Москваын Россиысь калыкъёслэн кылбуретсылы сӥзем антология потӥз

Удмурт Дунне
By Удмурт Дунне Май 18, 2017 14:41

 Отчы пыризы 5 удмурт авторъёслэн — С. Матвеевлэн, П. Захаровлэн, Т. Черновалэн, А. Шумиловалэн, В. Ванюшевлэн — кылбуръёссы.

— Москва ласянь ми азе курон пуктэмын вал: быръёно 5 кылбурчиосты но соослэсь 2-3 кылбуръёссэс. Ми тыршим, отчы егитъёс но, арлыдоос но, воргорон но нылкышно кылбурчиос мед сюрозы шуыса. — Кинэ ке висъяны капчи ӧй вал — антологие пыртоно устоосыз пӧлысь устооссэ, — вера кылбур быръёнъя комиссилэн ёзчиез З. Рябинина.

Кылбурчиосты комиссилы дэмлазы Писательёслэн огазеяськонзы но тодосчиос, дунъясьёс азьын кылбурчиос чуръёссэс шара лыдӟизы на. Вераны кулэ, антология борды дасямын на диск, отын кылбурчиос ужъёссэс асьсэос камера азьын лыдӟо.

Антологие пыризы Россиысь 57 кылъёсын гожъяськись 229 кылбурчиослэн 751 произведениоссы. Книгаез лэсьтон бордын ужазы 800 пала адямиос, 142-ез соос пӧлысь — кылысь кылэ берыктӥсьёс. Уго котькуд кылбур ӟуч кылэ берыктэмын на.

— Одӥг но ӝыны ар ӵоже лэсьтэмын бадӟым уж, уго берло 25 ар ӵоже таӵе Россиысь калыкъёслэн произведениосынызы антологиос ӧз поталэ ни, — шуиз Россиысь Литературая, книга поттонъя но лыдӟиськонъя комитетлэн кивалтӥсез Сергей Наршыкин.

Таин уж уз йылпумъяськы. Али Россиысь Литературая, книга поттонъя но лыдӟиськонъя комитет дася прозая, нылпи литературая но драматургияя таӵе ик антологиос. Нош Россиысь калыкъёслэн поэзизылы сӥзем книгаен тодматскыны луоз 3-тӥ-6-тӥ инвожое Москваын «Красная площадь» литературной фестивальын.

Мария Векшина

Удмурт Дунне
By Удмурт Дунне Май 18, 2017 14:41