9-тӥ мае шаерысьтымы 6 хозяйствоос кизён ужъёссэс йылпумъязы

Удмурт Дунне
By Удмурт Дунне Май 12, 2017 11:34

Музъем мќзмиз кузёезлэсь.

Куазь сётӥз ке, таос борды туннэ-ӵуказе итӥськозы эшшо ог 10-эз.

Гурт удысъя но сиён-юонъя министерствоысь будосъёсъя отделэн кивалтӥсь Алевтина Бурдина ивортэмъя, шаерысьтымы 39 процентэз бусыос киземын. Уйпал ёросъёсын воксё но 7 процентэз сяна ужъёссы быдэстэмын ӧвӧл ай. Кылем арын та вакытэ республикаын 87 процентэз  бусыос киземын ни вал.

— Тулыс ужъёсты 10 нуналскын йылпумъяны чакламын вал, но куазь ужез ӝегатэ, — шуэ Алевтина Михайловна. — Май пумозь вуттӥськыны кулэ. Огез сярысь сюлмаськиськом: медаз кынтылы ни вал. 1 сюрс 947 гектар озимойёс быремен лыдъясько. Но музъем кот на бере, оло, улӟозы на. Вавож ёросысь Мичурин нимо, «Жуё-Можга» но «Восход», Алнаш ёросысь «Прогресс» хозяйствоос, Сергеевлэн но Степановлэн фермер хозяйствооссы ю-нянь кизёнзэс йылпумъязы ни.

Алевтина Бурдина верамъя, туала техникаен ужась юн хозяйствоос ӝоггес берганы пӧрмыто, лябъёсызлы куазь шоры ӵемгес учкылоно луэ.

— 70 процентэз бусыосмы киземын ни, — вера Алнаш ёросысь гурт удысъя управлениен кивалтӥсь Владимир Медведев. — Азьвыл калыкын шуо вал: май толэзе кезьыт ке, озьыен, урожай трос басьтод.  Талы оскиськомы. Собере, кидысмы но ваньмыз ӟеч. «Прогресс» хозяйство шоры учкыса ик, мылкыд ӝутӥське. Тракторъёссы борды Удмуртилэсь но Россилэсь куншетъёссэс юнматыса, бусые потазы. Туннэ огез гинэ ӝожомытэ: куазь сӥялскемен, озимойёс ляб будо. Та вакытэ пудоез тол вылэ кизем культураос вылэ поттӥськомы ни вал. Выль ӝужам сиёнэн йӧлзы но 1,5-2 килограммлы йылылӥз. Нош али котькуд скаллэсь нуналаз 18,6 килограмм  кыскиськомы, талэсь  вылӥе ӝутӥськыны ум быгатӥське.

Йӧл ичи люкаське шуыса, фермер Владимир Сергеев но ӝожоме, солэсь уго хозяйстволы барыш вуэ.

— Тулыс бусы ужъёс кутскон азьын йӧл шуак дунтэмаз, нош удобренилы дун йылӥз. Азьвыл 1 литр йӧлэз  заводъёс 28 манетэн басьто ке вал, али сое 21 манетэн куто, — шуэ В. Сергеев. — Озьы табере толэзяз 1 миллион манет ыштӥськомы. Со миллион манет тыр мар но лэсьтыны ӧй луысал! Кылсярысь, котькуд гектаре 80 килограмм удобрение пазяны быгатӥмы, нош чакласькомы вал 150 килограмм. Со гектарысьтыз 26 центнер урожай басьтыны юрттысал. Миым 17-18 центнер гинэ урожаймы люкаськиз. Удобрение басьтыны ӧм пӧрмытэ уго — гид пуктћм, техника выльдћм. Туэлы 1 гинэ вуж трактор кылиз, со но кизён вакытэз ќз чида — тћяськиз.

Шаерысьтымы хозяйствоос мукет культураос вылэ но пумен выжо ни. Вавож, Можга но Пичи Пурга ёросъёс кукуруза кизьыны потӥзы ни — 9-тӥ майлы 696 гектар киземын. Таос ик бакча сиён кизьыны-мерттыны кутскизы. Одӥг аръем турынъёс 6 сюрс 24 гектар вылэ киземын, миым сярысь, со 1 сюрс 359 гектарлы ичигес на. Трос аръем турынъёс 16 сюрс 753 гектар вылэ киземын, миым сярысь, со 11 сюрс 643 гектарлы ӧжытгес. Етӥн 659 гектар вылэ киземын.

 Елена Сараматова

Туспуктӥз А. Горбунов

Удмурт Дунне
By Удмурт Дунне Май 12, 2017 11:34