Утисьмылэн ӝутсконэз

Удмурт Дунне
By Удмурт Дунне Май 12, 2017 17:23

25-тӥ мае пусъёмы Утисьмылэсь ӝутсконзэ (Вознесение Господне). Со котьку тупатӥське четверг нуналлы, Паска бере 40 нунал ортчыса.

Та нуналэз котьку но туж паськыт пусъё Иерусалимысь Елеон гурезь вылысь Вознесенской монастырьын. Отын ватэмын Антонин (Капустин) архимандритлэн лысьӧмъёсыз, кудӥз 19-тӥ дауре турокъёсын киултэм Палестинаын миссионер вал. Эшъёсыныз ӵош со басьтылӥз музъемъёсты но отчы пуктылӥз черкъёс, монастырьёс, школаос, больницаос. Вознесенской монастырьлэн колокольняез Иерусалимын тужгес ӝужытэз луэ. Соин ик сое Ӟуч сюсьтыл нимало на. Та монастырьлэсь кыдёкын ик ӧвӧл Иисус Христослэн инме ӝутскон интыез.

Эгра ёросысь Чутырысь Вознесенилы сӥзем черк. Пуктэмын 19-тӥ даурлэн шораз.

Вознесенской монастырен ӵош Утисьмылэсь ӝутсконзэ пусъёзы Эгра ёросысь Чутырысь, Вотка ёросысь Перевознойысь, Вавож ёросысь Водӟиысь но Вознесенилы сӥзем мукет черкъёсын.

Чутырысь храмез пуктонлы документъёс сётэмын вал 1819-тӥ арын. Лэсьтӥськон ужъёс кыстӥськизы 10 ар ӵоже. Престолзэ вӧсязы 1848-тӥ арын. Та приход удмурт уездъёсысь приходъёс пӧлын тужгес бадӟымез луиз. Отчы вӧсяськыны ветлӥзы 70 гуртъёсын но починкаосын улӥсьёс. Но бӧрысь со гуртъёс пӧлысь данаказ асьсэлэн черкъёссы усьтӥськизы.

Храмез пуктэм бере отын настоятель луиз протоиерей Василий Раевский. Матушкаеныз ӵош соос калык пӧлын валэктон уж нуизы. Черк бордысь школаын арлы быдэ 12 удмурт нылъёс грамоталы дышетскизы. Соослэсь 2 бадӟым хор кылдытэмын вал. Со сяна, батюшка черкогуртын сад мерттӥз, муш бакча усьтӥз, фельдшерлэсь ужзэ быдэсъяз. 1893-тӥ арын июне пусйизы отец Василийлэсь та черкын 50 ар ӵоже служба нуэмзэ. Протоиерей тодэ вал удмурт кылэз, соин ик гуртоос сое ӟечкылазы анай кылынызы. Протоиерей улонысь кошкиз 1914-тӥ арын 11-тӥ июле. Мытэм ужзэ азинтӥзы солэн пиналъёсыз, пӧлысьтызы тужгес тодмо луиз отец Венедикт, таиз службаос нуиз Шарканын но Вавожын.

Матысь нуналъёсы черк пусъе

12-тӥ мае — Кизический мученикъёсты сӥлы карон;

13-тӥ мае — Иаков Зеведеев апостолэз но Игнатий (Брянчанинов) святителез сӥлы карон;

14-тӥ мае — Иеремий пророкез, Инмар Анайлэсь «Нечаянная радость» мудорзэ сӥлы карон;

16-тӥ мае — Феодосий Киево-Печерскиез данъян;

18-тӥ мае — Инмар Анайлэсь «Неупиваемая чаша» мудорзэ сӥлы карон;

21-тӥ мае — Иоанн Богослов апостолэз но евангелистэз данъян;

23-тӥ мае — Симон Зилот апостолэз данъян;

24-тӥ мае — Иисус Христослэн инме ӝутӥськонэз, Мефодиез но Кириллэз сӥлы карон;

25-тӥ мае — Ермогенэз, Москваысь Патриархез, сӥлы карон;

28-тӥ мае — Дмитрий Угличский мученикез сӥлы карон;

31-тӥ мае — 7 Вселенской Соборъёслэсь отецъёссэс буре ваён.

Киросэн ветлонысен «Вунонтэм полкозь»

9-тӥ Май вань калык понна бадӟым праздник — Вормон Нунал! Со возьматэ улонлэсь кулонэз вормемзэ, Христослэсь сьӧд кужымъёсты уллямзэ.

Ог 30 ар талэсь азьло Удмуртиын, быдэс странаямы сямен ик, ортчылыны кутскизы Киросэн ветлонъёс, нырысьёсаз трос ик калык ӧз пыриськылы. Но туннэ со выжиз ни бадӟым шествие — «Вунонтэм полке». Германиысь журналист мылкыдзэ но гожтэм ни: «Ӟучъёс 9-тӥ Маез туж паськыт пусъё, толон ӝыт гинэ вормизы, кожалод. Малпан кылдэ: соос Германиез но Европаысь странаосты гинэ уз, быдэс дуннеысь котькинэ но котькыӵе вакытэ вормыны быгатозы».

«Вунонтэм полкез» радъяны малпанэз кылдӥз туала поколенилэн. Озьы туэ нош ик Красной площадьын ортчиз военной парад. Жаль, уг чузъяськы ож вакытысь Вылӥ Главнокомандующийлэн нимыз гинэ, со кивалтэм улсын странамы Быдӟым Вормонозь вуиз вал.

Вормыны юрттӥз вӧсяськон но

Быдӟым тылож дыръя асьме солдатъёслы юрттӥз Инмарлы вӧсяськемзы но. Шоркарысь техникумъёсын дышетскись студентъёслы та сярысь мадизы Олег Горбачев баӵко, Владимир Шкляев историк но Афган тылож пыр потэмъёс.

Быдӟым Вормонлы сӥзем ужрад ортчиз Ижысь Н. Некрасов нимо библиотекаын.

— Ваньмы тодӥськом: война 1941-тӥ арын 22-тӥ июне кутскиз, но тросэз уг тодо, со нуналэ сӥлы кариськом на Россиысь святойёсты, — веранзэ мытӥз Олег Горбачев баӵко. — Гитлер та сярысь умой тодэ вал, соин но та нуналэ омырскиз, луоз.

Черклэн война дыръя улэм-вылэмез сярысь туж умой вераз Владимир Шкляев. Кылсярысь, Ижысь баӵкоос войналэн нырысетӥ нуналъёсысеныз ик люканы кутскизы оже келян вылысь коньдон. Шуом, Успенской черкысь протоиерейёс В. Стефанов но Г. Грачев обороная фондэ 1 миллион 752 сюрс манет сётӥзы. 1944-тӥ арын соос И. Сталинлэсь таукарон телеграммазэ басьтӥзы.

Туннэ тросэз оско-валало ни: зэмзэ но, войнаез вормим песянай-песятайёслэн вӧсяськеменызы но. Со вакытъёсы черк сярысь вунэтыны косэмын вал ке но, адямиос Утисьмылы вазиськыны ӧз кышкаллялэ.

Ожысь ветеран Виктор Заворин тодаз вайиз 1979-тӥ — 1989-тӥ аръёсысь Афган ожез:

— Перестройка вуытозь ик, ватыны турттӥзы, кӧня мурт соку быриз, — вераз со. — Совето Союзэ цинклэсь коросъёсты лушкем вайылӥзы. Солдатъёслэн памятникъёссы вылэ ӧз гожтылэ, кытын но малы быризы. Котькуд анай, пизэ армие келякуз, вӧсяськылӥз: «Афганистанэ гинэ медаз келялэ», кисыяз «Живый в помощи» псалом тырылӥз. Анай оскылӥз, со юрттоз, пиез одно берытскоз шуыса.

Ирина Николаева

Туспуктӥз А. Горбунов

Удмурт Дунне
By Удмурт Дунне Май 12, 2017 17:23