Буйгатӥсь куара. Владимир Михайлов радиожурналистлы тырмиз 60 арес

Удмурт Дунне
By Удмурт Дунне Май 15, 2017 11:13

Владимир Михайлов: Гожъяськон — со висён. Туала вакытэ гожъясько яке висись адямиос, яке графоманъёс гинэ.

Пичи дыръям Удмурт радиоын чузъяське вал «Ладилэн азбарез» передача, со дырысен Владимир Пантелеевич Михайловлэн зарни куараез йырам пыӵамын. Али со «Удмуртия» ГТРК-ын нуэ «Зарни арлыд», «Даур нюжаос», «Вормонлэн дуныз» радиопередачаоссэ. Вормылэ Россиысь конкурсъёсын. 9-тӥ (гожтэмын 10-тӥ) куартолэзе Удмуртиысь дано журналистлы тырмиз 60 арес.

 

— Туэ мынам 3 юбилее: аслым 60 арес тырме, 30 ар — Удмурт радиоын ужамелы, 85 ар — быдэсак Удмурт радиолэн кылдэмез дырысен. Ӝыны улонэ радиоын ортчемын.  Шумпотӥсько, мынам пуш мылкыды аслам уженым тупа шуыса. Университетэ но мон, дышетӥсь уг, журналист луо шуыса пыри вал. Нырысь монэ ӧтизы иворъёсты нуыны. Но соос акыльтымон  луизы. Одӥг темаосгес, одӥг юанъёсгес отын. Литературно-драматической редакцие кыкетӥ ставка усьтӥзы но монэ отчы поттӥзы — та мыным чылкак сюлмыя тупаз.

Тодӥсько на, кызьы мон нырысьсэ мынӥ интервью басьтыны Кияса ёросысь совхозэ, скал кыскись депутат доры. Мар юаны уг валаськы. Кӧня ар ужаськоды ни? Вераз. Табере мар юано?!  Кызьы но озьы 3 минутъем радиоверан лэсьтӥ ик. Нош табере 40 минутъем передачалы кытӥ час но ӝыны материал гожтӥськод, собере сое сузяськод, радъяськод, вакчиятӥськод.

— Куарады туж сюлме пырись.

— Инмар сётэм, шуисько. Кинлы ке но со визь, кинлы ке суредаськыны быгатонлык кузьма, нош мыным — куара. Радиолэн аслаз куронъёсыз, тон адямиез нырысетӥ куинь-вить минутскын ас палад ӧд берыкты ке, котькыӵе темаед мед луоз, со тонэ уз кылзӥськы ни. Мынам радиоверанъёсы мукетъёсызлэсь, оло, умойгес но ӧвӧл. Но ӟучъёс, кудъёсыз удмурт кылэз уг тодо, кылзӥськом, шуо, 40 минутъем передачадэ но. Кыӵе ке буйган мылкыд, пе, вае куараед. Тюмене «Сибирский тракт» радиофестивале нырысьсэ мынӥмы но, одӥг академик шуиз: куараеныд, пе, тон вормыны быгатод, малы ке шуоно куараед сюлэмез буйгатэ. Озьы ик луиз. «Сибирский тракт» конкурсын 5 пол вормылӥ. Берло 5 аръёссэ пыриськылӥ Пермьын  ортчылӥсь «Щит России» телерадиофестивале,  ваньмысьтыз зарни «Ника» статуэткаосын бертӥ. «Патриот России» конкурсын 100 тужгес усто журналистъёс пӧлы  3 пол сюрылӥ. Вормонъёсы трос. Элькун конкурсъёсы пыриськонлэсь монэ ало ни. Умой ӧвӧл, пе: тон Россиысь конкурсъёсын вормисе потӥськод, нош элькунын 2-тӥ-3-тӥ инты басьтӥськод…

— Туала журналистикаысь очеркъёс пумен кошко ни.

— Жаль. Калык куре очеркъёсты. Али иворъёсты радиоын, телевидениын тра-та-та-та лыдӟыса кошко но, куддыр валаса но уд вуттӥськы. Огвакытэ мон телевидениын сюжетъёс лэсьтыны кутски вал. Дыртыса верасько — кылпумъёсме сиисько, каллен верасько —  темпоритме ӧвӧл, шуо. Мон уг тупаськы ни туала форматлы. Очерковой журналистикаын кулэ ӵапак дыртӥсьтэм маке. Мон мӧйы калыклы кельшиськогес.

Малпасько, азьланяз сюлэмлы ярась радиоверанъёс берытскозы. Зэмзэ ке, туала улон мыным уг кельшы: азьвыл творчестволы луонлыкъёс тросгес вал.

«Ватка палась Ваняос» — мылкыдэз ӝутӥсь эмъюм

— Журналистика трос дырез но кужымез быдтэ. Нош тӥ, кылбураса но, серемес  веранъёс но гожъяса, вуттӥськоды на. Кылем арын «Ватка палась Ваняос» книгады понна Удмуртиысь Правительстволэсь литературая премизэ басьтӥды.

— Тани шутэтскыны потӥ ке, литературалы тросгес дырме сёто. Мынам 8 книгалы материалъёсы люкамын. Одӥгез — ӟуч кылэ берыктэм кылбуръёсы. Мукетыз — пӧртэм кылъёсысь произведениосты берыктэмъёсы. Куинетӥез — нылпиослы кылбуръёсы. Мӧйыослы гожъямъёсы — ньылетӥез. Кыллё на культураын ужасьёс сярысь ӟуч кылын радиоверанъёсы, очерковой материалъёсы, серемес веранъёсы… Миллион утӥ ке — котькуд пенсиысьтым одӥг лотерейной билет басьяло — ваньзэ тае одно ик потто. Гожъяськон — со висён. Туала вакытэ гожъясько яке висись адямиос, яке графоманъёс гинэ.

— Кинлы капчигес гожъяны: бадӟымъёслы яке пичиослы?

— Кызьы верало, нылпиослы гожтоно озьы ик, кызьы мӧйыослы, но умойгес.

Мынам ваньмыз сямен кылбуръёсы сюжетноесь. Шуом, инкуазь темалы мон классикъёслэсь ӟечгес уг ни пӧрмыты. Гожтӥсько кытысь ке мае ке адӟемме:

 

Укно улысь пичи садын

Будэ улмопумы.

Лызо-вожо-ӵужо-гордо

Шедьтӥ отысь тылы.

 

Нылы озьы шудэ вал. Мон дунне шоры нылпилэн синмыныз учкыны тыршисько.

Вератэк кельтэме уг луы датской (датаослы, вордӥськем нуналъёслы сӥзем) кылбуръёсы сярысь. Соос серем пыр гожтэмын.

Кылысь кылэ берыктонэн шумпотыса вырисько. Дотово мыным со кельше. Со кроссворд кадь: кызьы ай тае удмуртгес кароно, кыӵе кылъёс шедьтоно. Берыктэмед оригиналлэсь ӟечгес но, шуэмзы вань.

Филармониын ортчоз Владимир Михайловлэн творческой ӝытэз

— Сомында гожъяськыса, семьядэс адӟылыса вуттӥськоды на-а?

— Нылпиосылэсь будэмзэс ӧй адӟылы, о-о. 5 пол песятай ни мон табере. Толалтэ шутэтскон нуналъёсы пиналъёсмы дорамыгес люкаськыло. Школаын я садикын кылбур гожтыны куро ке, внукъёсы соку ик мыным жингырто ни.

— Арлыддэс кызьы ке шӧдӥськоды-а?

— 1-тӥ мае бускельёсы сад-бакчае ойдо машинаен нуом шуо вал. Нош мыным  льготной проездной сётӥзы ук, пенсие потӥ бере. Уг, шуисько, туннэ мон нырысьсэ автобусэн льготной проездноен мыно! Уг шӧдӥськы арлыдме. Кышно гинэ шуэ: вай эскеромы вирзӥбеттэ. Озьы, эмчиос ласянь ке — мон висись, ачим ласянь ке — таза. Семьяе, вал сямен ужась сямме тодыса, шуэ: шутэтскы, ачид понна но ул ни.  Но тазэ арзэ ужало на: шӧдэме потэ, мар со, огпал кияд пенсия, мукетаз — уждун.

— Кызьы юбилейдэс пусйыны малпаськоды?

— Уж дурын. Шутэтскон нуналъёс бере ужаны потоно. 9-тӥ мае сад-бакча ульчаысьтым калыкен ӵош шашлык сиим. 16-тӥ мае Национальной библиотека творческой ӝытме ортчытэ.

Мария Векшина

 

Удмурт Дунне
By Удмурт Дунне Май 15, 2017 11:13