Елена Миннигараева. «Ӟырдан» верос.

Удмурт Дунне
By Удмурт Дунне Июнь 16, 2017 17:30

Елена Миннигараева

Верос

Йыр гу-у-у вазе, тани-тани пилиськоз. Пон вал сое кинлэн ке пельпумъёсыз вылэ, кынь вал синъёстэ но уйвӧтлэн кӧкыяз лэйка. Лиялэн синъёсыз зэмзэ но кыниськыны кутскизы, мугорыз кытчы ке гуэ усьыны ӧдъяз. Нош сцена вылын ялан маке верасько, дышетон удыслэн ар ӵоже азинскемез сярысь мадё.  Дышетӥсь луон — бадӟым дан но кыл кутон, шуо. Кыл кутон… Кутон…

— Ваньмыз умой? — шораз сак учкизы бускелезлэн синъёсыз.

— Умой… — шыпытак вазиз Лия но шонергес пуксиз.

Умме усьыны кутскиз, лэся. Уйбыт ӧз кӧлы угось — отчёт гожъяз. Эшшо ке тани висьыны усиз, быдэс мугорыз ӟырдамын. Тазьы йырсазьдэ но ыштыны кема ӧвӧл. Нош зэмзэ но усиз ке?  Лия мышсэ учкиз: театрлэн залэз калыкен тымиськемын. Республикаысь тужгес усто дышетӥсьёс, ёросъёсысь дышетон понна кыл кутӥсьёс. Ваньзы сак учко сцена пала. Отын бадӟым кивалтӥсьёс верасько: элькунлэн йырыз, собере Правительстволэн  тӧроез, министр…

Лиялэн йырыз нош ик паллянэ кыскыны ӧдъяз, синъёсыз бусаськизы. Юн-ме, сокем юн висьыса, лыктӥз, юнме гинэ… Зэм, ёросысьтызы дышетонъя управленилэн кивалтӥсез Михаил Иванович кужмысь косӥз: коть кул, но бордам, пе, мед луод. Ма бен, коть кул тани…

Кужмо кичабонъёс быдэс залэз зуркатӥзы. Лиялы эшшо урод луиз. Малы меда парацетамол уг юртты, ӟырдамзэ уг уськыты?  Уз, тазьы пукыны со уз ни чида, пограмлэсь азьвыл потоно. Кышномурт  каллен гинэ султӥз но рад кузя потон пала вамыштӥз. Татчы гинэ медад усьы.

Театрлэн вӧлмыт фойеяз со нырысь сюрем диван вылэ ланьырскиз. Ох… Татын шоканы ик капчигес.  Кышномурт пичи сумказэ усьтӥз, парацетамол эмъюмзэ поттӥз. Огшап малпаськиз но берен ватӥз. Ӝыныё вуэн бутылказэ ваньзэ юиз. Собере кот салфеткаосын пӧсь кымессэ ӵушылӥз. Капчигес луиз.

Тазьы куспетӥ потэмез Михаил Ивановичлы уз яра. Ӵок ойдо. Лия йырзэ диванлэн тыбырыз вылэ уськытӥз. Синъёссэ кыниз. Кыӵе акыльтӥз ни со та кенешъёслэсь, отчётъёслэсь, пӧртэм эскеронъёслэсь, олимпиадаослы, конференциослы дасяськонлэсь, бер ӝыт эскероно тетрадьёслэсь… Эшшо ке со — ёрос кенешысь депутат. Кыӵе но адями дораз уг вазиськы, ма пумысен но уг ӝожтӥськы! Школаын но, ульчаын но ялан: «Лия Николаевна, ма кароно?», «Лия Николаевна, кызьы тӥ малпаськоды?»…

Аслэсьтыз пичи пиоссэ кышномурт уг ик адӟылы. Кыктооссэ вешаны ӵемысь кӧлон азязы гинэ вутске. Ярам, картэзлэн анаез чакла. Нош со ке ӧй луысал… Со ке ӧй луысал, Лия али дораз пукысал. Оло, озьы ик кароно вал, ато улон-а ма та?

Кышномурт синъёссэ усьтӥз. Я, пумен умойгес луиз, лэся.

— Ӟечбуресь, — вазизы вӧзаз.

Лия  куара пала берытскиз.

 

— Ӟечбуресь, — нош ик вазиз диванлэн мукет пумаз пукись пиосмурт, — тодмады-а? — Воргорон пальыштӥз но матэгес кариськиз.

— Ӧй, — йырыныз мырдэм адскымон сэзъяз кышномурт. Но соку ик сюлмыз ёркак кариз.

— Коля? Тон?

Воргорон капчияк серек-тӥз:

— Мон! Тодмад, иське…

— Коля, — пальыштӥз Лия но. — Кыӵе тон луэмед…

— Пересьмиськем-а?

— Ӧвӧл… Мукет…

— Ма, тон но, — нош ик капчияк пальпотӥз Коля. — Туж йӧно кышномурт, дорад огшоры гинэ уд матэкты.

— Я, мар тон, — векчи чиньыосыныз шонтӥз Лия.

Солы шуак сыӵе капчи луиз. Мугорыз али кытчы ке лобӟыны дась. Зэм но, мар ай со татын пуке? Кырын али сыӵе умой, дыр: татчы лыктыкузы, лымы усе вал.

— Коля, тон али вань-миськод-а?

— Ваньмисько.

— Соку ойдо ульчае потом, поръялом.

— Ойдо, — шумпотӥз воргорон.

Коля юрттӥз Лиялы кузь вучайы шубазэ дӥсяны. Ачиз вылаз векчигес гинэ китай пуховиксэ куштӥз. Кыре потӥзы.

— Я, вера, кыӵе улӥськод ини, кытын ужаськод? — воргорон шоры синъёссэ ӝутӥз Лия.

— Умой улӥсько.

— Семьяед кыӵе, нылпиосыд?

— Вань. Кышно садикын ужа, куинь пиналы…

— Куинь?!

— Озьы. Бадӟымезлы 20 арес, пичиезлы — 3.

— Ӟеч, — пальыштӥз Лия, — нош кышноед со ик-а?

—  Со…

Огшап шып вамышъязы. Лия тодаз вайиз пинал дырзэ, школаын дышетскон аръёссэ. Коляен соос одӥг классын дышетскизы, ог-огзылы синмаськемын вал. Гуртъёссы вискын ог куинь километр. Но Коля быдэс толэзь ӵоже вазь ӵукна, гуртоос кӧлыку на, яратонэзлэн капка азяз сяськаос вайылӥз. Огпол нылашлэн анаез пиёкез пумитаз, туж зол куаретӥз, ма, пе, тон шайвылэ сямен ялан сяська нуллӥськод. Анаез ик куаӵак пумит луиз егитъёслэн кусыпсылы. Лия университетын дышетскиз, Коля — техучилищеын, собере кылӥськиз вал, ужбергатонэн выре шуыса.

— Нош ужбергатонэд кыӵе ни? Мынэ-а?

— Мынэ, — кызйиз Коля. — Аслад кыӵе-мар?

— Ваньмыз умой. Картэ, кык нылпиосы. Пичиесь ай, бер вайи…

— Ничего, будозы. Соос ӝог будо…

Кырын ӟар-ӟар кезьыт кариськем. Лиялэн пыдыз утыр кынмыны ӧдъяз.

— Ойдо кафее пыралом, — дэмлаз Коля.

Кафее ке кафее. Но шуныт азе пырыса ӧз вуттэ — Лиялэн нош ик йырыз поромыны ӧдъяз, воргорон борды ӝик-ӝик кутӥськиз:

— Коля, ойдо мукет азе, — жальмыт учкиз со пиосмурт шоры. — Тон ведь машинаен? Ойдо машинаяд гинэ пуком…

— Ну, ойдо, — мазэ-созэ ӧз вала ке но, капчи серектыны тыршиз Коля.

Егит дыръязы сямен, киоссэс кутыса, соос машина дугдылон пала вамыштӥзы.

— Та тынад машинаед? Зол! — чильк-вальк кисьтаськись «Тойота» вӧзы султэмзы бере паймиз кышномурт.

— Ойдо, пуксьы, — автомобилезлэсь ӧссэ вӧлак усьтӥз Коля.

Лия пуксиз.

— Нош тодӥськод на-а, кызьы мон тыныд сяськаос нуллӥ?

— Ой, али гинэ кадь вал, — нош ик ӟырданы кутскиз кышномурт. — Нош мон тон доры лушкем поталляй.

— Нош огпол, тодӥськод на-а, школаын кин ке борддор вылэ бадӟым букваосын нимъёсмес гожтэм, «равно любовь» карем, — серекъяны ӧдъяз Коля.

— Нош сое Петыр гожтэм вылэм, тон сое шедьтӥд но мыжгад, — Лиялэн но серемез потӥз.

— Собере монэ директор доры ӧтчазы…

— Бен. Юнме тон сое жугид, вераськоно гинэ вал…

Соос эшшо кӧня ке учыръёсты тодазы вайизы. Трос аръёс ӵоже нырысьсэ Лиялы сыӵе капчи  луиз, нырысьсэ сокем сюлмысь серекъяз.

— Тынад вуэд ӧвӧл-а? — шӧдтэк шорысь юаз со.

— Али ик басьто, — Коля интыысьтыз ишкалскиз но кафе пала дыртӥз.

Лия синъёссэ кыниз. Тани тазьы, номыр сярысь малпаськытэк, пукысал со вань кылем улонзэ. Татын, Коля вӧзын.

Пиосмурт машинае пуксьыку, Лия кӧлэ ни вал. Мусо пальышаса — ӵапак егит дыръяз кадь. Киосаз кырмем эмъюмез тани-тани усёз. Коля сое лачмытак поттӥз — парацетамол.  Воргорон яратонэзлэсь кымессэ дӥсьтытэк гинэ эскериз. Пӧсь. Шока но секытэн. Тӥни кыӵе гадьёсыз ӝутъясько. Пиосмурт малы ке ачиз но ӟырданы ӧдъяз. Мыкырскыса Лиялэсь векчи чиньыоссэ бадӟым киосаз кутӥз. Кышномуртлэн киосыз азьвыл кадь ик туж ненегесь, укыр лемлет лякылэм гижыос гинэ ке шат азьвыл тодэ ваёнъёсты сурало…

Тани та кышномурт солэн кышноез луыны кулэ вал. Кулэ вал, но ӧз луы… Пиосмурт чассэ учкиз: театрын ужрад ӝоген йылпумъяськоз. Шуак Лиялэн телефонэз жингыртӥз. Но кышномурт ӧз сайка. Коля нош ик сюлэмшуген учкиз чассэ. Ӝоген солэн кивалтӥсез потоз. Ужрад бере эшшо одӥг пумиськонэз вань на, шуиз вал. Мар вералоз солы Коля? Малы шефезлэн интыяз кыӵе ке кышномурт пуке? Бен, бен, та мудрон машина Колялэн ӧвӧл. Коля — огшоры водитель. Аслаз солэн огшоры «Лада»…

Воргорон нош ик учкиз вӧзаз пукись кышномурт шоры. Кыӵе мусо кӧлэ со. Буртчин бабляосыз бам вылаз усиллям, ангесаз азьвыл кадь ик пичи менез вань… Оло, ваньмыз шоры киын шонтоно но кыдёке-кыдёке кошконо? Кыкназылы гинэ, тани та машинаен, али ик…

Коля Лиялэсь чиньыоссэ каллен гинэ чупыштӥз, пель дораз кариськыса, шыпыртӥз:

— Султы… мусое…

Нош ик Лиялэн телефонэз жингыртӥз.

Кышномурт синъёссэ усьтӥз.

— Кенеш йылпумъяськиз, лэся, — театрысь потӥсь адямиос пала сюлэмшуген возьматӥз Коля.

— Бен, бен, мыным мыноно, — шуак луэменыз Колялэсь сётэм вуэн бутылказэ бордаз љиптӥз Лия но буйгасьтэм телефонэз борды кырмиськиз. — Да, Михаил Иванович, да, али вуисько ни…

Лия пӧсьвуаськем сямен кыре тэтчиз, машина радъёс пӧлысь ик сьӧд «Фольксваген» пала дыртӥз. Ог куинь секунд ортчыса, «Тойотае» пуксиз Колялэн кивалтӥсез — дышетонъя министр.

— Кин со вал? Маке укыр тодмо, — дыртыса кошкись Лия пала йырыныз шонтӥз кивалтӥсь.

— Уг тодӥськы, машиназэ сураса, пуксьылӥз, — вазиз Коля.

— Машиназэ сураса? — гор-гор серектӥз министр.

Синпумтӥз гинэ Коля адӟиз, кызьы солэн чилясь ботинкаосыз улын паньгаз яратонэзлэн палдыса кылем эмъюмез — парацетамол…

*  *  *

— Лия Николаевна, та ужез ас вылады басьтоно луоды, киыз но пыдыз, — Михаил Ивановичлэн ӵак-ӵак куараез чалмыны уг вала.

Машиналэн бераз пукись Лия йырыныз гинэ сэзъя. Сумказэ кык пол бугыръяз ни. Кытчы пыриз парацетамолэз? Ӧвӧл, Лия али эмъюм юыны уг малпа. Солэн йырыз али воксё уг висьы. Солэн али сюлмыз ӟырдамын. Сокем ӟырдамын — коть быдэс дунне тыр кесяськы но бӧрд. Я кытчы пыриз парацетамол?!

Бамыз кузя васькись синкылиоссэ Лия лемлет гижыосыныз ӵушалтӥз…

 

Туспуктӥз Евгений Ардашев

Удмурт Дунне
By Удмурт Дунне Июнь 16, 2017 17:30