Ӝажыос люкылэмын

Удмурт Дунне
By Удмурт Дунне Июнь 1, 2017 12:45

Туэ картош бусыос 347 гектарлы кулэстэмын

Миым шаерысьтымы хозяйствоос кубиста, гордкушман, кешыр 132 гектар вылэ кизизы вал. Туэ бусыосты 162 гектарозь паськытатыны чакламын. Со дыре ик картошка 347 гектарлы кулэстэмын. Кудпала мынӥськомы?

Гурт удысъя но сиён-юонъя министерствоысь будосъёсъя ёзэтэн кивалтӥсь Алевтина Бурдина верамъя, туэ тулыс куазь кезьыт, соин ик хозяйствоос картошкалы бусыоссэс висъяны ӧз дӥсьтэ. Но мугез та гинэ меда? Туэ нырысьсэ картошка будэтӥсь хозяйствоослы субсидия ӧз висъяськы. Кун Кенешысь Гурт удысъя, музъем кусыпъёсъя, инкуазь узырлыкъёсъя но инкуазез утёнъя ялан ужась комиссиысь депутатъёс та ужпумез огпол гинэ ӧз ӝутъялэ — толыкез ӧйлась. Зэм, туннэ картошка, бакча сиён возён хранилище лэсьтӥсьёслы субсидия вуэ. Пуктӥськыны дӥсьтӥсьёсыз но таин сэрен шедизы: Вотка ёросысь Иван Собин фермер но Пичи Пурга ёросысь «Надежда» хозяйство. Но хранилищеосты тырмытон понна маке мерттоно ук. Нош туннэ азьмынӥсь «Надежда» хозяйство ик картошка бусыоссэ ог 20 процентлы кулэстӥз.

— Берло дыре картошка уг вузаськы, — шуэ «Надежда» хозяйствоен кивалтӥсь, Кун Кенешысь депутат Бронислав Ясонов. — Азьвыл Россилэн лымшор палысьтыз перекупщикъёс асьме доры фураосын вуыло вал, нош табере сопалан асьсэос картошка мертто. Собере, али зол пуктӥськон радъямын Москва котырын: бакча сиён будэтонъя нимысьтыз зона кылдыто. Соин ик теплица, хранилище, переработкаен выронъя завод пуктыны, бусыосты гырыны мылкыд карисьёслы музъем дунтэк сёто. Со сяна, дунтэк кыско сюрес, канализация, ву. Эшшо ке субсидия висъяло на. Москваез сюдыны кулэ уго. Асьме хозяйствоослы но сыӵе ик юрттэт вуысал ке,  нокин бусыоссэ ӧй кулэстысал. Магазинъёсын ӝажыос  кемалась люкылэмын. Ярам ай, туннэ «Ижтрейдинг», «Вкусный дом» кадь магазинъёсы асьме продукция вуэ на. Нош федерал сетьёсын Краснодарысь  картошкаен вуз каро. Адямиос солы гочало, дунтэм шуыса, нош кызьы будэтэмын, уг чаклало. Калыклэн каньыл улэмез потэ: дась сузям, миськем, юдэм вуз басьтэмез потэ, кынтэмзэ таба вылэ кисьтэ но пӧра. Соин ик хранилище пуктон борды кутскимы. Шоро-куспо дуныз — 40-50 миллион манет. Экспертиза лэсьтонэз ик 2 миллион манет. Субсидиен пуктӥськонлэн 20 процентэз берыктӥське. Но со берыктэм уксё ик туж ӝог интызэ шедьтэ. Кылсярысь, бусые ву кисьтась машина басьтӥмы — 10 миллион манет сылэ, севооборот лэсьтон вылысь 165 гектарлы бусыосмес йылтӥмы. Эшшо но будэтыны луонлык вань, но со понна ӵыпетэз паськытатоно, солы 30 миллион манет кулэ.

Бронислав Ясонов лыдъямъя, хозяйствоосты утён вылысь переработкаен, консерваос лэсьтонэн вырись заводъёс кулэ. Владимир улосын сыӵе завод ужа. Со фермеръёслы арлы быдэ 5 миллион манет сётэ кидыс басьтыны, но куронъёссэ пуктэ: сыӵе дырлы сомында урожай медло. Асьмелэн сыӵе завод кылдытон борды басьтӥськисьёс туннэ ӧвӧл. Инвесторъёс но уг сюро. Ас вакытаз Вотка, Можга, Иж палан крахмал поттонэн вырись заводъёс ужазы ик. Туннэ Можгаын одӥг линия кылемын, но отын но бакча сиёнлэсь икра лэсьтонэн гинэ на выро. Россиын 80 процентэз крахмал кунгож сьӧрысь вуттэмын. Можгаысь заводэз юнматыны, выльдыны луысал ке, со шаермылы туж бадӟым пайда вайысал.

Елена Сараматова

 

Удмурт Дунне
By Удмурт Дунне Июнь 1, 2017 12:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*