Зинаида Рябинина: Кӧня СимонихаУдмуртиын?

Удмурт Дунне
By Удмурт Дунне Апрель 14, 2017 10:24

Зинаида Рябинина, валтӥсь редактор

Берло нуналъёсы Удмуртиын ваньмызлы шуак тодмо луиз Сарапул ёросысь Симониха гурт.

Сое «данэ» поттӥз журналист, Сарапулысь «Наше время. Удмуртия» газетлэн валтӥсь редакторез, «Калык фронтысь» азьветлӥсь А. Серебренников Россилэн Президентэзлы В. Путинлы гуртоослэн секыт югдурзы сярысь юан сётэмез бере. Тупаны но кулэ — ӵап со нуналъёсы В. Путин Удмурт шаерен кивалтыны ыстӥз егит азьветлӥсез Александр Бречаловез. Озьы Александр Владимирович Удмурт шаерен тодматсконзэ Симониха гурт бордысен кутскиз. Туж шумпотымон татын улӥсьёс понна — табере соослы дунтэк нянь но, кеньыр но ваё, эмчиосты но вутто, юристъёсты но утчало… Сыӵе дыръя амалтэк тодэ лыктэ аслам вордӥськем гуртэ. Али ке но кӧт ӝож — сюрес сузямтэен «скорой» дыраз лыктыны быгатытэк, дырызлэсь вазь улонысь кошкиз атаймы. Нош толшорын кулэм песянаймес, вашкала дыръёсы кадь, шайвылэ вал уробоен келям… Со понна быръёнъёс вакыт кандидатъёс олокызьы сюрес шедьто. Соин, дыр, котькуд пичи гуртлэн адӟонэз сюлэм пыртӥ потэ.

«Удмурт дунне» «Сю сюрес» рубрика улын гожтӥз ни шаерысьтымы 200 пала пичи гуртъёсын улӥсьёс сярысь: соослэн но ӧвӧл лавказы но, медпунктсы но, сюрессы но… Ма, куд-ог интыосын тылтэк но, вутэк но пукыло. Ваньзэ сое интыысь кивалтӥсьёс тодо, но югдур уг воштӥськы. Нош газетэ поттэмлэсь табере нокин уг возьдаськы.

— Оло, удмурт кылын гожъяммылэн кужымез ӧвӧл? — юасько Алексей Серебренниковлэсь.

— Кыл бордын гинэ ужпум ӧвӧл, та Симонихаез Удмуртиысь кӧня ӟуч газетъёс гожъязы, телевидение ветлӥз, вань кивалтӥсьёс тодӥзы, калык ёрмыса улэ шуыса, но нокин чиньызэ но ӧз вырӟыты! Путинлы юан сётыны ӧй быгатысал ке, али но ваньмыз азьло сямен ик луысал. Мынам туж йыры кур интыосысь кивалтӥсьёслы — малы, Президент косытэк, асьсэос номыр уг лэсьто? Путин котькытчы уз вуттӥськы. Меџак юан но сётыны шер удалтэ.

Мукет аналтэм гуртъёс понна сюлэмшугез, ярам коть, таяз арняе выль Тӧро ӧжытак буйгатӥз: со Правительстволэсь котькуд ёзчизэ тудву вакытлы кыӵе ке гуртэз бурд улаз басьтыны косӥз. Калык, пе, няньтэк, эмъюмтэк медаз кыль.

Кытын эшшо Путинэз возьмало?

 

Удмурт Дунне
By Удмурт Дунне Апрель 14, 2017 10:24