«Быг-быг» фестивальын тодэ ваёзы вунэм удмурт сиён-юонъёсты

Удмурт Дунне
By Удмурт Дунне Июнь 19, 2017 14:10

6-тӥ-8-тӥ пӧсьтолэзе Шаркан ёросысь Быгы гуртын ортчоз фин-угор сиён-юонлы сӥзем «Быг-быг» фестиваль. Туэ со 4-тӥзэ ортче ни.

Кылем арын сямен ик, туэ фестивальын, шулдыръяськем но сием-юэм сяна, нимысьтыз люкаськозы наукаен вырисьёс. Нырысетӥ нуналаз, кылсярысь, Шарканысь  Тол бабайлэн юртаз вераськозы, кызьы шаерамы утиське но азинске калык киужен вырон. Мукет нуналаз семинарын учкозы, маин пӧртэм луэ фин-угор сиён-юон. Нош кыӵе удмурт сиёнъёс вунэмын ни? Вань мылкыд карисьёс быгатозы вуылыны Шаркан ёросысь гуртъёсы.

Нош кызьы пӧраськисьёстэк? Пӧртэм улосвылъёсысь командаос пӧралозы асьсэ калык сиёнзэс. Кинлэн ческытгес? Нимысьтыз нюръяськозы егитъёс но.

Фестиваль, 4 ар талэсь азьло вордскыса, али брендлы пӧрмиз ни, пельняньлы сӥзем фестивален валче арысь аре тросгес но тросгес калыкез люка, кунгож сьӧрысь адямиосты кыске. Туэ фестивальлэн дуно куноосыз — Эстониысь сетуос. Фестивальын соос асьсэ культураенызы, киужъёсынызы тодматозы.    0+

 

 

 

Удмурт Дунне
By Удмурт Дунне Июнь 19, 2017 14:10