатъямтэ.

Сосновка, Кушсо, Шегъян Тыло, Мувыр-Вишур гуртъёс ог-огзылы матын интыяськемын. Тапалан улэ ог 800 адями. Та гуртъёсы Шарканысь, Якшур-Бӧдьяысь пырыны одӥг гинэ сюрес — отын но гоп вылын гоп. Таин валче ог 5 ар талэсь азьло Иже, Якшур-Бӧдьяе, Воткинске автобусъёс ветлэмысь дугдӥзы. Зэм, Шарканэ гуртоосты арняяз 3 пол автобус нуллэ на ик, но зор-кот дыръя мувыр-вишуръёс доры пыремез уг луы. Гуртысь тросэз егитъёс Иже, Воткинске дышетскыны ветло. Но автобус  я ветлэ, я уг бере, мумы-бубыоссы соосыз Якшур-Бӧдьяын яке Шарканын пумитано луо.

Гуртоос верамъя, тазьы соос кӧня ке ар уло ни. Берло дыре сюресъёсты зол быдтӥзы мувӧй поттӥсьёслэн бадӟым машинаоссы. Зэм, кылем арын татӥ нефтепровод кыскизы, табере мувӧй гумыостӥ кошке — бадӟым машинаос сюресэз уг лёгало ни. Но сюрес выро-гопо кылиз. Мувыр-Вишур сюресэз кышъям-лякылэм карылӥзы ик, нош Сосновка — Кушсо сюрес лэсьтэм дырысеныз — 1974-тӥ арысен — йӧнала тупатъямтэ. Сюрес лэсьтӥсьёс гопъёсты изъёсын ворсаллязы ик, но бадӟым питранъёс улын соос сюрес урдсы пезьдылӥзы.

Урод сюрестӥ школа автобус но ветлыны курадӟе. Мувыр-Вишурысь пиналъёс  дышетскыны ветло Шегъян Тылое. Покчиосты, 2 рейс лэсьтыса, нуэ-вае автобус, соосыз магазин дорысен басьтэ. Школа кыдёкын ик ӧвӧл ке но — 2 иськемын — гурт пумын улӥсьёслы магазин дорозь ог 2 иськем ортчоно луэ на.  Умой сюрес луысал ке, бадӟымъёссэ но нылпиосты автобусэн нуллысалзы.

Шаркан ёрос администрациысь лэсьтӥськонъя но ЖКХ-я ёзэтэн кивалтӥсь Владимир Лопатин верамъя, та сюрес элькун бюджет чотын возиське, ёрослы сое тупатъяны коньдон уг висъяськы. Ёрос кивалтӥсьёс одӥг пол гинэ ӧз вазиськылэ ни  Транспортъя но сюрес хозяйствоя  министерствое югдурез воштон пумысен, но та вакытлы отысь нокыӵе ивортонъёс ӧз вуылэ на, шуиз Владимир Георгиевич.

Сюресъёс туж кулэ гуртын туризмез азинтон понна но. Татын ортчылэ «Быг-быг»  фестивальлэн кыкетӥ нуналыз. Шаерысьтымы сяна, Мувыр-Вишуре вуо кунгож сьӧрысь куноос но. Озьы ик та гуртын ортчылэ егитъёслэн «Эру» фестивальзы.

«Калык фронтысь» азьветлӥсьёс та сюресъёс вылысь гопъёсты лыдъязы, мурдалазэс, кузьдалазэс мертазы. Сосновка — Кушсо сюрес вылын гинэ 20-лэсь ятыр бадӟым гоп сюриз, пичиоссэ вератэк. Сыӵегес ик югдур Мувыр-Вишур но Шегъян Тыло гуртъёс вискын. «Калык фронтэ» пыриськисьёс та сюресъёс пумысен Транспортъя но сюрес хозяйствоя  министерствое, ГИБДД-е но Шаркан администрацие ивортӥзы.

Но сюлмаськонзэс верам сяна, гуртоос «Калык фронтлы» тау каризы на. Та огазеяськонлэн сюлмаськеменыз муниципал кылдытэтысь 3 гуртъёсы газ вуиз. Кылем арын гуртоосты оскытӥзы вал, гужемлы чагыр эстӥськон коркаосы пыртэмын луоз шуыса. Адямиос документъёс лэсьтӥзы, пунэме пырыса, дуно газ тӥрлык басьтӥзы, нош соослы ивортӥзы: коньдон вань гуртъёсы газ лэзьыны уг тырмы. Соку гуртоослэсь сюлмаськонзэс «Калык фронт» тупатыны быгатӥз: ар пумын гуртоос газэн шунтӥськыны быгатӥзы ни.

Ангелина Снигирёва

 

Удмурт Дунне
By Удмурт Дунне Июнь 19, 2017 13:42