«Театр но нылпиос» фестивальын вормиз Ижысь «Птица» коллектив

Удмурт Дунне
By Удмурт Дунне Май 15, 2017 16:54

12-тӥ-14-тӥ куартолэзе Ижын ортчиз «Театр но нылпиос» фестиваль. Сцена вылэ потазы Россиысь 13 коллективъёс.

«Птица» театр — Ижын тужгес тодмоез.

Ижысь ялан ӝуась тыл дорысь Шор площаде вамыштэ чибориё колонна, пинал артистъёс али гинэ сцена вылысь васькиллям кадь: кин ке калык дӥсьсэ дӥсям, кин ке Шуралилы пӧрмытскем, кин ке — Лымы мунёлы. Озьы Ижкаретӥ ортчизы фестивале вуэм 13 театръёс но ансамбльёс. 3 нунал ӵоже спектакльёс мынӥзы Мунё но Удмурт театръёсын. Соосты дунъяны вуизы Москваысь Калык творчествоя кун юртысь театральной ёзэн кивалтӥсь Марина Куц, Бадӟым театрысь режиссёр Сергей Терехов, артист Татьяна Уфимцева, Удмуртиысь Театр удысын ужасьёслэн огазеяськонзылэн кивалтӥсез Александр Мустаев.

Сцена вылын улӟизы чуваш, бигер, удмурт, украин, ӟуч калыкъёслэн выжыкылъёссы, чузъяськизы кылбуръёс, пуктӥськизы драмаос, крезьгуро комедиос.

«Театр но нылпиос» фестиваль шаерамы ик вордӥськиз, Егитъёслэн юртсы вазиськиз Москвае, отын малпанлы дурбасьтӥзы. Нош та нуналъёсы Москваысь дунъясьёс адӟизы, макем зол шаерамы возисько нылпиослэн но егитъёслэн театръёссы, кызьы вань сюлэмзэс поныса ужало соослэн кивалтӥсьёссы.

— Пиналъёс но, дунъясьёс но пусйизы, фестиваль туж усто радъямын вал шуыса. Спектакльёс вискын пиналъёс вуылӥзы Воткинске но Сарапулэ, котькуд нунал пумын жюри люкалляз коллективъёслэсь кивалтӥсьёссэс но вералляз, мар бордын азьланяз ужано на, нош марзы пӧрмиз, — вера Егитъёслэн юртсылэн директорезлэн воштӥсез Вероника Шалавина. — Дунъясьёс пусйизы, шаерысьтымы коллективъёс туж кужмоесь шуыса. Озьы гран-при дорамы ик кылиз, сое утӥз Ижысь «Птица» коллектив, 1-тӥ но 3-тӥ интыын луизы Ижысь «Радуга» но «Дай пять» театръёс, 2-тӥ — Ярославльысь «Надежда» театр.

«Птица» театр — Ижын тужгес тодмоез. Режиссёрзы Светлана Шанская, пьеса гожтыкуз, кутылэ анаезлэн улонысьтыз суредъёсты. «Издалека долго» выжыкыл возьматэ Варя Старшиновалэсь (Валентина Шанскаялэсь) егит дырзэ, кызьы со вуэ городэ, вуриськисьын ужа, эшъяське, яратэ…

— Тросэз учкисьёс залысь синвуаськыса потӥзы, — шуэ Светлана Шанская. — Жюри милемыз ушъяз: пиосмы зэмос артистъёс кадесь, нош нылъёсмы рользэс сюлэмзы пыр поттыса шудо. Артём Широбоков но Ольга Даниленко артистъёсмы тужгес усто шудӥсьёс пӧлын луизы.

«Дай пять!» коллектив возьматӥз «Рождество» спектакль, татын пӧлэстӥськизы ӟуч но но удмурт сям-йылолъёс. Кызьы верало театрлэн кивалтӥсьёсыз Елена но Владимир Ломаевъёс, пиналъёс ӟучесь, соин ик спектакльлы дасяськыны юромо ӧтчазы удмурт адямиез, соин ӵош удмурт кырӟанъёсты дышетӥзы.

Ижын нылпиослэн балет театрзы одӥг гинэ — «Радуга». Фестивальын пиналъёс «Чиполлино» балетэз быдэстӥзы. Зэм, спектакльёс туж учкымонэсь вал. Жаляса верано, учкисез ӧжыт лыктӥз…

Югдур, оло, вуоно аръёсы воштӥськоз. Вуоноез фестиваль ортчоз 2019-тӥ арын Ижын ик.

Мария Иванова

Туспуктэм: «Птица» театр 

 

Удмурт Дунне
By Удмурт Дунне Май 15, 2017 16:54