«Ожо-вожо» конкурс азьланьтӥське

Удмурт Дунне
By Удмурт Дунне Май 11, 2017 15:20

Экологилэн арезлы сӥзьыса «Удмурт дунне» газет 12-16 аресъем нылпиослы «Ожо-вожо» конкурс ялӥз. Ужъёс пумен вуо но вуо. 

Коӵышпи

Со вал тол пумын. Эшъёсыным тылобурдоосты туспуктыны мынӥмы. Дыртытэк вамышъяськом, ас поннамы лабыртӥськом. Гриша но Дима шуизы:

— Учке, учке, писпуэ коӵышпи дэмӟем!

Ми Машаен куалектӥмы. Мар луоз та пичи ӝабиен?

Мон шуи:

— Али ик мон сое васькыто.

Гриша паймиз:

— А тон уд усьы-а? Писпу векчи ук.

— Кышкамы ке, коӵышпи быроз ук!

Мон писпу йылэ туби. сузьтӥськисько вал ини коӵышпи доры, но со мынам капюшонам тэтчиз. Мырдэм писпуысь васьки но шуге-леке шедем пӧйшурез киям кутӥ. Пуштрес быж нуныяськыны, нюлӥськыны кутскиз. Озьы со милемлы тау шуиз, дыр.

Тулыс

Кин таӵе бамам чупаз?

Ой, шунды!

Кин небыт тќлэн вешаз?

Ой, тулыс!

Тӥни малы шуныт луиз:

Тулыс вуиз!

Марлы пӧрмиз   лымымы?

Ой, вулы!

Ӝоген ваньмыз   вожектоз,

Ой, лудмы!

Кыралэ ворпо ӝутскоз,

Ой, сяська!

Бубыли соин шудоз

Исаса!

Анна Буркова,  Сьӧлта ёросысь  

 Выль Мӧнья школаысь  

5-тӥ классын дышетскись

Жильырты, катанчи!

2017-тӥ ар ялэмын экологилэн ареныз. Соин ик мынам потэ Кияса ёросысь Уддяди гуртысьтымы ошмесъёсмы сярысь мадеме.

Милям гуртамы соос кык — Сарали но Катанчи. Ошмесъёс — гуртлэн синъёсыз кадь, соин ик котырзы котьку чылкыт но чебер луыны кулэ.

Катанчи ошмес котырез тупатӥзы но выльдӥзы Уддяди школаысь дышетскисьёс. Кылем тулыс ми ветлӥм котыраз писпуос мерттыны, вуж куаръёсты утялтыны. Катанчи ошмесмы дортӥ туж чебер Груша шур бызе. Шурлэн сыӵе нимыз, малы ке шуоно тусыз грушалы кельше.

Сарали ошмесмы туж вашкала. Кылем арын солэсь котырзэ выльдӥзы, ошмес доры пыронэз чебер корка выллем пуктӥзы. Вӧзаз ик пичи тымет ӵыпизы. Котырысьтыз жуг-жугез утялтыны ми но юрттӥмы.

Мон оскисько, азьланяз но гуртысьтымы ошмесъёс калыкез шумпоттозы, юзмыт вуэн куноятозы. Эшъёс, тӥ но чакласа возе ошмесъёстэс.

Анастасия Иванова,

Кияса ёрос, Уддяди школа

«Удмурт дунне» газет «Ожо-вожо» конкурс ялэ

 

Удмурт Дунне
By Удмурт Дунне Май 11, 2017 15:20