«Югдон» но «Италмас» радиолаос

Удмурт Дунне
By Удмурт Дунне Апрель 24, 2017 11:11

«Югдон» но «Италмас» радиолаос

Кемалась ик ӧвӧл мон кие сюризы удмурт кырӟанъёсын винил пластинкаос. Озьы мон та темаен тунсыкъяськыны кутски.

Шедьтӥ 1980-тӥ аръёсы поттэм проигрыватель, кылзӥськи пластинкаосме. Зэмзэ  ке, проигрывателелэн тусыз мыным ӧзгес кельшы, малы ке шуоно солэн вылыз огшоры сьӧд буёло, вылаз юнматэмын кык бадӟым колонкаос. Соин ик утчаны кутски крезьгурез «лыдӟись» выль аппарат. Вотэс бамъёсты учкылыса, валай: чебер ретро-дизайнэн ушъяськыны быгато радиолаос. Радиола — со проигрыватель гинэ ӧвӧл, отын вань на радиоез, пушказ динамикъёс юнматэмын, туала кылын вераса — крезьгуро центр. Тужгес но чебересь радиолаос, мон сямен, 1960-тӥ аръёсы потто вылэм. Соос корка котырез чеберматылзы синме йӧтӥсь шрифтъёсынызы но буёлъёсынызы.

Огпол вотэсысь адӟи «Италмас» радиола сярысь кагазэз. Вылбамаз сьӧд фон вылын ӝужыт лемлет букваосын «Италмас» гожтэмын, нош сэрегаз яркыт- ӵуж радиола суредамын. Сыӵе удмурт нимын радиола, пе, вылэм! Аппарат вылэм туж бадӟым, паськыт, пичи пыдъёс вылын сылэм. Мон лыдӟи, «Италмас», пе, вал Россиысь нырысетӥ стереофонической радиолаос пӧлын! Сое поттыны кутскиллям 1964-тӥ арын Сарапулысь радиозаводын.

Эшшо кыӵе радиолаос потто на вал Удмуртиын? Тодӥ, сыӵе радиолаос ӧжыт ӧй вал шуыса: «Сириус», «Кама», «Ижевск», «Урал»… Эшшо одӥг удмурт нимынзэ шедьтӥ — «Югдон». Сое 1957-тӥ арысен поттӥз Ижысь радиозавод. Со «Италмаслэсь» трос поллы пичигес но капчигес вал. Та радиола вылэм пӧртэм пумо, одӥгезлэн тусыз мыным тужгес но кельшиз, мон сое вотэсысь шедьтӥ ни, табере басьтыны малпасько. Тунсыко ук!

Богдан Анфиногенов

 

 

Удмурт Дунне
By Удмурт Дунне Апрель 24, 2017 11:11