Выль проектъёс вордскизы

Удмурт Дунне
By Удмурт Дунне Май 15, 2017 13:41

Ижысь Эшъяськон юртын пӧртэм огазеяськонъёсысь азьветлӥсьёс понна кыкетӥез дышетскон сессия ортчиз.

Иже Россилэн пӧртэм улосъёсысьтыз пӧртэм выжыосысь 60 пала егитъёс вуылӥзы.

Радъя сое егитъёслэн «Вместе» ассоциацизы Эшъяськон юртэн, Егитъёслэсь но нылпиослэсь движениоссэс азинтонъя элькун центрен валче, Нациосын ужан политикая министерство юрттэмен.

Иже Россилэн пӧртэм улосъёсысьтыз пӧртэм выжыосысь 60 пала егитъёс вуылӥзы. 4 нунал ӵоже соос проектъёс бордын ужазы, йӧскалык политика пумысен вераськизы. Со понна ужрадэ нимысьтыз экспертъёс ӧтемын вал: егитъёслэн огазеяськонъёсынызы кивалтӥсьёс, Нациослэн ужъёссыя федерал агентствоысь специалистъёс, Москваысь вузъёсысь дышетӥсьёс, шаерысьтымы Правительствоысь но министерствоосысь ужасьёс.

Нош ӝытъёсы азьветлӥсьёс тодматскизы пӧртэм калыкъёслэн эктонъёсынызы но дӥськутэнызы, тунсыко фильмъёс учкизы но пуштроссы пумысен кенешизы, «60 секунд» выллем интеллектуальной шудонэн шудӥзы, этнодискотекаын эктӥзы.

Нялтас вераса, нырысетӥез таӵе дышетскон сессия ортчиз кылем сӥзьыл, отчы вуылӥзы Россиысь 7 улосъёсысь егитъёс. Радъясьёс верамъя, луоз на куинетӥез но, со чакламын туэ сӥзьыллы.

Елена Рябина

Туспуктэм: Эшъяськон юртлэн пресс-службаез

Удмурт Дунне
By Удмурт Дунне Май 15, 2017 13:41