Задор мылкыдын выль кырӟан!

Удмурт Дунне
By Удмурт Дунне Апрель 11, 2017 13:14

Удмурт театрысь артисткаосын Римма Николаева (Перевозчикова) но Наталья Тур уло Ленин ёросын.

«Удмурт Кенешлэн» Ижысь Ленин ёросысь ёзэз  «Спартак» клубын  шулдыр ужрад ортчытӥз.

Люкаськем калыкез ӟечкылазы Кун Кенешлэн депутатэз Н. Мухаметзянов но  Ленин ёрос йырлэн воштӥсез В. Багаутдинов. Соос пусйизы «Удмурт Кенешлэсь» усто ужамзэ, дэмлазы азьланяз но удмурт лулчеберлыкез азинтон бордын тыршыны.

Та нунал ми матысьгес тодматскыны быгатӥм кык чебер, йӧно нылкышноосын — Удмурт театрысь артисткаосын Римма Николаеваен (Перевозчиковаен) но Наталья Турен. Та нылкышноос уло Ленин ёросын. Соос пӧртэм пумо юанъёслы валэктонъёс сётъязы. Учкисьёс тодӥзы, кызьы, туж бадӟым вожвылъяськон пыр потыса, гуртысь нылъёс дышетскыны пыризы, кыӵе рольёсты шудо театрын. Римма Николаева, артист луэменыз  сяна, тодмо на нылпиослы гожъясь сямен. Со тунсыко вераз та удысэ кызьы вуэмзэ.

«Задор мылкыд» фольклор ансамбль удмурт, ӟуч, украин но бигер калык кырӟанъёсты быдэстӥз.

«Задор мылкыд» фольклор ансамбль удмурт, ӟуч, украин но бигер калык кырӟанъёсты быдэстӥз. Шумпотымон, чузъяськиз чылкак выль кырӟан но — Зинаида Антоновалэн кылъёсызъя ансамбльысь арганчи Геннадий Волков «Вунэтӥд ке монэ» кырӟан кылдытэм. Учкисьёслы со туж яраз, кичабонъёс кема дыр ӵоже ӧз чусоме. Нялтас вераса, та кырӟанэз вотэсэ поттэм бере кык-куинь нунал куспын сое ог сюрслэсь уно адями учкем ини.

Наталья Самсонова

Туспуктӥз Илья Викторов

Удмурт Дунне
By Удмурт Дунне Апрель 11, 2017 13:14