Бессерманъёслэн Кӧрбанзы сӥлы каризы кылбурчиез Михаил Федотовез

Удмурт Дунне
By Удмурт Дунне Июнь 14, 2017 14:40

Яр каргуртзы дорысь возь вылын ортчиз шаерысьтымы бесерманъёслэн Кӧрбанзы. Таяз учыре ужрад пӧраськонлы — «Гур дорысь ӝӧк доры» нимаськиз.

Кӧрбан — со музъемлы но инкуазьлы йыбырттон. Бесерманъёс, гужем шулдыр но емышъёсын тыро мед луоз шуыса, Инмарлы вӧсяськизы но ӝук пӧзьтӥзы.

Инмар кылӥз, лэся, бесерманъёлэсь вӧсяськемзэс: кӧня ке шапык зоремез бере юн шулдыр кариськиз. Шулдыръяськонэ люкаськылӥзы Глазов, Балезино, Юкаменск, Эгра но Яр ёросъёсысь бесерманъёс, Ижысь куноос —  ваньмыз-ӧвӧлэз ог 4 сюрс адями.

— Бесерманъёслэн таӵе шулдыръяськонзы, 1996-тӥ арысен кутскыса, 2 арлы одӥг пол ортчылэ, — шуэ шаерысьтымы бесерман огазеяськонлэн кивалтӥсез Сергей Айтуганов. — Ужрадэ трос калык люкаське бере, оло, арлы быдэ ортчытон сярысь малпаськоно ни.

Кӧрбан — со музъемлы но инкуазьлы йыбырттон. Бесерманъёс, гужем шулдыр но емышъёсын тыро мед луоз шуыса, Инмарлы вӧсяськизы но ӝук пӧзьтӥзы. Возь вылын калыкез шулдыртӥзы «Куно пумитан», «Тӧр шор», «Гур дорын», «Ӝӧк дорын» но «Питран» площадкаос.

— Одӥгаз сӥлы каримы удмурт поэтэз Михаил Федотовез, — веранзэ азьланьтэ Сергей Серафимович. — Солэсь кылбуръёссэ лыдӟизы, кырӟанъёслы пӧрмем чуръёссэ пӧртэм коллективъёс быдэстӥзы.

Мылкыд карисьёс пӧсь гур азьын бӧльым (мильым) пыжыны дышетскизы. Бесерманъёслэн шулдыръяськонзы таин ӧз йылпумъяськы на. Таяз арнянуналэ Юкаменск ёросысь бесерманъёс люкаськозы Ёжгуртэ.

Валентина Емельянова

 

Удмурт Дунне
By Удмурт Дунне Июнь 14, 2017 14:40