Ӟольгыри гинэ но пыэдэн висе

Удмурт Дунне
By Удмурт Дунне Май 29, 2017 09:05

Удмуртиысь Пудо эмъянъя валтӥсь управление ивортэмъя, Россиын кышкыт югдур кылдэмын тылобурдо пыэдэн. Кылсярысь, черламын ни Татарстанысь тылобурдо вордонъя фабрикаысь курегъёс. Кышкыт вирусэн сӥль шараямын асьме шаерамы но.

Тылобурдо гриппез вӧлмыто вань бурдоос.

Паласькись чер

Нырысьсэ тылобурдо пыэд шараямын 1878-тӥ арын Италиын, сое тылобурдо тиф нимазы. 1901-тӥ арын эскеронъёс возьматӥзы, та висёнэз вирус вӧлмытэ шуыса. Тылобурдо пыэд нимазы сое 1971-тӥ арын. Туннэ Россиын кылдэм кышкыт югдурез герӟало Ростов улосысь курка но ӵӧж вордонъя «Евродон-Юг» огазеяськонэн. Со сяна, татын ик комбикорм изон, тылобурдоослы выж лёгет поттонъя заводъёс ужало.

«Евродон-Юг» огазеяськонлэн вузэз шаерамы но вуэмын. Магазинъёсысь таламын 4 сюрс 230 килограмм продукцизы. Пудо эмъянъя валтӥсь управлениысь специалист Вера Стерхова верамъя, ваньмыз со нимысьтыз камераосы ватэмын, вирус вӧлмыны медаз быгаты шуыса.

Вера Стерхова верамъя, Ростовысь черлам продукция пыр ик вирус Татарстанысь «Птицекомплекс «Лаишевский» огазеяськонэ сюремын. Татын 450 сюрс тылобурдо вордо. Шараямын ни тылобурдоослэн А гриппсылэн H5 подтипез. Талэсь ог 15 сюрсэз кулэмын ни. Черлам тылобурдоез быдтыны косэмын.

Пыэд одӥг тылобурдоез но уг жаля — гидысьсэ но, заводысьсэ но, тэльысьсэ но. Гӧгӧрсин (дыдык) но ӟольгыри гинэ но со вирусэн черланы, сое вӧлмытыны быгато. Лудӵӧжъёслэн но лудӟазегъёслэн висемзы ӵемысь уг адӟиськы, но вируссы пушказы улыны быгатэ. Вирус палаське кыед, курегпуз, ымысьтызы-нырысьтызы усем сиён я дыльк пыр. Одӥг тусьысь сиськон, усем тылыез кокчан, одӥг омырен шокан — чер котькызьы вӧлмыны быгатэ.

Ломанн Браунэз курегпуз понна вордо.

Тылобурдо пушкын вирус 1-7 нунал ӵоже лушкем пукыны быгатэ. Черлам бурдолэн тодметъёсыз:

— кизьнылэ;

— иземез потэ;

— ӟускиез лызэктэ;

— синвуэз вия;

— кер-кор шока;

— тылыосыз тур-пар;

— шонаськыса ветлэ;

— кӧтаз йӧтэ;

— пузамысь дугдэ;

— чыртыез но пыдъёсыз пумо.

Пыэдэн черлам тылобурдоос ӵемысь быро, уго соосты йӧнатыны эмъюм малпамтэ на. Зэм, куддыр висёнлэн нокыӵе тодметъёсыз ӧвӧл. Но лушкем висись тылобурдоос туж кышкытэсь луо: кулыны но уг вормо, мукетъёссэ но черлатыса возё. Вандэм бере адӟиське: тылобурдолэн ку улаз ӵужалэс-горд пыктэм интыосыз вань, пуштӥрлыкез, быгытъёсыз вирын пазям кадь адӟисько.

Утиськон амалъёс

Кышкытлык вань, тылобурдо пыэд адямилы но паласькыны быгатоз шуыса. Соин ик, азбарысьтыды курег-ӵӧжъёс висё шуыса, синйылтӥды ке, соку ик ӧте пудо эмъясез. Ымнырады керттэ повязка, очки понэ, халат дӥсялэ, резина сапег кутчалэ но киостэс резина перчаткиосын ватэ. Асьтэлы висись тылобурдоез вандыны, сое сюе согыны уг яра! Сӥльзэ сиён сярысь веранэз ик ӧвӧл! Тылобурдо котыре матэктонлэсь но возиське. Юрттэт вуымтэ дыръя гинэ тылобурдо шӧез клёнкае бинялтоно. Кыедзэ но одно ик сутоно.

Черлам адями висёз огшоры гриппен кадь: кызоз, кизьнылоз, ӧскоз, кӧтаз йӧтоз, кӧтыз но гадьыз висёзы, нырысьтыз вир виялоз, шуг шокалоз. Тазалыкты урод ке, соку ик вазиське эмъясьлы!

Пичи Пурга ёросын ветлэ тылобурдо пуэд

Висёнлэсь утиськон вылысь эн басьялэ тодмотэм фирмаослэсь продукцизэс, алэм азьын вузаськисьёслэсь сӥльзэс-курегпуззэс. Басьтэмзэ но сиёно кема пӧзьтэм бере гинэ.

Тылобурдоосты одӥг интыын пытсаса возёно, кыре поттамлэсь возиськоно. Ӵӧж-ӟазегъёсты шуре лэзьяны уг яра. Иммунитетсэс юнматон вылысь минерал суретъёс но витаминъёс сётъяно. Тылобурдо гидэ пырыку, одно ик халат дӥсяно, ымныре маска керттоно. Сыӵе дӥсен-пыдкукен корка но мукет гидэ пыраны уг яра, сое нимысьтыз возёно, мукет дӥсьлэсь нимаз миськоно.

Гидэз тазатыку, уг яра сиськыны, сыскиськыны, тамак кыскыны. Кыедзэс утялтоно арняяз ичизэ 3 пол. Сузям выжез, борддоръёсты, сюрыосты, пузан интыосты изваскаен ӵемгес маялляно. Пӧсь ву вирусэз быдтэ.

Пӧйшурасьёслы но сак кариськыны косэмын. Кытын ке тылобурдо ассэ валантэм возе ке, соку ик пудо эмъясьёслы вазиськоно. Маке умойтэмзэ шӧдыку, калыкез куремын пудо эмъясьёсын герӟаськыны. Удмуртиысь Пудо эмъянъя управленилэн телефонъёсыз:

8 (3412) 33-05-11 но 8-912-053-22-75.

Елена Сараматова

Туспуктӥз А. Горбунов

Удмурт Дунне
By Удмурт Дунне Май 29, 2017 09:05