Шаерамы кылдоз пӧртэм калыкъёслэн гуртсы

Удмурт Дунне
By Удмурт Дунне Май 5, 2017 12:10

Удмуртилэн Тӧроезлэсь ужзэ быдэсъясь Александр Бречалов Ижысь Эшъяськон юртын пумиськылӥз шаерысьтымы калык огазеяськонъёслэн азьветлӥсьёсынызы.

Удмуртиын 130 выжы калык улэ. Мыло-кыдо ужало соослэн 38 огазеяськонъёссы. Кылэз, сям-йылолъёсты утёнын таос бадӟым инты басьто.

Удмуртиын 130 выжы калык улэ. Мыло-кыдо ужало соослэн 38 огазеяськонъёссы. Кылэз, сям-йылолъёсты утёнын таос бадӟым инты басьто.

— Тӥледын кенешон ужам огез валтӥсез луоз, — люкаськемъёслы шуиз Александр Бречалов. — Соин ик мынам потэ тӥледын тодматскеме, сюлмаськытӥсь ужпумъёсты сярысь кылэме.

Шаерысьтымы улон-вылонэн тодматӥзы нациосын ужан политикая министрлэсь ужзэ быдэсъясь Лариса Буранова, Удмуртиысь калыкъёслэн ассамблеяенызы кивалтӥсь Алексей Загребин, «Удмурт Кенеш» огазеяськонлэн кивалтӥсез Татьяна Ишматова, бигеръёслэн калык центренызы кивалтӥсь Ильсур Минемуллин но мукетъёсыз.

Кун Думаысь депутат Алексей Загребин пыр-поч вераз  этнографъёслэн но антропологъёслэн Ижын гужем ортчоно конгрессы сярысь. Отчы пыриськыны мылкыдзэс веразы ни 75 кунысь 1 сюрс 500-лэсь трос тодосчиос. Татьяна Ишматова люкаськемъёслы тодазы вайытӥз: Удмуртия кунлык басьтэм дырысен 2020-тӥ арын 100 ар тырме. «Удмурт Кенеш», солы сӥзьыса, пӧртэм ужрадъёс чаклаз. Татьяна Ишматова дэмлаз дэмен ужаны.

Люкаськем калык огкылэ вуиз: тазьы ӵемгес пумиськылоно. Александр Бречалов ӵектӥз шаерамы выжы калыкъёслэсь аспӧртэм гуртсэс кылдытыны. Котькудӥз калык отын аслэсьтыз историзэ, улон манерзэ, сям-йылолъёссэ возьматыны мед быгатоз. Та валче улонлы юрттыны кулэ.

Сергей Захаров

Туспуктӥз Э. Карипов

Удмурт Дунне
By Удмурт Дунне Май 5, 2017 12:10