Азяз — выль целина. Мария Корнилова вамыштэ бадӟым политикае

Удмурт Дунне
By Удмурт Дунне Июнь 20, 2017 10:08

Азяз — выль целина. Мария Корнилова вамыштэ бадӟым политикае

Мария Корнилова.

Мария Корнилова Россиысь «Студентъёслэн отрядъёссы» огазеяськонлэн удмурт ёзэныз кивалтэ, Егитъёслэн парламентазы пыриське. Шуэ: анай-атае монэ визьмо будэтӥзы, ялан вераллязы: номыр вормонтэмез ӧвӧл.

 — Мон но студент дыръям 2 гужемзэ проводник луыса ужай. Тӥ нош — 4-зэ.

— «Отряд» кыл пель сьӧрам пичи дырысеным чузъяськылӥз. Анае-атае тодматскизы стройотрядын, соос Молдавиын персик бичазы. Собере проводникъёслэн отрядазы ветлыны кутскиз агае. Со быдэс гужемлы поездын ужаны кошкылӥз, мон понна — атай юртлэсь нылпи лагере сяна кошкылымтэ ныллы — со эрико улонлэн пусэз вал. Агае сӥзьыл бертэ вал шудо, уксёен, трос эшъёсын. Монэ та но гочатӥз. ИжГТУ-ын дышетскыкум ини, агае ик «Ромат» отрядэ мыныны дэмлаз.

Соку ик зыми огыр-бугыр улонэ. Мыным кельшылӥзы пӧртэм ужрадъёс: эктонъя конкурсъёс, фестивальёс, целинаез усьтон… Мон быдтӥ искусствоя школаез, крезьгуръя но эктонъя ёзъёсты. Пичи дырысеным дыши, ваньмон дыры ӧвӧл шуыса. Огыр-бугыр нуналъёслы но дышемын. Отрядысь эшъёсы синйылтӥзы, лэся, мынэсьтым сямме. Дэмлазы командир луыны. 2013-тӥ-2014-тӥ аръёсы монэ «Ромат» отрядлы командире бырйизы.

 — Секыт-а командир луыны?

— Кивалтӥсьын пукыса, тон аслэсьтыд шекъёссэ чальгес шедьтӥськод. Валаськод, мар бордын ужано на.

Командир отрядэз азьлань валтыны кулэ — мукет отрядъёс я огазеяськонъёс мед тодозы. Шедьтоно отрядэ выль кандидатъёсты. Выль адямиос лыктӥзы ке, соосты ужрадъёсы кысконо, валэктоно, маин ми выриськом. Тон киын 46 адями — соосты ялан лӧпкытъяно, целиналы дасяно. Валамон, пӧртэм ужрадъёс луыло, куд-огъёсыз егитъёслы уг но кельшо, кылсярысь, субботник. Но татын аслыд тунсыко ни: быгатод-а 20 адямиез утялскыны поттыны?

 — Пӧрмылӥз-а?

— Пӧрмылӥз. Егитъёсын ужаны капчи ӧвӧл. Малпасько, ӧвӧл, дыр, студентлэсь эрикогес адями — со али гинэ школаез йылпумъяз, со дыре ик пушказ улэ на нылпи лул. Кыӵе ке шуг-секытъёс кылдылыку, мыным юрттӥськылӥзы анай-атае. Атае ачиз ас вакытаз командир вал, со мыным дэмланъёс сётъялляз. Кылсярысь, мар кароно, коллектив пушкын керетонъёс пурӟо ке? Шуом, боецъёс ог-огзылы пумитъяськись группаослы люкиськизы яке лидер комсоставлы пумит султэ. Валаса висъяно, отрядысь улонэз бугыръясез но соин кыл тупатоно. Та амал, зэм но, ужа. Отряд — со коллектив ук, отын но, зэмос улонын кадь, вань шумпотонъёс, керетонъёс.

Командиръёсты, комиссаръёсты ми ялан ды-шетӥськом, кызьы юн команда кылдытоно, калык азьын вераськоно. Отрядысь адямиосты эшъяськытон понна ик пӧртэм ужрадъёс ортчытъясько. Шуом, эктонъя конкурсэ дасяськыку, соос, уйёссэс изьытэк, эктон пукто, костюмъёс вурыло. Ужпуммы одӥг: целина усто мед ортчоз, гужем ужакузы, егитъёс ӧжытгес шуг-секытъёсын мед пумиськозы.

 — Али «Студентъёслэн отрядъёссы» огазеяськонлэн удмурт ёзэныз кивалтӥськоды. Огазеяськонын 1 сюрс 750 адями.

— Валтӥсь штабын комиссарлэн интыез бушаз но, мыным џектћзы: уг поты-а дэмласькеме? Мон кема малпаськи. Мыным соку быръёно вал: мон мынӥсько ас удысам IT амалъёсын ужаны яке улонме эшшо но золгес герӟасько отрядъёсын. IT удыс ялан пуртыяз пӧзьыны косэ, со туж ӝог азинске, соин ик со сьӧры вуттӥськоно, ялан утчаськоно, дышетсконо. Валай: мынам сокем уг поты, программировать карыса, ялан компьютер сьӧрын пукеме. Мыным тунсыкогес ужрадъёсты радъялляны, егитъёсын ужаны. Штабе мынӥ ке, отрядъёслы но тросгес дырме висъяло, та понна мыным уксё но тырозы.

Люкаськиз конференция. Тросэз мон понна куаразэс сётӥзы. Мон сюри штабе — профессиме воштӥ, шуыны луоз. Али госслужащийлы но дышетскисько на.

 — Пыриськиськоды Егитъёслэн парламентсылэн ужаз. Шӧдӥськоды-а асьтэды политикен?

— Малпасько, одӥг интыяд сылоно ӧвӧл, луонлык вань ке, азинсконо, астэ выль удысын эскероно. 2 ар талэсь азьло студотрядъёслэн правленизылэн тӧроез Дмитрий Плешаков мыным Егитъёслэн парламентазы мыныны ӵектӥз: политикае мургес, пе, выёд, тодматскод, кызьы законъёс лэсьтӥсько. Азьланяз со кулэ луоз. Дмитрий Плешаков ачиз но соку Егитъёслэн парламентазы вал.

 — Кун Кенеше дэмланэн но потады, пиналъёсты гужем уже кутӥсьёслы льготаос юнматоно шуыса.

— Вань федеральной закон. Соя очной формаен дышетскись студентъёсты уже кутӥсьёслы льготаос сётӥсько — Пенсионной фондэ отчислениос уг мыно. «Студентъёслэн отрядъёсазы» ветлӥсьёс тыршисесь, соин ик соосты ужаны шумпотыса куто. Со выллем ик воштонъёс пыртыны дэмламы вал пиналъёс понна но. Али быдэ вуымтэосты уже кутэмзы туж ик уг поты: документъёсын бызьылонэз трос. Кун Кенешын та дэмланмы бордын пыр-почгес ужаны куризы на. Уго ми вырӟытозь, законъёс нош ик воштӥськизы ни.

 — Туэ Егитъёслэн парламентазы выльысен быръёнъёс ортчозы. Мыноды на-а?

— Ӧй малпа на. Политика — со тунсыко, пушказ пыдлогес пыриськод ке. Али мон егитъёсын ужасько, валасько: та удысын мыным вань на кытчы будыны.

Арнянуналэ пыриськи «Огъя Россия» партилэн праймеризаз. Егитъёс но Кун Кенешын луыны кулэ. Егитъёслэн но шуг-секытъёссы вань. Эчешонъёсы (дебаты) но ветлӥ, юрттӥськизы отрядъёсысь эшъёсы. Кышкай вал, юан сётозы, нош мон валэктон сётыны уг быгаты шуыса — калыклэн сюлмаськонъёсыз трос, соин ик дебатые мыныку, котьмае тодыны кулэ. Но ваньмыз усто ортчиз.

Тросэзлэн 20 аресказы валанзы но ӧвӧл на, кызьы дунне улэ-вылэ. Мон ачим но политикае алигес гинэ кыстӥськи — иворъёсты кылзӥськытозь, шулдыртӥсь передачаосты учкыны капчигес ук.

 — Ваньмон дыр сюре на-а?

— Отрядъёслы луыса мынам туж трос эшъёсы. Соосын ик ӵемысь дырме ортчытӥсько. Яратӥсько эктыны, дуннеез котыръяны — проводникын ужакум, Россиысь пӧртэм каръёстӥ ортчи. Яратӥсько ветлыны концертъёсы, культурной ужрадъёсы.

Кыллюкам:

Целина — гужем ужан вакыт

Командир — отрядлэн кивалтӥсез

Комиссар — кивалтӥсь-лэн воштӥсез

Кандидат — целинае куриськись адями

Боец — целинае ветлэм адями

Мария Векшина

 

Удмурт Дунне
By Удмурт Дунне Июнь 20, 2017 10:08