Кыӵе форумъёс ортчозы туэ гужем?

Удмурт Дунне
By Удмурт Дунне Май 16, 2017 15:51

Кыӵе форумъёс ортчозы туэ гужем?

Та форумъёсы шедьыны тӥледлы юрттыны быгатоз «Дарт» газет. Со понна вазиськоно dart.gazet@yandex.ru электрон адресъя.

«iВолга-2017»

Ортчоз 14-тӥ-24-тӥ июне Самара улосысь Мастрюковской тыос котырын. Форум туэ люканы чакла быдэс Россиысь но кунгож сьӧрысь 2 сюрс пала егитъёсты. Соос понна ужалозы ужбергатон, политика, культура, журналистика, спорт удысъёслы сӥзем оглом 10 сменаос. Отчы сюрон понна куриськон гожтоно 15-тӥ маёзь, ivolgaforum.ru сайтэ пырыса. Егитъёс форумын, быръем удыссыя тодон-валанзэс паськытатэм сяна, проектъёсынызы тодматозы. Тужгес устооссэ проектъёсты улонэ пыӵатон вылысь висъяськоз коньдон. Туэ талы чакламын 8 миллион манет.

«Территория смыслов»

Ортчоз 27-тӥ июньысен 20-тӥ августозь Владимир улосысь Клязьма шур дурын. Ужрад люкалоз ог 6 сюрс пала егит специалистъёсты. Гужем ӵоже радъямын луозы пӧртэм удысъёсъя 7 сменаос. Форуме пыриськыны ӧтё егитъёслэсь клубъёссэс, политикъёсты, социологъёсты, журналистъёсты, ужбергатӥсьёсты, партиослэсь азьветлӥсьёссэс. Ужрадэ пыриськыны куриськон гожтыны но форум сярысь пыр-почгес тодыны луоз территориясмыслов.рф сайтысь.

«Таврида»

Ортчоз 3-тӥ июльысен 31-тӥ августозь Крым котырысь Бакальская косаын. Пыриськыны быгато 18 арескысен 30 аресозь егитъёс. Форумын быгатонлыксэс муромытозы, проектъёсынызы тодматозы творчествоен вырись егитъёс — скульпторъёс, музыкантъёс, суредасьёс, гожъяськисьёс, хореографъёс, режиссёръёс, актёръёс, журналистъёс. Туэ нырысьсэ ужрадэ пыриськыны луонлык сётӥськоз библиотекарьёслы, мультфильм лэсьтӥсьёслы но музейын ужасьёслы. Улонэ пыӵатыны коньдон висъяськоз 100 усто проектъёслы. 3-тӥ июльысен 25-тӥ июлёзь ортчись сменаосы куриськон гожтоно 1-тӥ маёзь, мукетъёсаз — 15-тӥ маёзь. Форум сярысь пыр-почгес тододы форумтаврида.рф сайтысь.

«Алтай. Точка Роста»

Ортчоз 4-тӥ-10-тӥ июне Алтай улосысь Белокуриха городын. Форумлэн дышетон программаяз 4 удысъя — ужбергатон, кивалтон (менеджмент), социальной технологиос, творчество — ужалоз 22 площадка. Туэ нырысьсэ форуме лыктозы 30-35 аресъем дышетӥсьёс. Ужрад ортчоз «Экология но территориосты азинтон» ӧтён улсын. Форуме пыриськон сярысь куриськон гожтоно 30-тӥ апрелёзь, пыр-почгес тододы atrsib.ru сайтысь.

Удмурт Дунне
By Удмурт Дунне Май 16, 2017 15:51