Шаерамы ортче инкуазез утёнлы сӥзем марафон

Удмурт Дунне
By Удмурт Дунне Май 17, 2017 15:29

Таяз арня пумын «Улонлэн писпуэз» эко-марафонлы йылпумъянъёс лэсьтэмын луозы.

Макулатураез тужгес трос бичам нылпиос пусъемын луозы таукаронъёсын но син-пель кузьымъёсын.

Сое радъяз Инкуазез утёнъя но инкуазь узырлыкъя министерство «Солнечный мир» огазеяськонэн валче Даун синдромен висись нылпиослы саклык висъян понна.

Быдэс оштолэзь ӵоже ог 2 сюрс 500 пала нылпиос экологической акциосы пыриськизы. Кылсярысь, «Ойдолэ вӧлмытом чеберез» ӧтён улсын бичазы макулатура. Толэзь ӵоже люкамын вал ог 10 тонна бумага. Та узырлык «Шаркан» инкуазь паркын будэтэм календула сяська кидысъёслы воштэмын вал.  Кидысъёс вуизы пиналъёс кие, соос бакчаосазы асьсэлэсь шундызэс (шунды — Даун синдромен висисьёслэн пуссы) будэтыны мед быгатозы шуыса. Нош макулатура понна сётэм коньдонэн басьтыны чакламын писпу удъёс, берло соосты Удмуртилэн пӧртэм сэрегъёсаз мерттозы. Озьы ик инкуазез утёнъя министерствоысь ужасьёс шаерысьтымы школаосын инкуазез утёнлы сӥзем урокъёс ортчытӥзы, вераськизы жуг-жагез нимаз октон сярысь.

Макулатураез тужгес трос бичам нылпиос пусъемын луозы таукаронъёсын но син-пель кузьымъёсын. Акцие ваньмыз пыриськемъёс Ижысь нылпи юрт вӧзы чияпу сад мерттозы.

Ангелина Снигирёва

Удмурт Дунне
By Удмурт Дунне Май 17, 2017 15:29