Выль дор: Алнаш интернатын уло-выло 75 песянай-песятайёс

Удмурт Дунне
By Удмурт Дунне Июнь 19, 2017 12:30

Алнашын трос аръёс ӵоже ини пересьёслы но инвалидъёслы интернат ужа.  Отын 75 адями улэ. Мар соосыз сюлмаськытэ, кыӵе шуг-секытъёсын пумисько отын тыршисьёс, вера юртлэн директорез Михаил Николаев.

Алнашысь интернатын мӧйыос эшъяськыса уло.

— Нырысь ик пусйыны кулэ, интернатмылэн 2 юртъёсыз шуыса: огез интыяськемын райцентрын, мукетыз — Асан совхоз-техникумын, — вера Михаил Сергеевич. — Кыкетӥяз шедё ветлӥсьтэм пересьёс но. Туннэ нуналлы Асан совхоз-техникумын соос 25 кузя, нош мукет отделениысь пересьёсын ӵош — 48 кузя.

Али интернатэ басьто 80 арессэс тырмытэмъёсты яке I группаен инвалидъёсты. Соос Алнаше элькунмылэн пӧртэм сэрегъёсысьтыз вуо, ёросъёсысь калыклы социальной юрттэт сётонъя отделъёс келямъя.

Нялтас вераса, шаерамы туннэ пересьёслы но инвалидъёслы 2 интернатъёс ужало: Ижын но Алнашын.

— Пересьёс ми доры олокыӵе но мугъёсъя сюро: кин ке огназ кыле, мукетъёсызлэн улон интызы тазалыксыя уг тупа (шуом, коляскаен ветлӥсь инвалидъёс лифттэк трос этажъем коркан улыны уг быгато), — шуэ Михаил Николаев. — Но ваньзы ик ми доры ас мылкыдзыя лыкто, кужмысь соосты татчы нокин уг вайы. Интернатэ ик соослы прописка лэсьтӥськом.

Федосья Егоровна Киршина пересьёслэн юртазы 17-тӥ арзэ улэ ини. Со татчы, жугиськись картэзлэсь пегӟыса, вуэм.

— Алнаш ёросысь Котнырын улӥськом вал, но бӧрысь картэным люкиським, со монэ коркась поттӥз, — вера Педчапай. — Татын мыным гань-гань, номырлэсь кышканэз ӧвӧл. Ӧй кельшысал ке, татчы ӧй кыльысал.

Котькуд пересьлэн аслаз историез, та юртэ шедён мугез, но соос тупаса, бадӟым семьяын кадь уло.

Алнашысь интернатлэн юртэз пулэсь, нош Асан техникумын кирпичлэсь но выльгес ке но, тросэз пересьёс мылкыд каро Алнаш черкогуртэ сюрыны, угось татын ваньмыз матын: лавкаос но, эмъюрт но, базар но. Вань кытын шутэтскыны но кинэн ӟабыльтыны. Ужасьёслэн но Техникуме ветлэмзы туж ик уг поты.

— Туннэ Асан совхоз-техникумысь корпусын эмъясьёс но санитаркаос уг тырмо, — шуэ Михаил Николаев. — Нош алнашъёслэн отчы нуналлы быдэ ветлэмзы уг поты. Угось вазь ӵукна потоно рейсовой автобусэ. Со автобусэн ик ӝыт Алнаше бертоно. Огпала мынонлэн дуныз 37 манет тыр усе.

Котькуд пересьлэн аслаз историез, та юртэ шедён мугез, но соос тупаса, бадӟым семьяын кадь уло.

Али Алнашысь интернатын 63 мурт тырше. Социальной удысын вань ужасьёс сямен ик, соос секыт югдуре шедем, огназы кылем адямиослэсь улонзэс капчиято, пӧртэм программаосты улонэ пыӵато. Кытысь ке ӟигар но мылкыд шедьто на пӧртэм ужрадъёсы пыриськыны.

— Удмуртиысь интернатъёс пӧлын ӵошатсконъёсын ми 1-тӥ но 2-тӥ интыосын вал, — шуэ Михаил Николаев. — 2011-тӥ арын «Калыклы социальной юрттэт сётонъя устоез центр» нимлы конкурсын «Устоез интернат юрт» номинациын вормим. Со арын ик коллективмы ёросмылэн Данъян пул вылаз пыртэмын вал. Ужасьёсмы вормыло визь сынанъя, кырӟанъя вожвылъяськонъёсын но.

Киоссы но соослэн зарниесь: асьсэос лэсьто беседкаос, ӟусъёс, буяло соосты, бордазы сяськаос мертто, вань котырзэс утялтыса возё. Шуныт куазен пересьёс отӥ шумпотыса поръяло. Алнашысь но, Асан совхоз-техникумысь но корпусъёс нюлэс вӧзы интыяськемын, соин отын аляк уг луы, машина гужетэмлэсь пель уг жадьы.

Елена Рябина

 

Удмурт Дунне
By Удмурт Дунне Июнь 19, 2017 12:30