Музейлэн нуналыз: Лудорвай, мультфильм но хоровод

Удмурт Дунне
By Удмурт Дунне Май 16, 2017 10:43

Музейлэн нуналыз: Лудорвай, мультфильм но хоровод

Музейлэн нуналэзлы сӥзьыса, Лудорвайысь музей-усадьбаын 3 нунал ӵоже пӧртэм ужрадъёс ортчозы.

18-тӥ мае 10 часысен 20 часозь вань мылкыд карисьёс дунтэк тодматскыны быгатозы музей-усадьбаен. Татын арлы быдэ «Усьтэм ӧс» ужрад ортчылэ. Кылем арын, кылсярысь, музей-усадьбаен тодматскыны 100 пала адями вуылӥз.

19-тӥ мае татын нырысьсэ ортчоз фин-угор мультипликацилы сӥзем фестиваль, отын 31 мультфильм возьматӥськоз. Удмуртиысь сяна, ужъёс вуэмын Марий-Элысь, но Ханты-Мансийскысь, нош Эстониысь но Комиысь мультипликаторъёс, ас мультфильмъёсызы тодматэм сяна, мастер-класс но ортчытозы.

20-тӥ мае ужрадэз йылпумъялоз «Ильинской хоровод». Туэ ужрад 7-тӥзэ радъяське, азьвыл аръёсы отчы пыриськизы ке пӧртэм ёросъёсысь но бускель улосъёсысь арлыдоослэн коллективъёссы, таяз учыре — шаерысьтымы искусствоосъя школаосын дышетскисьёс. Кызьы ивортӥз музей-заповедникын ужась Елена Келарева, хороводэ пыриськыны мылкыд каремзэ ивортӥз 12 коллектив, соос понна 10 станция дасямын. Пиналъёслэсь кырӟаны-вераны быгатэмзэс сяна, эскерозы инкуазез, гурт улонэз тодэмзэс. Угось быдэс ужрад сӥземын Инкуазез утён арлы. Ужрад йылпумъяськоз ӝук сиёнэн.

Валентина Емельянова

Туспуктӥз А. Горбунов

Удмурт Дунне
By Удмурт Дунне Май 16, 2017 10:43