Со кадез ӧвӧл ни…

Удмурт Дунне
By Удмурт Дунне Май 4, 2017 13:06

Фома Ермаковлы луыса удмурт калык понна усьтӥськиз Кузебай Гердлэн нимыз.

Фома Ермаковлэн наукаез азинтэмез, К. Гердлэсь нимзэ калыклы берыктэмез, семьяен улэмез сярысь вераськизы Вавож ёросысь вордӥськем Итчи-Докъя гуртаз.

Котыр ласянь нырысетӥ

— Ӵем дыръя озьы луэ: адями улонысь кошке но, со сярысь вунэто, — веранзэ мытӥз «Удмурт Кенеш» огазеяськонлэн кивалтӥсез Татьяна Ишматова. — Али капчи вераны: кыӵе чебер нунал, чебер лыдпус. Но ачиз Фома Ермаков кыӵе но шуг-секытъёс пыр ӧз поты. Аслаз эшъёсыз ик сое ӧз валалэ, кизэс ӧз сётъялэ. Озьы ке но Фома Ермаковлы луыса удмурт калык понна усьтӥськиз Кузебай Гердлэн нимыз. Вавож ёрос данъяськыны кулэ, сыӵе бадӟым адямиос, югдытӥсьёс та музъем вылысь потэмын шуыса. Соосъя мертано кылмес, ужъёсмес, котьку но ог-огмылы юрттыны тыршоно. Фома Ермаков берло дыре сокем ик ӧз пота ни калык пӧлы, но туж яратылӥз пиналъёс азьын вераськыны. Соин ик мон оскисько: егитъёс со сярысь котьку тодазы возёзы.

— 20-тӥ даурез учконо ке, Фома Ермаков кадь литературоведъёс ӧвӧл ни, — пусйиз писатель Николай Кузнецов. —  Со тужгес кужмоез, тужгес рос-прос ужасез вал. Солэн котькуд лыдпусэз, котькуд учырез уно пол эскеремын. Мон архивъёсысь К. Гердлы сӥзем документъёсты шедьтӥ но нырысь ик соосты Фома Кузьмичлы возьматӥ. Ас вакытаз шараяны лэзьымтэ архивъёс дорозь вуэмелы со туж шумпотӥз. Нош табере мынам Гердлы сӥзем книгае дуннеысь 16 кылэ берыктэмын ни. Жаль, асьмелэн шедё вожъяськисьёс, пыд пуктӥсьёс. Сыӵе адямиос Фома Ермаковлэн улоназ ӧжыт ӧй вал. Но вожъяськыса улоно ӧвӧл, ужано. Огпол мон кури сое: гожтэ вал, кыӵе ужъёсъя тӥ нырысетӥ луиськоды. Со мыным быдэс бам тыр гожтӥз: 20 пала ужъёсъя, ӧръёсъя.

Кылсярысь, Ф. Ермаков — удмурт литературоведениея нырысетӥез кандидат, нырысетӥез удмурт профессор-литературовед, удмурт кылын нырысетӥ монографилэн авторез, К. Герд нимо премилэн одӥгез нырысетӥ лауреатэз но трос мукет.

Ф. Ермаковлэн Вера нылыз но Елизавета но Екатерина нунокъёсыз.

— Жаль, Ф. Ермаков сярысь асьмелэн ӧжыт тодо ай, — ӧпкелиз Николай Спиридонович. —  Удмурт кун университетмы, удмурт филологияя нимаз институтмы вань вылысь  удмурт писательёс, литературоведъёс сярысь рос-прос гожтэм диплом ужъёс али ӧвӧл.

— Фома Ермаков туж аспӧртэмлыко адями вал, — тодаз вае шаерчи но дышетӥсь Валерий Ганеев. — К. Гердлэсь чуръёссэ сыӵе быгатыса лыдӟылӥз — соку ик валаськод кылбурлэсь зэмос пуштроссэ. Фома Кузьмичлэн ӝуткамезъя мон школамылэн историеныз тунсыкъяськыны кутски. Туж паймисько вал солэн визьмызлы, шаерзэ гажаны быгатэмезлы, историез ӟеч тодэмезлы. Огвакытэ бадӟым уж мынӥз республикаысьтымы инты нимъёсты удмурт но ӟуч кылъёсын гожъянъя. Вавож ёросысь инты нимъёсты шонер берыктон ужез Анатолий Максимович Егоров дышетӥсьлы но мыным сётӥзы. Нош ми мар бордысен кутскыны ум валаське. Вазиським Ф. Ермаковлы. Со милемыз Ижысь архиве нуиз, отысь ужасьёс доры пыртыса кельтӥз.  Отын ми умой-умой ужамы. Ачиз Фома Ермаков, гуртъёслэсь нимъёссэс тодэм сяна, котькудӥзлэсь кылдон сюрессэ но мадьыны быгатэ вал. Зэмос визьмо удмурт адями, гожъяськиз — синмаськымон, улӥз — вожъяськымон.

Со туж шудо вал

Ужрад дыръя возьматэмын вал Ф. Ермаковлы сӥзем видеоадӟытонъёс, тодэ ваемын улонысьтыз яркыт суредъёс. Аспӧртэм кузьым луизы Вера Фоминична нылызлэн но Елизавета нунокезлэн тодэ ваёнъёссы.

— Адямиен артэ улӥськод ке, сое воксё мукет сямен адӟиськод, — шуиз Вера Фоминична. — «Лицом к лицу лица не увидать» шуэм кадь. Тросэз творчество удысысь адямиос ас дуннеязы уло. Но милям атаймы туж усьтӥськем адями вал, туж юн гажаз семьязэ.  Ми понна со нырысь ик атай. Анаен ӵош соос 61 ар улӥзы. Огпол но керетэмзэс, куара будэтэмзэс гинэ но кылэммы ӧвӧл. Ми сузэреным огбыдӟаесьгес вал, пичи дыръямы атаез кыкнапалтӥз кутӥськом но Гоголь бульвар кузя ветлӥськом. Мамамы серекъялляз: самовар сямен поръяськоды. Атай отын ик милемлы кыӵе ке пу силёослэсь шудонъёс вӧлылӥз. Котьма лэсьтыны быгатэ вал. Ӵемысь быдэс семьяенымы зарезь дуре ветлӥмы. Со туж данъяськылӥз, ваньмы ӵош кариськыны быгатӥськом шуыса. Семья ужъёслэсь ноку ӧз палэнскылы, яратылӥз лавкае няньлы ветлыны. Нош кин ке висе ке (нылпиосыз-а,   нунокъёсыз-а), одно ик, ческыт пирожной басьтыса, пыре вал. Дӥсь но, пыдкутчан но басьялляз. Сад-бакчаямы кык ар ӵоже ачиз корка пуктӥз. Туж жуммиз соку, но мылкыдыз бурдъяськемын вал. Тодӥськом, атаймы туж трос секытэз чидано луиз, но озьы ке но солэн улонэз шудо вал.

Вавож ёросысь Гурезь-Пудга гуртысь Кузебай Герд нимо музей-юртын ужасьёс.

— Ми понна Фома Ермаков ним кыклы люкиське, — шуиз Елизавета нунокез. — Одӥгез пӧртэм энциклопедиосын пумиськылӥсь тодосчи. Мукетыз — огшоры песятай. Со дорын котьку туж шуныт, лякыт вал. Со сыӵе яратӥз куно пумитаны! Песятаймы туж данъяське вал аслаз удмурт калыкеныз, вордӥськем гуртэныз. Мон малпасько, али но со татын милемын ӵош шумпотэ. Та ӝыт азьын 2 нунал ӵоже куазь туж жобаськиз: зоре, лымыя, тӧлаське. Сыӵе ик улонэз вал песятаймылэн. Но вузӥсь тӧлъёс пыр потыса но, со ӧз чигы, йыг-йыг сылӥз.

— Озьы пӧрмиз, Вавоже ми ӵемысь вуылӥм ке но, тросгес улӥмы Гурезь-Пудгалан (анаез кулэм бере отын сюранаез дорын улӥз пичи Фома — Е. М.).  Огвакытэ атайлэн вордӥськем интыяз мыныны ӝуткаським ик вал, но куазь уродэн отчы сюрес ик ӧй вал, — тодаз вае Фома Кузьмичлэн Вера Фоминична нылыз. — Берло дыре та сярысь сокем ӧм но малпаськылэ ни, трос мукет сюлмаськонъёс шедьылӥзы. Но гуртоос асьсэос  доразы ӧтизы но, мылкыд бугырскиз. Гуртоослы но, «Удмурт Кенешлы» но тау кариськом атаймылэсь нимзэ сыӵе сӥлы каремзы понна.

— Али, татчы вуыса, ми валам, малы песятай сокем яратэ вал куно пумитаны. Татын сыӵе мыло-кыдо, лякыт калык улэ! — ватсаз на Фома Кузьмичлэн Елизавета внучкаез.

Фома Ермаковлы сӥзем ужрадлэн кыкетӥ люкетаз Вавож ёросысь «Бӧляк», «Инвожо», «Предание» коллективъёс но школаын дышетскись нылпиос концерт возьматӥзы. Мероприятие йылпумъяськем бере ни вераськон ӝутскиз Фома Ермаковлэн вордӥськем гуртаз солы сӥзем мемориал пул инъян сярысь. Соку Фома Кузьмичлэн нимыз али будӥсь нылпиослэн сюлэмъёсазы пыраклы пыӵаса кыльысал.

Елена Миннигараева

Удмурт Дунне
By Удмурт Дунне Май 4, 2017 13:06