21 ёросысь хозяйствоос кизьыны потӥзы

Удмурт Дунне
By Удмурт Дунне Май 5, 2017 11:30

 Зоръёс ӧз люкетэ ке, кылемъёсыз но туннэ-ӵуказе таос борды итӥськозы.

Вавож ёросын 30 процентэз бусыоссы киземын ни.

Кылем арын таӵе вакытэ куд-ог ёросъёс кизёнзэс йылпумъязы ни вал. Туэ кыко арнялы беромыса кизьыны потӥмы. Таин сэрен 3-тӥ майлы  22 сюрс 556  гектаре ю тысь согемын. Миым сярысь, со ог 81 сюрс гектарлы ичигес. Гурт удысъя но сиён-юонъя министерство ивортэмъя, азьпалан вавожъёс.

—  Бусыосмы калыклэн сямен ик огвадес куасьмиз, но милям техникамы выльгес, механизаторъёс чырмытгес ужало, — шуэ Вавож ёросысь гурт удысъя управлениен кивалтӥсь Владимир Скобелев. — Миым гинэ 14 трактор, 3 комбайн басьтӥмы. Ваньмыз кизёно бусыосмы 14 сюрс 405 гектар. Туннэ 30 процентэз киземын ни. Кидысмы ваньмыз ӟеч, жуг-жагез пӧлаз воксё ӧвӧл. Кылем арын сярысь, удобрение котькуд гектаре 10 килограммлы тросгес басьтыны быгатӥм — гектарлы быдэ 52,8 килограмм.

Нялтас вераса, вавожъёс уйин но ужало. Куазь умой дыръя кизьыса быдтоно, шуо.

— Туннэ бусыосын 20 пумо техника берга. Уйин музъемез небӟытӥськомы-усыяськомы, шунды ӝужам бере кизьыны кутскиськомы.  Ӝыныез уж быдэстэмын, — шуэ «Восходлэн» председателез Тимур Абашев. — Уж каньыл мед мыноз шуыса, алигес культиватор, сеялка но мукет техника 8 миллион манет тыр басьтӥмы. Будосъёслы туэ эшшо но бадӟым саклык висъяны малпаськомы. Пудо вылын гинэ ӧвӧл,  культураос вылын но уксё поттыны луэ. Мед гинэ куазен удалтоз.

Лымшоръёс шоры вожъяськыса учкыло уйпалъёс. Татын куд-ог бусыосын, уката ик  Чупчи шур сьӧрын, туннэ ке но лымы кылле на.

— Кытын но отын кесэген-кесэген тракторъёсмы «кокчасько»: музъемысь мускытэз ӝегатыны выро, нош кизён борды рос-прос басьтӥськисез ӧвӧл на. Кык хозяйство ке шат лудъёссэ эскерыны кутскиз, — шуэ Балезино ёросысь гурт удысъя управлениысь валтӥсь агроном Татьяна Столбова. — Ярано коть,  музъемъёсмес тол улэ гырыса-небӟытыса кельтӥмы вал. Соин валче туэ лудъёсмы чебересь. Озьыен, кизён капчиенгес сётӥськыны кулэ. Ужам потэ ни. 9-тӥ майлы ми но бусыосы потомы ни. Зэм, 77 процентэз гинэ кидысмы ӟеч. Удобрение гектараз 8,6 килограмм сяна басьтыны ӧм пӧрмытэ. Пудомес толбыт уго басьтэм сиёнэн сюдӥськомы ни — хозяйствоослэн вань коньдонзы отчы кошке. Котьма ке но, кредитэ пырыса но, луонлык шедьтӥзы сеялка басьтыны.

Гурт удысъя но сиён-юонъя министр Александр Прохоров верамъя, туэ чакламын трос урожай люканы. Куазь но, кидыслэн ӟечлыкез но, адямиослэн ужаны мылкыдзы но, тырмыт басьтэм удобрение но — ваньмыз умоезлы оскон сёто.

Елена Сараматова

Туспуктӥз А. Горбунов

Удмурт Дунне
By Удмурт Дунне Май 5, 2017 11:30