Владимир Михайлов: Ассэ тодытэк но, куараезъя тодмало

Удмурт Дунне
By Удмурт Дунне Май 17, 2017 16:37
михайлов

Тросэз пусйизы «Ладилэн азбараз» радиопередачлэсь мӧзмемзэс, уг тырмы пе капка ӟукыртэм куара.

16-тӥ куартолэзе филармониын радиожурналистэн, кылбурчиен Владимир Михайловен творческой пумиськон ортчиз. Ужрад сӥземын вал 60 арес тырмонэзлы.

Пумиськон туж шуныт но шулдыр радъяськиз. Юбилярез ӟечкылазы эшъёсыз, тодмо журналистъёс, писательёс, тодосчиос.

Филология наукаосъя кандидат Вера Пантелеева люкаськем калыклы ивортӥз:

— Тросэз уг тодо, дыр, Владимир Пантелеевич Дышетон удысысь йӧскалык ужпумъёсты тодон-эскеронъя институтмылэн ӧнерчиез луэ шуыса. Институтамы али электронной  учебникъёс лэсьтӥськом. Аудиоматериалъёсыз лыдӟыны чебер куараен адями кулэ луиз. Вань мылкыд карисьёс пӧлысь бырйимы В. Михайловез, небыт но буйгатӥсь куараез понна. Нылпиос туж мыло-кыдо кылзо сое.

Куноослэсь мылкыдзэс лӧпкытӥз тодосчи Александр Шкляев. Со С. Михайловлэн «Ладилэн азбарез» мынӥсь радиопередачаезлы сӥзем «Ладилэн азбараз кин куное пыраз» серемес кылбурзэ лыдӟиз. Вань удмурт кизилиос та передачае вуиылӥллям вылэм. Жаль, али та передача ӧвӧл ни.

Владимир Михайлов усто губиясь на. Со сярысь вераз сад-бакчаысьтыз бускелез Надежда Бочкарёва:

— Тани туэ но  со гибяны вуэм ини, нош яратоно кузпалыз милемыз губиен перепечен утялӥз. Туж гажасько семьязэ. Ваньмызлы сюлэм шунытсэс тырмыто. Озьы ик Владимир Пантелеевич — туж кибашлы воргорон. Бускельёсызлы но юрттӥськыны вуэ: я кортӵог шукконо, я липет тупатоно.  Владимир Пантелеевичлы паймемысь уг дугдӥськы. Сое тодӥсьтэм адямиос но вераськем куараезъя тодмало вылэм.

Тросэз пусйизы «Ладилэн азбараз» радиопередачлэсь мӧзмемзэс, уг тырмы пе капка ӟукыртэм куара.

В. Михайлов люкаськем калыкез шумпоттӥз: трос гинэ лыдӟиз гожтэм чуръёссэ.

Наталия Самсонова

Удмурт Дунне
By Удмурт Дунне Май 17, 2017 16:37