Завод ужалоз вотэсын. Улонэ пыӵало выль технологиос

Удмурт Дунне
By Удмурт Дунне Апрель 17, 2017 12:12

Элькунысьтымы Инвестициосъя агентстволэн кивалтӥсез Римма Бякова журналистъёсты ӧтчаз «Современные технологии машиностроения» огазеяськонэ. Озьы ас синмынымы адӟыны быгатӥм, кызьы улонэ пыӵатӥсько выль технологиос, соослы луыса кыӵе проектъёс элькунамы кылдо.

Та цехын, микронъёсты лыдэ басьтыса, детальёс лэсьто.

Чус

Ӝӧк вылын — заводлэн макетэз, отын дасо пала бадӟым корпусъёс, административной юрт, бадӟым автостоянка. «Современные технологии машиностроения» («СТМ») огазеяськонлэн учредителез Алексей Мыльников вера: 2020-тӥ ар пумын ваньмыз та улонэ пыӵаны кулэ ни, усьтӥськозы инструментъёс, лакъёс-краскаос, пластмасса поттон но мукет цехъёс. Инты висъямын — Ижысь Вотка шоссе урам пумысь кыралын. Туннэ та бадӟым малпанэз улонэ пыӵатыны кутскемын ни. Одӥг цех усьтӥськемын, но отын… чус. Кӧня ке пумо ужан тӥрлык сылэ — соосты чик уд ӵошаты вашкала заводъёсысь џашетӥсь станокъёсын. Таосыз — туалаесь, йӧноесь… Соос сьӧрын ужасьёс туж визьмоесь адӟисько — туала куронъёслы тупась тӥрлыкен огкыл шедьтыны быгатоно ук.

— Ми татын микронъёсын ужаськом, — вераз Алексей Мыльников. — Вань детальёс туж-туж точноесь луыны кулэ. Температуразэ гинэ но огвыллем возёно: кезьытгес-шунытгес луиз ке, янгышаны кема ӧвӧл.

Огазеяськонлэн директорез Сергей Чухонцев вера виртуальной амалэн ужамзы сярысь. Мар вера — мон гинэ шат уг валаськы? Но тани мукет журналистъёс но куро ни: ваньзэ чиньыос вылын валэктэ ай — али мар поттӥськоды? Кивалтӥсь кисыысьтыз телефонзэ поттэ, валэктэ:

— Та телефонлэн дунызлэн ог 90 процентэз — сое кылдытон, бренд лэсьтон. 10 процентэз гинэ — кулэ луись детальёслэн дунзы. Нош со детальёсты лэсьтонъя цех нокин уз усьты, угось ог ӝыны ар ортчыса, детальёс кулэ уз луэ ни. Туала технологиос туж ӝог азинско: таиз телефон интые кылдоз мукетыз, кулэ луозы выль детальёс… Соин ик ми лэсьтӥськом туж ӧжытэн кулэ луись детальёсты. Тросгес ужаськом беспилотникъёслы, самолётъёслы, машинаослы кулэ луись воштос ёзъёс бордын.

Нош валтӥсь ужпумез та технопарклэн — элькунысьтымы пичи но бадӟым предприятиосты одӥг виртуальной сете огазеян.

«СТМ» туннэ ог 100 пумо детальёс поттэ. Туннэ Россиысь котькудаз сямен самолётын вань ни Ижын поттэм детальёс. Нош валтӥсь ужпумез та технопарклэн — элькунысьтымы пичи но бадӟым предприятиосты одӥг виртуальной сете огазеян. Со, пе, троссэ заказъёсты ӝоггес быдэстыны юрттоз. Кылсярысь, самолётлы ик одӥгзэ деталез «СТМ» лэсьтоз, кыкетӥзэ — мукетыз предприятие. Кытын ке кыӵе ке станокъёс бушазы ке, соосты соку ик производствое кутыны луоз.

— Элькунамы инвестициосты кыскон понна огъя кужымен ужано, — вераз Алексей Мыльников. — Котькудӥз предприниматель ас понназ ужаз ке, сое кылӥсь-адӟись трос уз луы, уката но палэнысь инвесторъёс пӧлын. Нош огазеяським ке, бадӟым луонлыкъёсын, кужымен сетевой заводлы пӧрмом!

Проектъёс кылдозы… теплоходын

2011-тӥ арын Россиын кылдытэмын Стратегической инициативаосъя агентство (АСИ). Со экономика но социальной удысъёсты азинтыны юрттӥсь выль проектъёс кылдытъян бордын ужа. Удмуртия та агентствоен уртче ужан сярысь огкыл гожтӥз туэ Сочиын экономикая форум дыръя.

— Элькунмы АСИ-ен ужанлы нимысьтыз саклык висъя, — пусйиз Инвестициосъя агентстволэн кивалтӥсез Римма Бякова. — Талы луыса асьмеос пыриськыны кулэ Россиысь удысъёсты туала амалъёсын азинтонъя кун программае, Национальной технологической инициативае (НТИ). Ваньмыз та элькунмылэсь национальной рейтингын интызэ юнматыны, улон-вылонэз ӟечомытонъя пӧртэм проектъёсты пыӵатыны юрттоз.

Элькунысьтымы кыкез предприятие — Ижысь «СТМ» но Сарапулысь «Элеконд» — НТИ-лэн программаяз пырисько ни. Кылсярысь, 2016-тӥ арын «СТМ» та программая ог 20 миллион манет басьтӥз, со кутэмын сетевой заводлэсь ужзэ радъянлы.

Римма Бякова верамъя, азьланьын одӥг кыткетын ужаны луонлыкъёс кылдытӥськозы, асьме элькунысь сяна, артэ улосъёсысь предпринимательёслы но. Озьы туэ сентябре радъяны чакламын «Форсайт-флот». Отчы вуозы Пермь крайысь но Башкириысь кивалтӥсьёс, ужбергатӥсьёс, общественной огазеяськонъёслэн ёзчиоссы. Отчы пыриськыны мылкыд карисьёслы нимысьтыз конкурс радъяськоз. Куинь нунал ӵоже соос теплоходэн уяса ортчозы Кам шур кузя, ужалозы огъя проектъёс кылдытон бордын.

— Улосъёс куспын вожвылъяськонлэсь куштӥськыны дыр вуэмын, — пусйиз Инвестициосъя агентстволэн кивалтӥсез. — Странамес юнматон, азинтон понна огазеяськоно!

Элина Кумачёва

Удмурт Дунне
By Удмурт Дунне Апрель 17, 2017 12:12